Саша Шкляева

 Вордски Эгра ёросысь Тупал-Пурга гуртын. 

Покчи классъёсын ӟуч кылын чуръёслы рифмаос утчаса ветлӥ, шулдыръяськи. Со ик кылбуранэлы кутскон сётӥз. 
2010-тӥ арын Елена Миннигараеваен тодматски. Со дырысен удмурт кылбуръёсы потаны кутскизы. 
"Шундыкар" лагерьын Пётр Захаровен тодматски. Татын эшшо но удмуртоми. 
Нош тужгес но узыр дыр университетын кутскиз. Туж юрттэ удмурт филологи факультет. Татын кыл мынэ но мынэ. 
Ӵемысь кыӵе ке учыръёс пушме берыкто, соку соосты огшоры кылын вераны уг быгатӥськы ке, кагаз юрттэ. Озьы кылбуръёсы кылдо.

 

Мон – вампир 

Мон - вампир.
Сю ар талэсь азьло
Чыртыям адӟи пус пуктэмез.
Вӧсь ӧй вал.
Ӧй шӧдылы, лэся.
Сюлэме куриз гинэ вирез.
Мон - вампир.
Трос аръёсты ни улӥсько.
Нош сюзэ гинэ тодам вайылӥсько.
Мар азьло?
Яратылӥ-а, вӧсь кари?
Я адями луса, кинэ ке виыны вуи?
Мон - вампир,
Нош улыны мон кадьёсын,
Мон уг дӥсьтӥськы – мон отын мултэс.
Адямилэсь
Небыт чыртыысьтыз
Мон вирзэ уг сиы – мон мукет.

 

*** 

Уй но, нунал но ортчо мӧзмыса:
Мон кыдёкын гуртысьтым.
Пичи выны кылиз бӧрдыса,
Бӧрдко лул пушкам мон ачим.

Мон мурт каръёстӥ ветко мыняса,
Сюлмам нош пуке дор гинэ.
Лулы, одӥгнам кытын ке кыльыса,
Бӧрдэ, кесяське, шузиме.

Куддыр ӝӧк вылын телефон жингыртэ.
Экран ӝуатске - мемие.
Сюлэм буйгатске, лыз инмозь лобӟылэ,
Кылко ке дуно куаразэ.

Анай-атайёс, выны, сузэръёс,
Туж зол тӥледыз яратко!
Мед та кылбурез нуозы тӧлъёс
Дорам. Кема ӧз ни кыльы - берто.

 

*** 

Я, ӵок ини, куатаськыса
Шораз эн улы тон, пие.
Я, ӵок ини, вунэтыса
Вождэ эн вайы, мусое.
Дунне вылын трос пол шедёз
Лек адями, урод учыр...
Ваньзэ сюлмад пыртод, кельтод - 
Шудтэм улод тон пыр.
Я, ӵок ини, сюлмад эн возь.
Куректыса бырод, ышод.
Пуштэ копак со сисьмытоз.
Тон лэзь сое - шудо луод. 

 

*** 

Сюлэм лоба шумпотыса.
Мылкыд уя шунды бордын.
Мон поръясько серекъяса.
Мар монэн сокем луэмын?
Турын вожгес кадь адӟиське,
Шунды золгес пиштэ - 
Тылсиосын шулдыръяське,
Синме весяк пыре.
Адямиос дырто, дырто...
Мыным дунне ӵошкыт.
Выльзэ тодны, азьпал мынны
Уг поты ни кышкыт.
Чебер сюрес шедьтӥ - аслам
Соку ик потӥз со.
Али вужез кылиз берлань.
Али мон выль - шудо.

 

*** 

Мон мурт дорын, эшъёс пӧлын;
Муртъёс пӧлын - гуртын.
Лулпушъёсме эскерыкум,
Тае валай ачим.

Шузи улэ аналскыса,
Синме мон пытсало.
Эшъёс пӧлын пӧяськыса,
Дунне вылын уло.

Ортчо аръёс, выль нуналъёс
Вуж эшъёссэс вошто.
Пушкам кылем кылъёс, синъёс
Выль интызэс нӧдто.

Мон сьӧдэктӥ, лулы ышиз.
Уг берга ни улон.
Пӧяськиськон монэ быдтӥз.
Котькуд нунал - толон.

 

*** 

Тодад ваиськод-а, верай вал соку
Туж умойтэм кылъёсты?
Куалектӥсько мон, шорад учкыку,
Эн куарет! Пилёд лулъёсты.

Али но вӧзтӥд ортчыса тодӥсько - 
Пушкад куатаськон пуке на.
"Эн вайы вождэ!" - мон сюлмысь кеськисько...
Ымныр нош номыр но уг вера.

Трос дыр ортчыса могӟетэз шӧдӥсько.
Али но кӧты куректэ пыр.
Эшъяськон быриз, соиз жаль кожасько.
Вуноз-а учыр? Уг тодкы.

Куддыр жаляса мон тодам ваисько
Азьло шулдыресь дыръёсты.
Курыт синвуос вискытӥ адӟисько
Сьӧд сутэро синъёсты.

Одӥг янгышен мон сутӥ сюресэз,
Сюлэмме татчыозь висьытӥ на.
Уг вунэт ноку лек гинэ учконэз,
Уг быгат азьло кадь улны но.

Ӧд вошты ке но мон сярысь малпандэ,
"Тау бадӟым!" - шуо ик.
Пыдес вылаз султытӥд дуннеме, 
Берыктытӥд одно ик.

 

*** 

Уйвӧт

Уйвӧт. Кӧня пол монэ тон утьылӥд.
Кӧня пол шулдыртылӥд огнад.
Нош малы туннэ бӧрӟытъятӥд?
Малы сое ваид мыным вӧтам?

Уйвӧт. Шузи монэ тон кожаськод.
Тон малпаськод, дыр, ӵукнаозь со вунэтскоз.
Сюлэмме гинэ висьытӥськод!
Лул пушкам кезьыт лымы гинэ усёз.

Учкы, ай, шорам, уйвӧт. Адӟид-а?
Вӧсь пиштэ чагыресь синъёсам.
Тыныд со кулэ? Тае-а тон витид вал?
Ку кузьыт синкылие васькоз бамам?

Лек уйвӧт! Тон кошкы йырысьтым, озьы уг луы!
Тон шулдыр улон соин возьматӥськод.
Мон ваньзэ сёто. Мае гинэ уд куры.
Ӵушылы гинэ сое, мон косӥсько...

Шунды тылси султэ бамам дӥсьтытэк.
Куасьмем синкылиен синме мон усьтӥсько.
Мон кыллисько валес вылын шокчытэк.
Уин ваньмыз берытскылоз. Мон кышкасько.

 

 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын