Диана Насибуллина

Мон вордски 6-тӥ гудырикошконэ 2000-тӥ арын Башкортостанысь Янаул ёросысь Выль Вараш гуртын. Нырысетӥ кылбурме 8 арескам гожтӥ. Нырысь инкуазь, тылобурдоос, пудо-животъёс сярысь гожъяй, нош али малпанъёсы вӧлскемынгес, чуръёсы но мургес ни.

 

*** 

Вордскем гуртэ, Атай музъем, 
Тон котьку сюлэмам. 
Мынам будэм пичи гуртэ 
Котькытын малпанам. 
Уз сюры чик нокыӵе гурт, 
Кудӥз шедёз сюлме. 
Кельшиз ке но, уг вунэты 
Аслэсьтымзэ вордскем гуртме!

 

*** 

Улонын котьку секыт 
Сюресъёс пумиськозы. 
Туж но трос кулэ луоз 
Йырвизез ужатыны. 
Шуг-лекен пумиськыса, 
Ӵем дыръя куректылод.
Эн жаля синкылидэ 
Лул-пушкад каньыл луоз…

 

*** 

- Анай, кызьы монэ вордӥд?
Мар малпаса будэтӥд? 
Малы «Диана» ним сетӥд? 
Малы «шундые» шуылӥд? 
Малы сокем яратскод? 
Малы весь сюлмаськиськод? 
Кызьы сюлэмме усьтом? 
Кызьы тыныд тау каром? 
- Нылы, сыӵе юанъёс сётъяськод, 
Мае тыныд верам уг пот. 
Будод ай, нылъёстэ вордод,  
Валэктонъёс ачид шедьтод.

 

*** 

Турын пӧлын возь вылын 
Зарни шар пиштэ. 
Матазгес мынӥ, учки -
Италмас вылэм. 
Одӥгназ гинэ сылэ, 
Котыраз - вож-вож .
Мон малпай: «Чигто тонэ, 
Кинлы тон кулэ!» 
Сюлэмам чигиз маке, 
Лул-пушкы гуньдӥз. 
Малы ке но мон шоры
Вожпотэмен учкиз. 
Мон ӧй чида собере, 
Кыдёке бызи. 
Малы ке жаляй сое, 
Валатэк ачим…

 

***

Улон шулдыр - шунды пиштэ ке, 
Анай-атай вӧзад улэп ке. 
Шуг-секытъёс ӧжыт сюро, 
Нош ӝӧк вылмы нянен тыро. 

 

*** 

Синъёсыд - 
Чагыр ин.
Йырсиед -
Чиль-сьӧд му.
Улонам -
Кизили,
Нош тыныд мон -
Шунды.
Учкысал лул-пушкад,
Мур-мургес пырысал.
Тодэме туж потэ,
Мар тынад сюлэмад...

 

*** 

Писпуос шыпыт выро, 
Тӧл каллен гинэ пельтэ. 
Нош тылобурдо куара 
Нюлэсъёс котыр вӧлске. 
Кытын ке эмезь кисьма, 
Кытын ке вуэ узы. 
Кылӥське пӧйшур куара. 
Эх, кыӵе шулдыр!
Нюлэсмы гужем куазен
Ваньмызлэсь чебер! 
Кытын ке таӵе инты, 
Вань на-а меда?

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын