Оля Арзамасова

Вордӥськи Пичи Пурга ёросысь Кабыста гуртын. Али Удмурт кун университетысь удмурт кылосбуръя факультетын дышетскисько.

Кылбураны 6-тӥ классысен кутски. Та удысэ удмурт кылъя но литературая дышетӥсе Коротаева Ирина Николаевна кыскиз. Нырысетӥ кылбуре "Ӟечбур!" газетын "Вылӥ ӟечлыко" пусэн пусъемын вал. Соин ик кылбураны мылкыды эшшо но пуромиз.

Нырысь инкуазь, яратоно гуртэ но гурт калыке сярысь гожъяй. Будэмъя кылбуран тема воштӥське. Али мон тросгес адями сярысь, солэн шекъёсыз но сямъёсыз, яратон но мӧзмон сярысь гожъяны кутски. Кылбур гожтон мылкыд улонам кыӵе ке учыр луыку, мӧзмыкум, яратыкум ӵемгес лыктэ. 

 

Анай
Вазь ӵукна ик султыса
Гур дорад тон бергаськод.
Пыжкемъёс трос пӧраса
Семьядэ утялтӥськод.
Трос тынад малпаськонэд,
Трос пӧртэм сюлмаськонэд.
Семьяед бордын шудэд,
Нылпиё ке улонэд. 

 

Тулыс мылкыд
Анайме ӟечкылало,
Песяйме но ӟыгырто,
Дышетӥсьме шумпотто,
Эшъёсме но пальпотто -
Тулыслэн лыктэменыз, 
Тудвулэн быземеныз,
Шырчиклэн вуэменыз,
Шундылэн пиштэменыз.

 

***
Ымдурме куртчо,
Синкыли потто,
Уйвӧтам ӧтё –
Мон тонэ витё.

Ойдо вунэтом…
Выль улон кутском,
Дышеты монэ…
Вунэто тонэ…
Яке мыддорин
Мон луо тонэн. 

 

Выльысь яратонлы оскод
Малпанъёслы кыле ваньмыз.
Сюлмысь уд ӵушы нокызьы.
Яратонлэн быре дырыз
Азьлань тон ул на котькызьы.

Тулыс инбам синмаськытоз,
Яркыт шунды возьдаськытоз,
Небыт пучы мусоялоз,
Кошкись тудву кырсьсэ нуоз.

Дӥсьтытэкгес ӧстэ усьтод,
Пырись яратонэ выёд.
Выль улонын тон воштӥськод,
Выльысь яратонлы оскод.

 

Лимерик

(Купцова Нелли сярысь)
Пуроысь Кольток Нелли
Куинь сюрсэн басьтэм туфли.
Т-у-у-у-ж чебер адске вылаз
Шумпотса бертэ дораз
Пуроысь Кольток Нелли.

 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын