Лиза Шихова

Вордски 29-тӥ оштолэзе 1995-тӥ арын Вавож ёросысь Зямбай гуртын. Кылбураны 4-тӥ классысен кутски. Со вал огшоры ньыль чуръем кылбуръёс, кудъёссэ мон анайлы, вордӥськем гуртэлы но инкуазьлы сӥзьыса гожтылӥ. Нош али кылбуръёсы яратон сярысь малпанъёсын пыӵамын. 
Ӵемысь кылбураны мылкыды инкуазе потыкум, солы матэ кариськыкум бурдъяське. Яке, шуом, кыӵе ке лулпушез берыктӥсь кино учкыса, мур малпаськытӥсь книга лыдӟыса, кыӵе ке тунсыко, чебер кырӟан кылыса но кылбур чуръёсы вордӥськыны быгато. 

Мадам 

Мон - Мадам,
Чагыр инбам - мынам кузь дэреме, 
Мынам серекъяме - 
Шунды, кудӥз тыныд югдэ. 
Нош вузэме мынам - 
Зоръёс но чилекъян. 
Льӧль малпанъёс - зарезь... 
Вань на толэзь - 
Мынам сюлмысь яратонэ, 
Сое адӟид ке, тодад вай монэ.
Инмысь кизилиос 
Уз ӵошатске со сюлэмен ноку 
Быдӟалаен но яркытэн. 
Тон тод сое котьку. 
Ведь мон - Мадам, 
Нош тон кытын меда, Адам? 

*** 

Ыш...
Коӵыш гижыоссэ шере. 
Дырекъясько... 
Сюлэм пыдсы дунне вые. 
Мон тодӥсько... 
Тонэн ум луэ ни ӵошен. 
Но паймисько... 
Кыӵе луэ вылэм сюлэм. 
Малпаськисько... 
Куддыр улон сярысь. 
Но ышисько... 
Вуюисьлэн буёлъёсаз ӵемысь. 
Вунэтӥсько ини... 
Яркыт кизилимес инмысь. 
Аслым шыпыртӥсько на... 
Тон вунэт ини со сярысь! 
Ыш... 

*** 

Макем секыт ворсан ӧсэз, 
Яратонлэн тылгизьыез 
Сура, пожа на ке визез. 
Сокем кӧсыт ни люкиськон. 
... Но берпуметӥ пумиськон 
Кыкнамылэн ик алдаськон? 
Нош ик мон тунасько. 

*** 

Асьмемыз люкизы 
Сьӧд куашкам пилемъёс, 
Йырвизьмес ӵоксазы 
Секытэсь малпанъёс. 
Уг ни кырӟа шырчик, 
Вазь ӵукна султыса, 
Кылизы ӝытъёсмы 
Сюлэммес бышкаса. 
Яратонмес кузь кылъёс 
Куспетӥ каризы. 
Вал на кидыс, 
Но сое быдтӥзы. 
Дыр ортчиз но, 
Сюлэм но кысӥз кадь пумен. 
Нош шокчем капчиен 
Уг ни луы гуртын... возьытэн. 

*** 

Синкылиен сураськыса, 
Зор ву коттӥз ни ымнырдэ. 
Кисьтиз вузэ, ӧз жаля чик, 
Сутӥз ни бамъёстэ. 

Толон гинэ тон вал соин, 
Кудӥз кузьмаз сяська. 
Туннэ нош тӧлпери вузэн 
Ӵуж куар музын уя. 

Кин вал со тон понна - 
Улон люкет яке ачиз улон? 
Яке кужмысь вал дыр быдтон, 
Куасьмиз ни яратон? 

Мӧзмыт. Секыт 
Улон ӧре нош ик туйнаськыны. 
Азьвыл сямен ӝужа шунды, 
Нош син азям ӵошен туспуктэммы. 
Малы?.. 

 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын