Маша Векшина

Удмурт кылбурчи - Маша Векшина, удмуртские стихи Маши Векшиной

Монэ будэтӥзы но узырмытӥзы дуно Пуро гуртэлэн (Пичи Пурга ёрос) ульчаосыз, улӥсьёсыз, инкуазезлэн аспӧртэмлыкъёсыз. Соин ик нырысетӥ кылбуръёсы сӥземын вордӥськем палъёсыным герӟаськем ужпумъёслы. Али дыре каллен «Уйвӧтъёс» кылбур бичет кылдытко, отысь кылбуръёсты улӥысьгес лыдӟыны быгаткоды. Татысь шедьтыны луэ ни лирической геройлэсь пушдуннезэ, сюлэмшугъяськонъёссэ, яратонзэ, йыркуръяськемзэ…
Мон малпамъя, кылбур дунне дас вить ӧсъёс сьӧры ватӥськыны кулэ. Озьыен тунсыкъяськись огзэ ӧсэз усьтыса, выль дуннее сюре, нош азяз нош ик выль ӧс кылдэ. Таиз сьӧрын нош ик мукет валан. Уг яраткы графоманъёсын кылдытэм кылбуретэз, малы ке шуоно сюлэм куре выль аспӧртэмлыко кыл сочетаниосты, малпанъёсты, образъёсты. Со утчан ик мыным кылбураны мылкыд кузьма. 
Али дырлы мон УдГУ-ысь журналистикая факультетын тодон-валанъёсме будэтко. Тэк пукыны сюлэм уг чида, соин ик отчы но татчы вуылко, тунсыко ужрадъёсы пыриськисько, блог нуисько.

 

***

Кутске ӵектос «Дась вить нунал»!

Уйшор азьын кошкон возьма,

Кытын мыным тодмо ӧвӧл

Сюлэм мӧзмон гуръёс токма. 

 

Таӵе тылпу потӥз  зорлэсь.

Кытын шапык - со малпанъёс,

Дуно шаер палась пегӟем

Инсьӧр пала аслобонъёс.

 

Но вань ужпум кутсконъёсын.

Котькуд нунал - мукет валан.

Нош уй узыр уйвӧтъёсын,

Кытын мон нош ик тӥ пӧлын.

 

***

Наверно, номыр но ӧз кыль милесьтым.

Музъемлэн сьӧд сюез сӥзьылэн куанерме.

Куарусён толэзьлэн кыдырась вуосыз

Мӧзмонлэсь мӧзмыто яратӥсь сюлэмме.

 

Наверно, ӧй вал тон мынам гажанэ.

Ведь тонэн луыса, мон огнам пукылӥ,

Оскыса, мед бинёд шуыса тон монэ

Пыраклы ас бордад, малпаськи. Оскылӥ.

 

Наверно, озьы вал кулэ луыны.

Я ужпум тон бордын, сьӧд сюлэм шуонын,

Я аслам сӥялскем шузигес мылкыды

Чик ӧз быгат юзмыт кезьыттэ вормыны.

 

Наверно, мон нош ик выё вӧтъёсам,

Кытын весь тулыслэн омырез узырме

Пальышась шундыен, улӥсез мылкыдам,

Но тынад учкемед синъёсме сутылэ.

 

***

Мон оски вал тыныд весяклы, мусое.

Тон саптад но наштад вӧтъёсме дерие,

Сю полэс омырын позыртӥд сюлэмме,

Осконэн сялӟыса, вамыштӥд азьлане,

Шуятӥд кезьытэн яратӥсь сюлэмме.

 

Но уг возькы бордам пачкатӥсь йыркурме.

Со лоба юг Манак пӧртмаськись нюлэскын,

Вордӥськем гуртэлэсь со ог куинь иськемын.

 

***

Сыӵе секыт мыным.

Али потэ усем

Отчы, кытын ӧвӧл

Сюе наштам ивор.

Мӧзмон зӥбе вылаз.

Эн пуксьы тон алаз

Солэн, кин вӧсь каре

Кияз сюрем сюлмез.

Инбам сьӧдмаз тустэ.

Вияд тон омыре.

Азяд нылъёс кошко,

Зарни вуэн шудо.

Шапык синмад сюре,

Сутэ, бышке, вандэ.

Юнме гинэ, юнме

Соин вал дыдыке.

 

***

Сюлэмы бублиен лобӟылэ инбаме

Кутыны сое уд быгат тон.

Шундыен мальдыса, берытске улӥе,

Но уг поты, уг поты! Мудрон.

 

Юалоз бен кин ке мынэсьтым малпанме, -

Потэмъя гинэ уг лу улон!

Утьыны тыршыса бурдъёсысь суредме,

Пегасько киослэсь весь. Мудрон.

 

Чеберен гочато ик азвесь сяськаос, -

Выйыны соос пӧлы  кышкыт.

Ичияз шутэтскон интыос кельшытко, -

Бичаны мользэ ке но шурдыт.

 

***

Черк азьысь лымыысь ишкалтса,

Уг, уг кушты кынмем сяськаме.

Шуяса , паньгаса, котмыса,

Со быриз ни сюлмад, мусое.

 

Кезьытын тылъёсын чиляса,

Кылльысал мед али но отын.

Тулыслэсь шокамзэ шӧдыса,

Пушйысал ай, дыр, со омырын.

 

Юг сяська мылкыдъёс уйвӧтэ

Калленак одӥген лобӟизы.

Мамыкъёс но выльысь черк азе,

Шобретэн бергаса усизы.

 

***

Та мынам огшоры ортчымтэ улонэ!

Матэктӥз мугоры  дас тямыс аресам,

Буясько яркытэсь суосын ымнырме, -

Мон ӧвӧл тӥледын зымемын зарезям.

 

Та мынам огшоры зынмымтэ инбаме!

Кытын ӵош керттылэм толэзъёс пиштыло,

Суредам калыклы кузьмасько йырсиме, - 

Табере соосты монэным сурало.

 

Та мынам огшоры пушйымтэ музъеме!

Домино кырӟамъя гудылком каръёсты,

Кытысь тон берпумзэ адӟылод сюлэмме,

Но сётод жаляса пыраклы согыны.

 

Та мынам огшоры ортчымтэ улонэ!

Вала тон! чик ӧвӧл ведь ваньмыз огшоры - 

Зынмымтэ инбаме, пушйымтэ музъеме

Сётӥсько быдэсак дас тямыс ареслы.

 

***

Пушкад кысӥз ни ке сутӥсь гизьы,

Нош синъёсад сайказ ке сьӧд мылкыд;

Вӧсь каремысь тонэ ке дугдӥзы

Мынам венен бышкась вамышъёсы;

Урмон тусме герӟаз ке мынэсьтым

Тынад кыдам кезьыт сюлэменыд;

Но ӵыжамед лыч сузьмытозь монэ

Шуак потӥз ке огдырлы гинэ;

Борддор шоры кырмем мыжыкеныд

Кутскид ке мыжганы вань кужмысьтыд, -

Мынам сюлмы учкоз палэнысен

Тынад гомась ӵыно лулыд шоры. 

 

***

Сюлэмам - ворпо нумыр,

Малпанъёс нош тон сярысь.

Котырам - ческыт омыр,

Юисько курыт вуысь.

 

Валантэм али мыным

Коктейльлэн сутӥсь шӧмыз, -

Уясько соин тани,

Шумпотса, курыт вутӥ...

 

Нуналъёс бызьса возтӥ

Кошкыло, но кытчы тӥ?

Шузимем йырам тон, не,

Эн кельты курыт вуэ!

 

Бергаса котыр дунне,

Выйтыны лэся турттэ.

Яратон ӝоген нуэ

Тулкымен курыт вуэ.

 

Шулдырен ӵошен монэ

Со ньылӥз, быдтӥз визьме.

Нылпиез таре солэн

Жалясьтэм курыт вулэн.

 

***

Сюлэмлы валаны кылдымтэ на шӧмзэ

Яратӥсь лулэным пӧрмытэм емышлэсь.

Я тузӥ, я таза, я чебер но мусо;

Виштыос шӧтэмгес мугорзэ я каро?

 

Но малы сюлэме учкиськод вылтуссэ

Котькинлы ческытгес емышлэн пушкесыз

Я ческыт со, курыт, я гольтрес яке чырс,

Аръёсын кужмоясь мульыез -а чурыт?

 

Зэм, шӧмзэ емышлэсь валамтэ на сюлмы,

Эскерса но трос пол пайдаез уг шӧдскы.

Паймымон тунсыко бен тазьы улыны -

Емышлэсь выль палзэ веръямен тодыны 

_________________

Удмуртские поэты, удмуртские стихи, удмуртская литература, кылбуръёс. 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын