Удмурт субтитръёсын кино учкон

Туннэ Удмурт кун университетлэн Актовой залаз "Тӧдьы кырымпыдэсъёс" мадьяр киноез учкон ортчиз. Та кино возьматон кылысь кылэ берыктӥсьёслэн калыкуспо нуналзылы сӥземын вал.  Радъязы сое Финн-угор лулчеберетъя "Чибори" клуб, Berykton Lud, Удмурт филологи факультет, "Удмуртлык" огин. 

Ужрадэз "Чибори" клублэн кивалтӥсез, Наталия Самсонова, усьтӥз. Со берыктӥсьёслэн калыккуспо нуналзы сярысь вераз, собере кылзэ Erika Asztalosлы сётӥз. Erika - мадьяр ке но, лыктэмъёсты чылк-чылк удмурт кылын вераськеменыз паймытӥз. Со вераз, та киноез дышетскисьёсын ӵош ар пала берыктыны выризы шуыса. Малы берыктонлы та фильм быръемын? Erikaлэн верамезъя, солы кельшо спортэн герӟаськем киноос, озьы ик татын сокем трос уг верасько, озьыен, берыктонэз но ичигес. Но куинетӥез, та киноын зэмос гимнастъёс шудо, но шудо асьсэдыз асьсэос. 

 

 

Erika Asztalos (original http://instagram.com/p/e4vDgiMJwG/

Лыктэмъёслэн лыдзы но паймымон вал. Татын ик Удмурт филологи но Журналистикая факультетъёсысь дышетӥсьёс но дышетскисьёс, удмурт юмшанъёсысь кизилиос, огшоры венгер кылэз тодӥсьёс, но чик но тодмотэм удмуртъёс. 

Фильм бырем бере, вань люкаськемъёс мылысь-кыдысь чабизы. Тау каризы берыктӥсьёслы, нош соос тани кӧня кузя: Катя Ермакова, Марина Русаева, Ольга Евсеева, Алёна Петрова, Erika Asztalos, Дарали Лели, Настя Шумилова, Саша Егоров, Ольга Урасинова, Мадьяр Кабинет, Berykton Lud.   

Учкисьёс (original http://instagram.com/p/e4vrCZkDgO/

 

Иван Белослудцев, тодмо удмурт кырӟась: 

"Кино мыным туж яраз. Нырысь малпасько вал, ӧжыт учко но кошко. Но собере удмурт субтитръёсын фильм учкыны тунсыко потӥз, кинолэн сюжетэз но яраз. Яратӥсько та выллем киноосты." 

 

Даша Байкузина, Удмурт филологи факультет, магистратура:   

"Нырысь ик, мыным кельше спорт, ачим соин уг ке но выриськы (серекъя). Мыным котьку тунсыко, маин уло спортсменъёс, кызьы соос дышетско. Нош та фильм ӵапак со сярысь! Кыӵе шуген сётӥське спорт, медаль, улон... Мыным кельшиз, со зэмос спортсменлэн улонэз сярысь шуыса. Субтитръёсын сётэм берыктон валамон вал, кутсконаз гинэ кык валантэм кыл сюриз, кудъёссэ мон уг ни тодӥськы. Но урод вал соиз, субтитръёс укыр чаляк потылӥзы-ышылӥзы шуыса, мон ваньзэ лад-лад лыдӟыса ӧй вутты." 

 

Марина Широбокова, Удмурт филологи факультет, англи кылэз умой тодэ:   

"Та фильм сыӵе фильмъёс пӧлы пыре, кудъёсыз бурдъяло. Ваньмыз сяська-масяськатэк возьматэмын. Адями, аслэсьтыз сюрессэ шедьтон азьын, котьку но шуг-секытъёс пыр ортче, со понна котькӧня ар мед кошкоз. Шуг-секытъёс пыр гинэ солы адямилык пыӵа. 
Субтитръёс но умоесь вал. Кытын англи кыл чузъяськиз, созэ мон субтитръёстэк валай." 

 

Алина Антонова, тодмо удмурт кырӟась, мадьяр кылэз тодэ:  

"Фильм мыным туж кельшиз. Мон сое кыкетӥзэ учки ни. Нырысьсэ чылкак мадьяр кылын гинэ учки вал. Нош али эшшо но тунсыкогес потӥз, удмурт субтитръёс киноез эшшо мургес валаны юрттӥзы." 

 

Маша Векшина, удмурт блогер, журналист:  

"Мукет калыкъёслэн лулчеберетсы пыр шӧдӥськод соослэсь менталитетсэс но малпаськон амалзэс. Кылем арын мон "Берыктон лудэн" берыктэм киноез учкыны ветлӥ ни вал. Соиз вал швед, нош таиз мадьяр. Кыкысьтыз но кыӵе ке одӥг шӧмзэ валай, куд-ог мерлыко группаослэн мукетъёсызлэсь кужмогес луэмзы-а мар-а, шуод. Тодмотэм но мурт дуннеез усьтыны туж тунсыко. Мыным со туж кельше.
Субтитръёс пумысен ке, кино туала удмурт кылэ берыктэмын вал. Пӧлаз огшоры вераськон кыл но кутэмын. Укыр туала-а, мар-а, шуод.
Тау "Берыктон лудлы" та ӝыт понна." 

 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын