Француз кинофестиваль

4-10-тӥ толсуре "Дружба" киновозьматонниын француз кинофестиваль ортчоз. Фестивальын ӟуч субтитръёсын учкыны луоз со фильмъёсты, кудъёссэ Россиын азьло ӧз на возьматъялэ. 

Таӵе фестивалез Ижкарын котькуд ар радъяло Ижкарысь киноклуб, Францилэн посольствоез но Мускоысь Француз Институт. Туэ фестивальын 7 кино возьматэмын луоз. 
Билетъёсты али ик «Дружба» киновозьматонниысь басьтыны быгатӥськоды. Кино возьматон нуналлэсь азьло басьтэм билет 150 манет сылэ, кино возьматон нуналэ - 200 манет. Сизьымаз ик киное мынэмды потэ ке, 700 манетэн билет басьтэмды луэ. 

Вакчияк тодматӥськом котькуд кинолэн пуштросэныз. 

 

4-тӥ толсур, покчиарня 
ВИЛЛА АМАЛИЯ / VILLA AMALIA 
18+

Франция — Швейцария, 2009-тӥ ар, 94 минут
Кинопуктӥсь: Бенуа Жако 
Шудӥсь муртъёс: Изабель Юппер, Жан-Юг Англад, Ксавье Бовуа но мк. 


 Анн — пианиноен шудӥсь. Куке со тодэ картэзлэн паллянэ кожамез сярысь, со шуак улонзэ воштоно кариське. Картсэ куштэ, улон интызэ вуза, концертъёссэ воштэ, пластинкаоссэ сутэ, пелепонзэ сэрпалтэ но ыше... Фильм возьматэ, кыӵе кышкытэн сётӥське улонэз воштыны дӥсьтон, куке тыныд 35-лэсь тросгес ни... 



5-тӥ толсур, удмуртарня 
ЛИНИИ ВЕЛЛИНГТОНА / LIGNES DE WELLINGTON


Франция-Португалия, 2012-тӥ ар, 151 минут 
Кинопуктӥсь: Валерия Сармиенто
Шудӥсь муртъёс: Нуну Лопес, Сорая Чавес, Мариса Паредес, Джон Малкович но мк. 



1810-тӥ ар. Наполеонлэн ожгарчиосыз Португалиез киултыны выро. Британ но португал ожгарчиос соослы келяло ке но, бервылазы сутэм музъемъёсты гинэ кельто. Граждан калык ожгарчиос сьӧры мыноно луэ. Фильм возьматэ, кызьы ож огазея пӧртэм адямиосты — граждан калыкез но ожгарчиосты, кышномуртъёсты но воргоронъёсты, егитъёсты но мӧйыосты. 



6-тӥ толсур, кӧснунал 
ПРОЩАЙ, БЕРТА, ИЛИ ПОХОРОНЫ БАБУШКИ / ADIEU BERTHE - L'ENTERREMENT DE MÉMÉ 

Франция, 2012-тӥ ар, 100 минут
Кинопуктӥсь: Брюно Подалидес
Шудӥсь муртъёс: Дени Подалидес, Валери Лемерсье, Изабель Канделье но мк. 



Берта кулӥз. Со ӧвӧл ни. Арман шер сюлмаськылӥз песянаез понна... Со ужа эмъюмниын, кышноеныз ӵош улэ Шатуын. Ваньзылэсь лушкем со дася кузьым нылызлы... кудӥныз кушлаське. Мар татын каре песянай? Мае быръёно? Музъеме ватонэз яке сутонэз? Кин вал Берта? Фильм возьматэ огшоры француз улонысь аспӧртэм макеосты. 



7-тӥ толсур, арнянунал 
КОТ РАВВИНА / LE CHAT DU RABBIN 

Франция, 2011-тӥ ар, 100 минут
Кинопуктӥсь: Антуан Делево, Жоанн Сафар
Шудӥсь муртъёс: Матье Амальрик, Франсуа Дамиенс, Хафсия Херци 


 

Алжир, 20-тӥ аръёс. Раввин Сафар улэ нылыныз, черекъясь попугаеныз но укыр визьмо Коӵышеныз. Огпол со Коӵышез попугайзэс сие но... вераськыны кутске! Коӵыш шӧдэ еврей выжыысь потэмзэ но быдэ вуон сям-йылолэз ортчемез потэ. Татысен ик кутске ваньмыз тунсыкоез... 


 

8-тӥ толсур, вордӥськон 
ДОМ РАДИО / LA MAISON DE LA RADIO 

Франция-Япония, 2013-тӥ ар, 99 минут 
Кинопуктӥсь: Николя Филибер 
Шудӥсь муртъёс: Луи-До де Ланкесэ, Кьяра Казелли, Элис де Ланкесэ, Элис Готье но мк. 


 

Фильм радиостанцилэсь лушкем улонзэ возьматэ. Ваньзэ сое, мае ми адӟыны ум быгатӥське. 


 

9-тӥ толсур, пуксён 
ОБЫКНОВЕННАЯ КАЗНЬ / UNE ÉXÉCUTION ORDINAIRE 

Франция, 2009-тӥ ар, 105 минут
Кинопуктӥсь: Марк Дюген
Шудӥсь муртъёс: Андре Дюссолье, Марина Хэндс, Эдуард Баэр, Дени Подалидес но мк. 


 

1952-тӥ ар. Сӥзьыл. Егит кышномурт-эмчиез, кудӥз Мусколэн огаз эмъюртаз ужа, Сталинэз эмъяны ӧтё. Сталинлэн киосаз кышномурт шудонлы пӧрме. 


 

10-тӥ толсур, вирнунал 
БАСНИ ЛАФОНТЕНА / FABLES DE LA FONTAINE 

Франция, 2006-тӥ ар, 98 минут
Кинопуктӥсь: Дон Кент
Шудӥсь муртъёс: Кристин Ферсен, Эрик Женовезе, Кристиан Бланк но мк.
 

Лафонтенлэн басняосыз дунне литератураын бадӟым инты басьто. Ас вакытаз Лафонтен дорын ӟуч кылын басняос гожъясь И.А. Крылов дышетскиз. Лафонтенлэн 19 басняез нырысьсэ Комеди Франсезлэн сцена вылаз 2004-тӥ арын пуктэмын вал. Фильмын отысь кадръёс возьматэмын. 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын