Удмуртлыклэн улон кужмыз

Туннэ 19:00 Удмурт театрысь "Перепечкин" кафеын эстон кылбурчилэн Индрек Коффлэн «Удмуртлыклэн улон кужмыз» книгаезлэн презентациез ортчоз. Ужрадэз нуоз Муш Нади (Надежда Пчеловодова), кудӥз та книгаез удмурт кылэ берыктӥз. 

"Ваньмон дыр" выль книгалэн ог люкетэныз тодмасткыны дэмла.
Нош книгаез басьтыны луоз "Инвожо" журналлэн редакцияз. 

 

***  

индрек кофф

удмуртлыклэн улон кужмыз сярысь

истерия трактат

 

сӥземын

перепечлы

табаньлы

ӝожонлы

но

пельняньлы

 

 

талэсь умой дыръёс но вал

одӥг чаркалэсь воргорон кудӟем-а

татын гипсокартон луоз

ярам уске

чай яке кофе

мон ведь огшоры адями

ужлэсь мон уг кышкаськы

выльзэгес машина учконо вал ни, таиныз кытчы потод на

мотри эн пунэмаськы ява

кионлэн парсьёсыз со

мускоысь мычем ки

пон кисыяд со уксёдэ

пӧсь ужан дыр

осто сурттӥз эке кулса усисько ни вал

кыдбертэм

инмаре, адӟиськод дыр но, кызьы уд ӵашйиськы меда

…..

Мон уг тодӥськы, оло нош со озьы ик луыны кулэ, оло нош со озьы нормально, историк шуысал, вылды: абсолютно котькудӥзлэн калыклэн озьы ик батыръёссы быдтылэмын, еврейёс но индианъёс мукет калыкъёслэсь пӧртэмесь ӧвӧл, удмуртъёслэн но озьы ик, но... Уг тодӥськы, котьмар шуэ, но кӧшкемыт потэ, валантэм потэ ваньмыз, малпаськоно ке та сярысь. Граждан ож, отечественной война, сютэм аръёс, репрессиос, кӧня пол музъем вылысь ӵушем кадь быремын, но кызьы ке но соос выльысь вордско, улэп кылё, пыд йылазы султо. Шуом дасмоссэ удмуртъёсты виылыса быдтӥзы яке олокытчы келязы но берен ӧз вае. Ну, одӥг-дасмос шуид ке, со трос ӧвӧл кадь, озьы-а. Нош огзэ чиньыдэ вандӥзы ке? Азьчиньыдэ. Бур киысьтыд азьчиньыдэ. Кыӵе потоз меда? Но кызьы шуо: шунды выллань, нунал азьлань. Адямилы котьку но туж кужмо луоно,  адямилы, пе, чидано, чидан, пе, чигымтэ... Соку луысал-а меда тани тазьы... Басьтом, кылсярысь, гуртысь кышномуртэ ик, кудӥз нунокезлы магазинысь ӵем пинё сын басьтыны уг лэзьы, шуэ: мар малпалоз гурт калык, таос тэйӟиллям шуозы ук. Тӥни самой со кышномурт шӧдтэк шорысь, пе, воштӥське но батыр кадь луэ... Луоз-а озьы, сое сыӵе улонэ улыны интыяд ке, кытын огшоры улэп кылёно но улоно? Яке мон уг тодӥськы, ваньмы сюлмаськимы ук, ну ваньмы ик ӧм но, тросэз ми бӧрдӥмы ук армиысь гробын ваем гурт пияш сярысь газетысь лыдӟыса, гурт калыклэсь вераськемзэс кылыса, озьы ук. Ваньмылэн пиосмы, агай-вынъёсмы вань, нокин уг тоды, соос армие кошкыса улэпкын, ну ярам, шуом, сӧсырмытэк бертозы-а... И озьы но ми огмылы огмы вожъяськыса, кыл вӧлдыса улӥськомы, тодмоосмылэсь, ма соослэсь гинэ ке луысал, матысь эшмылэсь коньдонзэ чотаса улӥськом, бускельмылэсь лушкаськиськом: „кытысь меда соос уксё потто, сокем ӟеч уло...“, „адӟы али, кыӵе машинаен берпалзэ нуллэ, аслаз ке липэтэз пыртӥз вия...“ Яке уг тодӥськы, шуом ог-огдэ быдтон, репрессие лэзисьёс но мукетъёсыз, пегаса улӥсьёс, куд-огез вуиз созэ но, тазэ но лэсьтыса: кудӥзлы юрттӥз, кудзэ репрессие келяз. Куд-огез оло малпаз дыр, тазьы лэсьтыса со ассэ утёз, аслыз умой улон луоз. Берло соос ваньзы ӵош улоно луизы, - конечно, кин улэп кылиз на - артэ, кӧснунал ӝыт ваньзы огсямен мунчое ветлӥзы, чылкыт дӥсь дӥсязы... Уллань, выллань, уллань, выллань. Со понна йырвандӥсь но, яке эшшо кыӵе ке бандит но луоно ӧвӧл, сюлэмыд косэмъя ке...

Огшоры, компрмисс шедьтӥськод, кинлы ке но ӧжыт сӥть суралтӥськод, мукетыз чотын аслыд пайда поттӥськод, уго тыныд лэземын, тыныд озьы яра. Собере номыр луымтэ кадь калыкен ӵош, валче мынӥськоды семьяен, нылпиосын нунокъёсын водный центре, гумыысь уллань ширтыса васькиськод, умой ук. Вунэтӥськод, мар тон дауртӥд вал. Туж капчиен астэ шонере поттӥськод, котьку сямен озьы. Котькыӵе но дэриысь саптаськытэк потӥськод, малы ке шуоно шунды выллань, нунал азьлань, озьы ук. Кыӵе ке но психологъёс эскеризы: калыкез кыклы люкизы, ваньзылы кино возьматӥзы, но ӝыныезлы косӥзы йырзэс мыкыръяны, ӝыныезлы – буре-паллянэ сэзъяны. И конечно, бӧрысь йырзэс мыкыръясьёс соглаш луылӥзы, сэзъясьёсыз – пумит. Адями со, огъяса верано ке, сыӵе йыр мыкыръясь тип, аслыз кулэ луыку – зол мыкыръяны но дась.

Уг тодӥськы, уг валаськы, мон малпасько, нокин но умой уг вала и уз но вала, и кулэ но ӧвӧл валаны, кызьы со озьы луэ, .... Но учкы ай, со озьы ук...

 

давай берпалдэ ӝут но ойдо кошким

со уз куртчы, татчыозь со нокинэ но ӧз куртчы на

ма быгатом ми, одно быгатом

гур вылын куасьтӥськод, толалтэ сиыны умой

аслэсьтыд нылпидэ кадь дышеты

ваньзэ озьы но тазьы ужамзэ выльысь лэсьтомы, рос-прос

кофе яке чай

маржаса кыллиськод татын

нырысь нуыны уг луы, собере вордыны уг луы

кӧня арес вал солы, ньыльдон вал ни-а меда но, адӟид-а, сюлэмыз ӧз чида, мар карод

лешак, секыт ик та макмыр, инмаре

мае но адӟоно уг луо та улонэз адӟем синъёсы

бадьпу со ноку но чебер ӧй вал, тыпы чебер со

йыры пильыськымон висе, сепаратор ужам кадь

мон сыӵе адями ӧвӧл

азе эн пыре, черодэ султэ шко

равняйсь смирно напрааа во

воксё ни ай, басьты та уксёдэ, бускелелы уксёен вузаса уг ул ни али, мын.

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын