Марина Парвазетдинова

Мон Башкириысь Янаул ёросысь Каймашабаш гуртысь. Дышетскисько Тюменьысь Медициная кун академиын. Йырыным но, пыдыным но дышетсконам выемын.
Кылбураны 5-тӥ яке 6-тӥ классысен кутски. Нырысь чебер пияшлы синмаськеме сярысь, инкуазь сярысь гожъяй. Али кылбурасько ваньмыз сярысь, мар сюлэмам йӧтэ. Кылбуран мылкыды ӵемысь кырӟанъёс, книгаос, фольклор, история бордысь потэ. Тужгес но мон яратӥсько магия но волшебство сярысь лыдӟыны но гожъяны. Ваньзылы, кин мынэсьтым кылбуръёсме лыдӟе, сюлмазы пыӵатэм потэ со магиез, кудзэ ми огшоры улонын ум адӟиське.  

 

 

*** 

Анай музъем монэ вазе.
Поезд сылэ ни вокзалын.
Капчи сюрес омыр сӥзе .
Семья возьма монэ дорын.


Рельса бызе туж ӝог азьлань,
Инвис сьӧры нош ик ыше.
Пуш бурдоме лэзё кыре,
Бурдаз тӧлэз нуоз ялан.


Йырме укно вистӥ потто,
Пересь нюлэс возтӥ ортчом.
Пунэм йырсиосмэ лэзё,
Ыркыт тӧлэз ӵошен кутом.


Вуно вань секытэсь мугъёс,
Корка зынэз весь зынъяса.
Буйгато каллен лулэз,
Небыт киын нош вешаса.

 

*** 

Сэзь сӥзьыл инбамын 
Ӝуатскиз кизили.
Тон лыктӥд мон сьӧры,
Возьмаса ик жади.
Тон кылид монэным
Та одӥг кузь уйлы.
Яратон ӝуатскиз,
Мылкыдмы ик лобӟиз.
Чупалляд бамъёсме,
Йырсиме маялляд.
Горд ӟырдыт ымдурме
Асладэныд ворсалляд.
Трос но трос чупам зор
Мугорам виялляз.
Кытын мон, кытын тон,
Кин вала на мед-а?
Мон но тон - одӥг лул.
Киосме кияд кут.
Монэным туннэ кул ,
Монэным ик улӟод.
Тук но тук шуккиське 
Юн мотор-сюлэмы .
Быдэс дунне пазьгиске 
Мон пушкы, тон пушкы.
Кыйёс выллем герӟамын 
Киосмы , пыдъёсмы,
Та пеймыт уй вакыт 
Лобазы лулъёсмы.
Сэзь сӥзьыл инбамын 
Ӝуатскиз кизили .
Нош али валамы 
Со милям сюлэммы.

 

*** 

Куазь зоре каллен-каллен,
Шыпыртэ ас сярысьтыз:
"Мон уси одӥг муген — 
Пазьгиськыны музъем вылын.

 

Тӧл капчи ки вылаз ӝутоз,
Тынад корка дорад ваёз.
Шыптым тылдэ ини кысод,
Выж вылысь вужер ышоз.

 

Васькисько укноостӥд,
Йӧтскеме уг лу бордад.
Валесад ини выдӥд.
Яке мон пыро вӧтад?

 

Синъёстэ, мусое, кынь.
Ӵукае вордскоз нунал.
Серектод солы мынь-мынь.
Мон уйин лыкто ялан.

 

Музъеме пазьгиськытэк 
Уг лу инме нош ӝутскыны.
Мон усисько одӥг муген — 
Шуныт тустэ нош адӟыны."

 

*** 

Кемалась  талэсь азьло
Пилемъес  улын дыръя.
Песятай татын улэм, 
Музъем сьӧры эскерем.

 

Тӧдь гӧртэм но кузь тушо.
Зарни кобы кияз кутэм, 
Котькуд нунал  туж визьмо
Пилемъёсыз будэтэм.

 

Кисьтам ву соос вылэ.
Мед, пе, нянь ӝутскоз ӝоггес.
Адямиослы кужым кулэ,
Мед котмоз музъем золгес.

 

Нош адями воксё лӧптэм,
Нянь но нянь ӧвӧл солы.
Зарнилы ни син понэм,
Лулзэ сётэм кереметлы.

 

Песятай йырзэ ошиз,
Ӧвӧл кулэ ни со татын.
Пилемъёссэ сьӧраз басьтӥз,
Улэ вылын — инбамын.

 

Учке туннэ но со шорам,
Мамыкъёсыз нош ик будо.
Мылкыды капчи мынам,
Луомы на ми шудо.

 

***

Уй кышкыт васькоз туннэ,
Толэзь пушкысь адӟо тустэ.
Пегӟы ӝоггес, кылзы монэ,
Уз лу ватскын пеймыт вужере.

 

Гожто нимдэ тузон сюресэ,
Вылтӥз экто, кельто пытьыме.
Учкы кык синъёсыныд вылэ.
Туннэ ведӥн шуод тон монэ.

 

Ӝуато горд тылын синъёсме.
Ваты кыдёке кезьыт сюлэмдэ.
Уг яра нылэз пӧяны, тод.
Туннэ та уе тон бырод.

 

*** 

Яратӥд шуид тон монэ,
Кузьмад ӝуась сюлэмдэ.
Чупад ӵыжыт ымдуръёсме,
Маялляд уйин йырсиосме.

 

Ӧз лу со уе изьыны.
Кулэ тонэ ӟыгыртыны.
Сьӧрад мыно нюлэс пыртӥ,
Каллен вамышто шур возтӥ.

 

Писпу улысь ӧд адӟы монэ.
Нылэн сылӥд, чупад тон сое.
Синкылиос котто ни бамме.
Пазьгиськиз туннэ сюлэме.

 

Табере мон уг оскы тыныд.
Мед ӵоксаськоз пӧясь ымыд.
Мед адӟозы сисьмем пуштэ,
Кызьы нымыр лулдэ сие.

 

Марлы мыным чигем сюлэм.
Яратон отысь ни ышем.
Уйпал тӧллы асме кузьмало,
Соин ӵош улонысь тӧлӟо.

 

Со дырысен кин нылэз пӧялоз,
Кин солэсь сюлэмзэ сӧроз.
Монэ кышкыт уйвӧтаз учыртоз.
Киям улонзэ ачиз ик сётоз.

 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын