Выль Арлы сӥзем концертъёс

Туэ Выль арлы сӥзем удмурт концертъёслэн лыдзы, кылем аръёсын ӵошатыса, уногес. Тазьы учкыса, ваньмаз ик мынэм потэ кадь. Яркыт но чебер афишаос но гочато ук, гочато! Серемез поттэ но куректытэ мукетыз... Маиз? Ойдолэ ӵош эскером! 

Кырӟанъёс но саламъёс 

24-тӥ толсуре 19:00 часын «Металлургын» Выль арлы сӥзем «Кырӟанъёс но саламъёс» концерт ортчоз. Та концертэ билетъёс ӧвӧл ни кадь.

Ойдолэ учком, кыӵе анонс сёто солы концертэз радъясьёс: 

 
Улон мынэ азьлань. 

Нуналэз воштэ нунал, арня бӧрсьы мукетыз арня мынэ, орчто толэзьес, аръес, дауръес... Ми ум но валаське, яке ум но тыршиське валанаы улонлэсь сокем жог азьлань мынэмзэ.

Но кызьы тон сое эн кут - со мынэ азьлань. Воштӥське котырысьтымы улон, воштӥсько эшъёс. Одӥгъесыз лыкто, мукетъесыз кошко, нош кин ке но пыраклы кыле возамы...

Аръёс но дауръес шоры учкытэк...
соос котькудзы уло сюлэмъесамы...
КЫРӞАНЪЁСЫН НО САЛАМЪЁСЫН ӴОШ!

Концертэ пырисько:
Брангурт песянайес, 
Геннадий Бекманов, 
Николай Анисимов, 
Алёна Тимерханова, 
Анна Плотникова, 
Анатолий Эркишев,
Ансамбль Тулкым (Элькуновидение 2014),
Ансамбль Ялыке,
Ансамбль Зарни шеп
Ladi Sveti,
Алина Антонова,
Иван Котельников, 
Влад Андреев, Андрей Конышев, 
Богдан Анфиногенов (Ullapalla Boy), 
Иван Белослудцев, 
Настя Иванова. 

Ӝытэз нуо Вероника Ваулина но Петр Пушкин, Полина Келарева но Женя Баранов 

 

Ми дас пол но лыдӟим ни та гожтэмез но нокызьы ӧм валалэ, кызьы герӟаськемын улонлэн азьлань мынэмез сярысь зырымесь кык-куинь абзац но концертлэн нимыз. Но кызьы ваньмыз та шуак Выль арлы сӥзем концертлы пӧрмиз? 

Ярам, «Свежий воздухен» радъям (нош ми малпам вал, тае «Эктоника» радъя) та концертлэсь нимзэ ми пал синмы пыр гинэ лэзьыны тыршим, малпамы, ум тэргаське. Но шуак адӟим, таиз бере мукет нуналаз ик та огазеяськон ик выль концерт радъя шуыса. Нош нимыз солэн... 

 

Айкай! Брангурт песянайёс! Эктоника! 

25-тӥ толсуре 19:00 часын «Металлургын» ик «Айкай! Брангурт песянайёс! Эктоника!» концерт ортчоз. Билетъёсты татысь басьтыны луэ. Концертлы таӵе анонс сётӥське: 

25-тӥ толсуре 19.00 ДК Металлург

АЙКАЙ! БРАНГУРТ ПЕСЯНАЙЁС! ЕРПЕЧКАОС!! ЭКТОНИКА! ВЫЛЬ АР!

а также:
Алена Тимерханова
Иван Котельников
Николай Анисимов
Настя Иванова
Света Ручкина
Денис Чирков и др.

Туала но вашкала кырӟанъёс но эктонъёс выль арлы сӥзем концертын.

Чале, Эшъёс!

 

Концертлэн оломакузьда нимыз бакомытэ. Концертэз радъясьёс, тӥ коть малпаськиды-а, кызьы адямиос кулэ ог-огзылы вераны, кыӵе концертэ соос мыно яке малпало мыныны. 

— Кыӵе концертэ мынод, шуиськод? 
— Ну Айкай!... Брангурт песянайёс... Кызьы ке озьы нимаське вал кадь. 
— Ӧй вала мон тонэ. 
— Ну... кудӥз 25-тӥ числое ортчоз... 

Нош мар та концертын луоз? Ми валаськомы, та концерт туж усто луыны кулэ кадь шуыса, но сыӵе «узыр» но «гочатӥсь» анонстэс адӟем бере... 24-тӥ толсурлы билетъёслэн туж чаляк октӥськыса быремзы «Свежий воздухез» сокем шумпоттӥз, лэся, тазэ концертсэс сюлэмшугъяськытэк лэсьто ни. Пырик калык лыктоз, оведь? Но такем шузи нимын но анонсэн концертэз милям кемалась адӟеммы ни кадь... 

 

Выль ар тулкымъёс вылтӥ 

25-тӥ но 26-тӥ толсуре 18:30 часын Филармониын «Выль ар тулкымъёс вылтӥ» концерт ортчоз. Анонсын гожтэмын: 

 
"ШУЛДЫР ӜЫТ" ансамбль ӧте гажано эшъёссэ пумитаны Выль арез чебермам корабльын но ортчыны паймымон зарезез яратоно крезьгур тулкымъёс вылтӥ!

Тӥледыз вите бадӟым шулдыръяськон: выль кырӟанъёс но тусъёс, шӧртчи ӵошатсконъёс но маскара шудонъёс, арганэн эктонъёс но кузьымъёс. «Шулдыр ӝыт» ансамблен ӵош тӥлесьтыд мылкыддэс ӝутозы «Выль куара-2014» проектлэн тужгес но усто егит кырӟасьёсыз.
Концерт бере – ВЫЛЬ АР ДИСКОТЕКА* артистъёсын ӵош! 

Кырӟанъёсын но эктонъёсын вамыштомы Выль 2015 аре!

Ваньмыз умой кадь, но малы анонсын уг сётӥсько кырӟасьёслэн нимъёссы? Сомында ар ӵоже ужаса, «Шулдыр ӝыт» пиарлэсь куронъёссэ тодыны но валаны кулэ ни кадь. Уката ик, куке та нуналъёсы ик театрын но, «Металлургын» но мукетъёсыз Выль арлы сӥзем удмурт концертъёс ортчозы ке. Нош узыр удмурт кылын анонсты понна котьку сямен +5! 

 

Дэмен Выль арен

24-тӥ, 25-тӥ, 26-тӥ, 27-тӥ но 28-тӥ толсуре 18:00 часын Удмурт театрын котьку сямен «Дэмен Выль арен» театрализованной концерт ортчоз. 

Таиз концерт сярысь вераны но номыр. Театрлэн «ВКонтактеысь» огиназ потылӥз ик та афиша. Тырмиз. Берло нокыӵе иворъёс ӧй вал ни. Театрлэн вотэсбамаз но та концертъёс сярысь номыр уд шедьты. Чус... А, бен, «Удмурт дунне» газетлэн бамъёсаз та афиша озьы ик мальдылӥз, лэся. 

Малпан кылдэ, Удмурт театр нокыӵе конкуренцилэсь уг кышка. Ма соиз но валамон, кӧня ар ӵоже ни театр вошъяськисьтэм «Дэмен Выль арен» нимын концертъёсты радъя. Толсур вуэ ке, калыклэн тодаз та концерт ачиз лыктэ, дыр. Нокыӵе реклама кулэ ӧвӧл. Озьы-а мар-а? 

 

Йылпумъян интые ми шуысалмы: концертъёсты радъясьёс удмурт кылын афиша лэсьтыны дышизы ни кадь, табере оло анонсъёс бордын ужано, а?

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын