Лена Набиуллина

Паськыт, шулдыр возьёс… Зарни юосын шепаськись бусыос… Жингрес вордӥськем шаерлэн куараез... Соосын герӟаськемын вал мынам покчи дыры, малпанъёсы но осконъёсы, нырысетӥ кылбур пушъетъёсы…
Вордӥськемын но будэмын мон Башкортостанысь, Татышлы ёросысь Улысь Балтач гуртын. Али дышетскисько УдГУ-ысь удмурт кылосбуръя факультетын, 3-тӥ курсын.
Мон понна кылбур - со чебер тупась рифмаосты кутыса но кылъёсты радъёсы тырыса, пӧрмытэм текст ӧвӧл, со - зэмос пуш дуннелэн суредэз, кудаз котькудӥзлэн аслаз дунне шӧдӧнэз, аслаз буёлъёсыз… Тон ноку но уд тодӥськы, мар сярысь гожтод, мар тынад пӧрмоз. Нош гожъяськыны мылкыд ӵемгес лыктэ, мае ке но тунсыкозэ, выльзэ адӟеме яке лыдӟеме бере. 

***

Кыӵе ке но голькыт,
Пачылэс
Потэ та Ижевск.
Пурысялэс пилемъёс
Сӧро малпанмес…
Сэрегъёс, борддоръёс
Ӝуждала.
Суредъёс, сӥньысъёс
Бур палан.
Паллянын нош сэзьдо синъёсы.
Куараос.
Кыӵе ке но шурдыт,
Питырес
Потэ та Ижевск.

***
Выльысен.
Выльысен кутско.
Шоканы, оскыны, яратыны.
Вӧлъяло бурдъёсме.
Но лобӟо инсьӧры!
Пыкисько пилемъёс борды.
Кыдёке кылёзы малпанъёс, сэрегъёс,
Кышканъёс, дунтэмесь но дуно…
Чалмытэсь суредъёс, кӧсэктэм борддоръёс,
Малпанъёс, кулэтэм но кулэ…

***
Кулэ.
Оскон кулэ!
Нош со кулэ… ыше… быре…
Кулэ.

***
Кыла-бура.
Сюлмын яра,
Кышкан куара,
Кыла-бура!
Дунне питра,
Туж маскара.
Шара вера,
Кыла-бура!
Сюрес сэра,
Мылкыд кепра,
Ваньзэ сура.
Кыла-бура!
Дугдылытэк.
Кыла-бура…


***
Шӧдонэз - ог кызь
Бушлык мынэ урам кузя
Котыр пазя сьӧд пызь
Та дуннез кырсьлэсь сузя…
Корт пыдъёсыз туж кузь
Кияз кутэм нош крезь
Шудын мылыз уг сузь
Яке визьмыз гырезь.

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын