Айшет будущего

Кылем арняе тодмо удмурт кылбурчилэн но кырӟасьлэн Богдан Анфиногеновлэн нырысетӥ кылбур бичетэз потӥз. Бичетэн тодматскон туннэ (23-тӥ толсуре) 19:00 часын «Сахар» арт-интыын ортчоз. Нош али дэмласьком лыдӟыны Богданэн интервьюез, кудзэ шуркынмонэ ай лэсьтӥз милям корреспондентмы Елизавета Шихова. 

- Богдан, нырысь ик тодэм потэ вал, кӧня арескысен тон кутскид кылбураны но мар тонэ бурдъяз нырысетӥ кылбурдэ гожтыны? 

- Ӟуч кылын кылбураны мон 9 аресысен кутски. Нырысетӥ кылбурме гожтыны монэ Александр Блоклэн «Ночь, улица, фонарь, аптека…» нимо кылбурез бурдъяз. Сое  кылыса, мынам но потӥз мар ке но со выллем гожтэм.  

- Нош кызьы ӟуч кылбуръёс гожъясь адями удмурт кылбуръёс гожъяны кутскиз? 

- Монэ бурдъязы асьсэос удмурт кылъёс. Со кылъёс, кудъёсыз мыным чузъяськемзыя кельшо вал. 2008-тӥ арын мон, удмурт кылъёсты пыртыса, нырысетӥ кылбурме гожтӥ. Соку мыным 18 арес вал. 

- Вань-а ӟуч кылбурчиос пӧлын сыӵеосыз, кинъёслэсь учкем кариськод? 

- Мыным кельше Маяковский но огъя ХХ-тӥ даурлэн нырысетӥ люкетысьтыз ӟуч поэтической авангард.

- Нош удмуртъёсыз пӧлысь кинэ пусйысалыд?

- Удмурт кылбурасьёс пӧлысь Арзами Очеез, Дарали Лелиез но Ксения Евсееваез висъясал. Нош азьло мыным туж кельше вал Даниил Яшинлэн кылбуранэз. Та дырлы туж тунсыко потыса 50-60-тӥ аръёсысь вуж советской поэтической сборникъёсты лыдӟисько.

- «ВКонтактеын» тон «Удмурт кылбурчи» нимо огинэз нуиськод. Та дырлы отын сюрслэсь ятыр гожтӥськисез. Маин герӟаськемын вал та огинэз кылдытон?

- Кыӵе ке одӥг валтӥсь малпанэ мынам ӧй вал. Огшоры гинэ выль удмурт кылбурчиослэсь выль кылбуръёссэс лыдӟем потэ вал. Малы ке шуоно удмурт журналъёс, Гожъяськисьёслэн огазеяськонзы туала удмурт поэзиез вӧлмытон бордын уг ужало, соин ик туала егит кылбурчиослэсь ужъёссэс нокытысь лыдӟыны вал. 

- Нош «Ваньмон дыр» вотэсбамез басьтыны ке?

- «Ваньмон дыр» - со тросгес удмурт иворъёсты вӧлмытӥсь огин. Татын удмурт кылбуръёс ӧжытгес инты басьто но палэнэгес кылё. 

- Озьыен, али гинэ кылбураны кутскись егитъёс тыныд кылбуръёссэс келяло, нош тон соосты эскерытэк огинад поттӥськод яке кылбурчиос азе кыӵе ке куронъёс пуктӥськод? 

 - Мон кыӵе ке критик яке литературовед ӧвӧл. Мон малпамъя, удмурт кылын кылбурасьёс но кылбуръёс сотэк но туж ӧжыт, соин ик кулэ ӧвӧл соосты кыӵе ке чурыт рамкаосы пуктыны. Озьы ке но мынам вань таӵе куронэ: кылбур яке удмурт кылын, яке удмурт кылъёсын, яке удмуртлык сярысь луыны кулэ. Котькудӥз адями кылбурез лыдӟыса быгатэ яке «мыным кельше» зӥбыны, яке номыр зӥбытэк кельтыны, со ик луэ естественной быръён.

- Азьланяз уд малпаськы-а огинысь кылбуръёсты люканы но одӥг бичетэн поттыны?

- Малы? Со вотэс поэзия, со улэ вотэсын. Татын мон ачим ваньзэ тупатъясько но кылбур улэ тупась суред пуктӥсько. Кутсконысеныз пумозяз огнам. Бичет сярысь малпано ке,  кин редактор луоз? Уксётэк ужаны нокин соглаш уз луы. Вотэс соин но умой, татын тонэ нокин чакласа уг улы, шуом, кытын кылбурын запятоез пуктэмын, кытын ӧвӧл. Со ваньмыз формальность. 

- Ярам, мурт кылбуръёс сярысь вераськыны тырмоз. Ойдо тынад нырысетӥ бичетэд сярысь вераськом. 

- Кылбур бичетэ «Айшет будущего» нимаське. Малы озьы? Мынам вань таӵе нимын кылбуре. Озьы ик мыным аслым туж кельше та кылтэчет. Татчы пыризы мынам удмурт но ӟуч кылбуръёсы. Ӟуч кылбуръёсы мынам озьы ик удмуртлыкен герӟаськемын. Тиражез 100 экземпляр. Бичетын 176 бам. Куинез бичет йӧскалык лыдӟонюртысь архивъёсы кошкизы ни. Бичетлэн вылбамез бордын Вера Штыкова ужаз, корректор интыын Анастасия Шумилова вал. 

- Книга поттон дунтэм маке ӧвӧл. Тон ас кужыменыд книгадэ поттӥд, яке кин ке юрттӥз?

- Аслам кужыменым но, «Юмшан57»-лэн юрттэменыз но, #zemos_kylbur_veme – лэн уксё бичаменыз но.

- Огаз Удмурт пуксёнын, кудӥз «Современная удмуртская литература: who is who? От Михаила Федотова до Богдана Анфиногенова» нимаськиз, Алексей Арзамасов шуиз, кылбур бичетэд потӥз ке, со шумпотыса соя критика гожтоз. Таин сэрен тодэм потэ вал, мар тон ачид малпаськод критика сярысь, кулэ-а со яке кулэ ӧвӧл? 

- Одно ик кулэ! Критика пыр лыдӟись но умойгес валаны кутске, мар вань та произведениын, малы со озьы гожтэмын. Критика бере лыдӟисьлы но тунсыкогес потэ, дыр, выльысен лыдӟыны со ик кылбурез. Асме басьтоно ке, мон уг быгатӥськы кылзыны критикаез, тужгес но аслам гожтэм кылбуръёсыя. Но со дыре ик мон валасько солэсь кулэлыксэ, угось литератураын критика валтӥсь инты басьтэ.

- Та кылбур бичеттэ удмурт школаосы но ёрос лыдӟонюртъёсы лэзьыны малпаськод-а?

- Бен, туж потэ вылэм. Но жаляса верано, мон та дырлы уггес тодӥськы, кызьы со ваньмыз лэсьтӥське.

- Азьланяз малпаськод на ук, дыр, кылбуръёс гожъяны, выль бичет поттыны?

- Гожъяськыны малпасько, нош вылез бичет сярысь али веран уг быгатӥськы.

- Тау, Богдан, вераськыны дыр шедьтэмедлы. Эшшо огпол ӟечкыласько нырысетӥ кылбур бичетэныд. Но берпуметӥ юанэ таӵе луоз: зэмос кылбурчи кадь мар тон сӥзьысалыд еж кылбурчиослы? 

- Мон сӥзьысал гожъяны со сярысь, мар сярысь соослэн потэ, нокыӵе шаблонъёс шоры учкытэк. Мед гожъялозы тунсыко темаос сярысь, туалаез сярысь, со дыре ик кылбуръёссы сюлэмзылы но лулзылы тупась мед луоз. 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын