Ирина Волкова

Мон вордски Можга ёросысь Бадӟым Кибья гуртын. 
Кузебай Герд нимо йӧскалык гимназиез йылпумъяме бере, Казане кошки. Али дышетскисько Казаньысь федерал университетын, искусствоя но филологияя факультетын. Яратӥсько футболэз! Висисько "Спартак" понна. 
Кылбураны кутски 6-тӥ классысен, нош мур пуштросо кылбуръёсы 9-тӥ классыен вордскыны кутскизы. 
Малы мон гожъяськисько? Малы кылбурасько? Ачим уг тодӥськы... Куддыръя сыӵе мылкыды луэ, ручка сяна номыр кулэ ӧвӧл. Соку мон гожъясько, гожъясько но гожъясько... 
Мынам кылбуръёсы - мынам малпанъёсы, мылкыды, сюлэмшугъяськонъёсы, шӧдонъёсы, кудъёссэ лыдӟись доры вуттэм потэ. 
Кылбурасько ӟуч но удмурт кылын. Озьы ик веросъёс гожъясько. 
2011-тӥ арын удмурт но ӟуч кылбуръёсыным "Розовое небо" кылбур бичетэ потӥз. 

*** 
Тон кошкид... 
Кӧня буш кылъёс мон кылӥ! 
Монэ воштӥд... 
Тон йырин мон воксё мукет луи! 

Нош секыт... 
Тонтэк улэме уг луы чик! 
Секыт вакыт... 
Сыӵе вакыт улонам нош ик! 

Тон лыктод... 
Мынам сюлмы ваньзэ шӧдэ! 
Нош кошкод... 
Нош чигтэм лулы нош ик... бӧрдэ! 

*** 

Я! Ворса ымдэ! Куака ведь пыроз! 
Мар-о тонэ сыӵе паймытӥз? 
Верай ук, яратонме куке но вормо... 
Со дыр тани... Адӟы, вуиз! 
Мон чебер. Соин-а паймид? 
Тон понна ӧй тыршы, сьӧд шундые... 
Я! Тырмоз! Золгес ик дэймид... 
Яратыны быгатӥ нош асме... 
Мӧзмыт-а тонтэк? Осто шу! 
Улонэ мынам выль табере! 
Кожай, ярато тонэ мон котьку... 
Котькулы номыр ӧвӧл ук, пие... 
Дыръёс ортчо, адямиос воштӥсько... 
Нош мон азьланяз тонтэк мынӥсько... 

*** 

Тон монэ ноку но эн вунэты: 
Сяськаос сяськаяськемысь дугдӥзы ке но, 
Инбам музъемен воштӥськиз ке но, 
Тон монэ ноку но эн вунэты. 
Адямиос яратонэз куштӥзы ке но, 
Инбаме тубатъёс пуктӥзы ке но. 
Тон монэ ноку но эн вунэты, 
Сяськаос сяськаяськемысь дугдӥзы ке но... 

*** 

Кизили киям усиз 
Но шуиз каллен: 
- Тон шуддэ шедьтод одно 
Вуюись выллем. 

Мон шуи солы соку: 
- Вуюись - шудтэм. 
Зор бере гинэ потэ со... 
Синкыли бере?.. 

- Тон шонер валад, ярам. 
Зор бере гинэ, 
Шумпоттыса милемыз, 
Вуюись потэ; 
Нош синмысь шапык бере 
Одно ик вуэ, 
Адямиез пальпоттыса 
Сюлмысь серектэм. 

*** 

Липет вылын солы капчи, 
Липет вылын ваньмыз пичи: 
Пичи мугъёс, пичи дунне, 
Ваньмыз кошке, ыше, вунэ. 
Умой мылкыд валтэ соин, 
Пуксиз вӧзаз нош ӟольгыри. 
Макем мӧзмыт вал улӥын, 
Ваньмыз шулдыр липет вылын. 
Нош ма уйин? Ваньмыз мукет - 
Карез сьӧд шобыртэ шобрет. 
Котыр каллен. Мотор гинэ 
Со калленэз кысны выре. 
Сюлмаз солэн мур яратон - 
Урод пӧлын со шумпотон. 
Липет - эмъюм вань висёнлэсь. 
Сётоз кужым пиштӥсь толэзь. 
Вормон оскон сюлмын улэ, 
Лулэз ӝутэ со нош вылэ. 
Туннэ нош мар? Жингрес куара 
Быдэс лулэз шуак ӵушка. 
Гожтэт вуиз телефонэ. 
Нырысь малпан: "Кинлы кулэ?" 
Отын нош вунонтэм кылъёс: 
"Яратӥсько! Луом-а ӵош?" 
Липет вылын солы капчи... 
Улон шуак нош воштӥськиз... 

*** 

Куке нылы шуоз мыным: 
- Анай! Мон синмаськи! 
Со шокчытэк вероз ваньзэ, 
Адӟо, дыр, синкыли... 

Нош мон ӟыгыртыса шуо: 
- Нылы, я, эн бӧрд, эн! 
Трос синмаськон сюлмад улоз, 
Уз юртты бӧрдэмед. 

- Ма, бен, шуо ук - синкыли 
Капчи каре лулэз... 
- Кинлы кызьы, дыр. Адями 
Ӧвӧл ук сюлэмтэм. 

Но тон эн дырты бӧрдыны. 
Лябӟод - лёгалозы. 
Лябдэ возьматыны вуттод. 
Дуно - жалялозы. 

Тон яратын эн кышка чик. 
Бӧрдын вуод. Тырмоз! 
Яратонэн сюлмын капчи. 
Я, чаль, мон ӟыгырто... 

*** 

 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын