Женя Корепанова

Мон Эгра ёросысь Турел гуртысь. Али Италмас лицейын дышетскисько. Мыным 15 арес, но арня ортчыса, 16 тырмоз ни. 
Нырысетӥ кылбурме 8-тӥ классын дышетскыкум ӟуч кылын гожтӥ. 8-9-тӥ классъёсын оглом 3 ӟуч кылбур пӧрмытӥ. Выль школае вуэм бере, малпанъёсы рифмаосын потаны кутскизы. Али тросгес удмурт кылын гожъяськыны тыршисько. 
Уг гожъяськы вал яратон сярысь, нош али... со сярысь гинэ гожъясал. 
"Вамыш" лагере вуылэм бере, удмурт тулкыме зыми кадь. Табере яратон сярысь но, мар йырам лыктоз но, калыклы мар тунсыко луоз но, ваньмыз сярысь кылбураны тыршисько. Озьы ик веросъёс гожъясько, но соос тросэз ӟуч кылын.

 

Сайка 

Вамыш бӧрсьы вамыш...
Лушкемак. Дыртытэк.
Кыстӥське сьӧрам сьӧд быж.
Ӟучъёс пӧлын мон куаратэк.

Потӥ гуртысь мон ураме,
Кепыраса ӝог мынӥсько,
Уг кельшы тӧдьы дэреме,
Ватскыны мон вырисько.

Но кин ке шуак зол кеськиз:
"Удмурт со! Учке! Хахаха!"
Мукетыз быжме адӟиз,
Шуэ: "Ми пӧлын тӧдьы куака!"

Люкаськиз котыр калык.
Сю чиньы шорам учке.
Малпанъёс но удмуртлык -
Дорысьтым ваньмыз кошке.

Долкаса сылӥсько,
Дась му пыр вияны.
Одӥг сярысь малпасько:
"Соос тодӥзы... Кызьы улыны?" 

*** 

Дыр ортчиз.
Ваньмыз вунӥз.
Мон кыре потӥ,
Ортчисько ураметӥ.
Котыр нош трос адямиос
Долкаса шорам учко,
Тодмало монэ соос,
Куспазы шыпыртӥсько:
"Учкелэ! Кыӵе чебер!
Кытчы пыриз бакчасульдэр?
Удмурт ныл ук со, уго.
Кызьы луиз сыӵе тодмо?"
Йырме вылэ ӝутыса,
Ӟучъёс пӧлтӥ ортчисько.
Пальпотыса но мыняса
Мон табере улӥсько.
Бер ке но, валай огзэ,
Удмуртлык - со туж дуно,
Удмуртъёс вылэм зэмзэ
Туж кужмо но туж йӧно.

Сайка, удмурт адями!
Уникальноесь ук ми.
Ӧвӧл тон кадь нокинэз.
Уть но дунъя тон кылдэ,
Солэн уг поты быремез.
Гажа удмурт калыктэ! 

 

Сӥзьыллы ӟечкыласа

Тол йыгаське улонамы,
Уськытэм ини лымы,
Кылле мамык кадь бусыын.
Музъем быдэс шобыртэмын.

Сӥзьыл нош туж зол куректэ,
Солэн, дыр, кылем
ез потэ,
Кошке берзэ со учкыса,
Шудо толъёс кадь сӥзьыса. 


Шуом зарнимылы: "Ӟеч лу!"
Ар ортчыса эшшо на ву!
Сӥзиськом шулдыр улон,
Гужем бере тонэ витём!" 

 

*** *** *** 

Дорысьтым пегӟо кылбуръёсы,
Ватско кытчы ке чуръёсы,
Кылъёс но куараос пазьгисько,
Нош мон... чидасько.

Тани верос мынэсьтым кошкиз,
"Ӟеч лу!" - серектыса шуиз,
Кылбурез кияз кутӥз но пегӟиз.
Нош мынам... синкылие усиз.

Малы кошко дорысьтым соос?
Гажано веросъёс, кылбуръёс.
Шыпырто: "Ачид янгышэ усид,
Тон милемыз вунэтӥд..." 

 

Зарни пияш

Туж вӧсь карылӥзы,
Сюлмыным шудылӥзы,
Осконъёсме чигылӥзы,
Малпанъёсме пазьгылӥзы.

Кыли кадь чылкак мон огнам
Та бадӟым сьӧд дуннеын.
Урод малпан гинэ йырам,
Пальпотон нош ымнырын.

Дыр нош ӝог лобе азьлань,
Нош мон кукла кадь улӥсько.
Лулы чортэ монэ выллань,
Нош мон шузи кадь сылӥсько.

Но мар ке шуак воштӥськиз.
Зарни пияш дорам вуиз.
Ӵуж футболкаен вылаз,
"Шунды" эмблема мӧляяз.

Сое нырысьсэ адӟыса,
Пушкам ваньмыз берытскиз.
Сылэ со азям мыняса,
Мукет дуннеысь кадь вуиз.

Уг малпаськы вал чик но мон,
Шудэ дорам лыктӥз.
Уз ыш табере пальпотон.
Синъёсме со ӝуатӥз.

Тау бадӟым шудлы шуо,
Улонам пыремезлы,
Котьку мон мынясь луо,
Уз ни изь мынам лулы... 

 

*** *** *** 

Ручка киям кутӥсько,
Мар гожтыны малпасько.
Сомында берга йырам,
Нош огез гинэ сюлмам...
"Вамыш", тау тыныд бадӟым!
Трос пайда вайид мыным.
Уг но малпаськы вал мон,
Но шедьтӥ мон яратон.
Быдэс нунал йырам берга,
Вань малпанъёсме сура.
Уйвӧтам но табере
Со пияш гинэ ветлэ!
Кыӵе солэсь мӧзмисько!
Со но, дыр, мон малпасько.
Синъёсаз мон учкысал,
Туж но зол ӟыгыртысал!
Но мыным туж паймымон,
Уг валаськы на номырзэ но мон.
Мар со сыӵе? Яратон?
Шат ответ сётод ни тон? 

 

*** *** *** 

Кылӥсько куара.
Котыр пеймыт.
Ӝуась синъёс.
Мыным кышкыт.
Сюлэм жугиське.
Вир дугдӥз вирсэрам.
Малпанэ пазьгиське.
Юрттэ!Лыктэ дорам!
Кытчы пырыны?
Туж кышкыт котыр.
Уг лу пегӟыны.
Кыӵе со ымныр?
Кышкасько!
Пегӟисько.
Кытын мон? Кытын?
Кутэ ни ымныр!

Бззз! Мар со вазиз?
Синъёсме усьтӥсько...
Телефон жингыртӥз.
Ура! Мон улӥсько!  

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын