Коньывуон: 12 валтӥсь ужрад

"Ваньмон дыр" бырйиз дас кыксэ тужгес но тузӥоссэ ужрадъёсты, кудъёсыз коньывуонэ ортчозы. 

 

«Bobya-Ucha contempo» адӟытон 

1-15-тӥ коньывуонэ "Галерея"-ын «Bobya-Ucha contempo» адӟытон ортчоз.  Адӟытонын «KAMA records» командалэн Пичи Пурга ёросысь Бобья-Уча гуртын лэсьтэм ужъёсыз возьматэмын луозы. 

Ар ӵоже та гуртэ вуылӥзы суредаськисьёс, крезьгурчиос но туспуктӥсьёс, кудъёсыз гурт калыкен пӧртэм проектъёс бордын ужазы. Та проектъёс гурт калыклэсь улонзэ умоятон понна лэсьтэмын вал, тужгес но соослэсь, кин огназ яке пересьёслэн юртазы улэ. 

 

 

Showcase #3 дизайн-базар S-bar 

3-тӥ коньывуонэ 19:00 часын S-barын куинетӥзэ шоукейс-фестиваль ортчоз ни. Ас киынызы лэсьтэм арбериосты, дӥсьёсты, туспуктэмъёсты вузалозы Servant, Диана Нуриева, Надежда Сапожникова, Татьяна Пирожниченко, Лавка чудес, Букводел, Photocards, Dve Golovi, Кумышка shop, 312 bags.

Быдэс ӝыт чузъяськоз чебер крезьгур но пӧзёз немец рецептъя дасям глинтвейн. 

Пыронэз дунтэк.  

 

Эктоника: выль сезон 

4-тӥ коньывуонэ 22:00 часын "Мынам Удмуртие" радиоын (100.1 Fm) "Эктоника" программалэн выль сезонэз кутскоз.
Та ужрадэ доразы пукисьёс но вуыны быгато, со понна радиоез гинэ ӝуатоно.

Выль сезонэ "Эктоникаын" - выль пуштрос, выль ремиксъёс но меӵак эфирын трос кизилиос!  

 

КиноӜыт Перепечкинын 

 9-тӥ коньывуонэ 20:30 часын "Перепечкин" кафеын "КиноӜыт" луоз. Женя Бикузин но Сергей Максимов "КУ! Кин-дза-дза" мультфильмез возьматозы. 

Таӵе ӝытъёс табере котькуд пуксёнэ ортчылозы, пе. Котькудаз юри ӧтем куно аслэсьтыз яратоно мультфильмзэ, кинозэ сьӧраз ваёз но, перепеч сиёнъяз, лыктэмъёсын ӵош сое учкоз. 

Пыронэз дунтэк 

 

"Палэзян" калыккуспо финн-угор фестиваль 

15-тӥ коньывуонэ 19:00 часын "Интегралын" "Палэзян" фестивальлэн гала-концертэз ортчоз. Кырӟалозы но эктозы Удмуртиысь, Венгриысь, Эстониысь, Суомиысь, Марий Элысь, Юграысь, Мускоысь вуэм финн-угор куноос.  

Билетлэн дуныз: 150-200 манет 

 

 

KALLENOM #2 udm hype кырӟан / видео / арт

15-тӥ коньывуонэ 21:00 часын "Бар Весёлых Историй" клубын KALLENOM #2 фестиваль ортчоз. 

21:00
dj Batuev Zhenyi

LIVE:
Kенjали & Mademoiselle Oudmourte
Саша Ашихмин
ПШНR & IS'NR feat. Берекет
new!
Мурӝол Underground (aka Ullapalla Boy)
Personal Ashalchi
SHOODJA-CHOODJA (Муско)
MINNA RASKINEN (Суоми)

dj Darali: LAD-LAD mix
dj G.I.M

vj Poseydon

ART:
Чимали
Тусӧа
Photocards & Ikonamag 

Озьы ик "Кумышка" удмурт лавка! 

Билетлэн дуныз: 100 манет, 23:00 бере - 150 манет. 

 

"Оломарно" театрально-крезьгуро ӝыт   

17-тӥ коньывуонэ 21:00 часын "Пепелац" клубын "Оломарно" театрально-крезьгуро ӝыт ортчоз. Та ужрад удмурт пати азьын луоз. 

Театр: 
Марина Сергеевалэн (http://udmurto4ka.blogspot.ru/) но Мария Векшиналэн (http://marjamoll.blogspot.ru) блогъёсысьтызы чуръёсъя монологъёсты но диалогъёсты Йӧскалык театрысь артистъёс, Надя Наговицына но Наташа Алексеева, лыдӟозы. 

Крезьгур:
"Гаруда" но "Амисо Вотт" гурт-кар удмурт кырӟанъёсты быдэстозы. 

Билетлэн дуныз: 100 манет. 

 

"Мылысь-кыдысь" сӥзьыл бал 

19-тӥ коньывуонэ 16:00 часын "Аксионын" "Мылысь-кыдысь" сӥзьыл бал ортчоз. Ӝытэз нуозы Анна Федотова но Валерий Сидоров. 

Кырӟалозы Анна Плотникова, Геннадий Ганьков, Геннадий Кузнецов, Александр Катков, Татьяна Ишматова, Михаил Ворончихин, Надежда Уткина, 5 Сергейёс но мукет. 

 

"Ижевск*ДА" адӟытон 

22-тӥ коньывуонэ 19:00 часын "Галерея"-ын "Ижевск*Да" адӟытон ортчоз. 25 ар талэсь азьло Ижкарын вал ни та выллем авангард искусствоя "ДА" нимо адӟытон.

Таязаз пыриськозы Сергей Орлов, Энвиль Касимов, Анфим Ханыков, Алексей Чернышов, Зоя Лебедева, Игорь Снигирев, Татьяна Зыкова, Павел Аксенов, Роман Постников, Владимир Ковычев, Людмила Орлова, Александр Пилин, Александр Элмар но мк. 

 

"Ослоп" спектакль  

25-26-тӥ коньывуонэ Удмурт театрлэн 83-тӥ сезонэз усьтӥськоз. Та нуналъёсы театрын Д. Фонвизинлэн "Ослоп" пьесаезъя спектаклез возьматозы. 

Спектаклез пуктӥз Россиысь дано артист Д. Кознов. Шудозы Мускоысь Щепкин нимо театр училищеез йылпумъям артистъёс. 

 

"Выль куара" крезьгуро шоу-проект 

26-тӥ коньывуонэ 17:00 часын «Шулдыр ӝыт» ансамбль усьтэ выль сезонзэ но кузьма учкисьёслы «ВЫЛЬ КУАРА» крезьгуро шоу-проектсэ!

Та ӝытэ мылкыддэс ӝутӥсь кырӟанъёссэс тӥледлы кузьмалозы яратоно артистъёсты но "выль куараос"!

10 егит кырӟасьёс, кудъёсызлы быгатонлыкъёссэс муромытыны юртто «Шулдыр ӝыт» ансамбльысь 10 кизилиос-дышетӥсьёс, нюръяськозы элькунмылэн тужгес но чеберез выль куараез луон понна! 

Крезьгуро сюрпризъёс, выль кырӟанъёс, паймымон номеръёс!

Билетлэн дуныз: 120 - 430 манет

 

"Валентин Стрыкалолэн" концертэз  

30-тӥ коньывуонэ 19:00 часын "Бар Весёлых Историй" клубын "Валентин Стрыкалолэн" концертэз ортчоз. 

"Валентин Стрыкало" - Киевысь серекъяны яратӥсь усто крезьгурчиослэсь пӧрмем группа. Пияшъёс Ижкаре нырысьсэ лыкто. Ӝыт куспын соос егитъёслы кельшись кырӟанъёссэс быдэстозы но кыкетӥ альбоменызы тодматозы, со потэмын но ӧвӧл ай ке но. 

Группаез кылдытӥз Юрий Каплан. Ассэ Валентин Стрыкало нимаса, со гожтылӥз серемес кырӟанъёсты но поттылӥз соосты вотэсэ. Тодмо луэмез бере, "Валентин Стрыкало" нимын ик группа кылдытӥз. Али "Валентин Стрыкало" - рос-прос рок-группа, кудӥз серемес кырӟанъёсты сяна, сюлме пырись балладаосты быдэсъя. 

Удмуртъёсты Валентин Стрыкалолэн кырӟанъёсыныз тодмо удмурт кырӟась Иван Белослудцев тодматӥз. 

Билетлэн дуныз: 800 - 900 манет. 

 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын