Алёна Орлова

Вордӥськи 5-тӥ толсуре 1995-тӥ арын Пичи Пурга ёросысь Баграш-Бигра гуртын. Кылбураны школаын дышетскыкум кутски. Кылбуръёсы яратон, улон сярысь. Кылбуран мылкыд нуналлэн котькыӵе вакытаз дорам вуэ, но ӵемысь со монэ уйин сайкатэ! Чуръёс кисьтӥсько кызьы ке куашкам мылкыды дыръя, озьы ик капчи, задор, яратон мылкыдъя.


 

***
Вамышъясько огнам сюрес кузя,
Сюлэм тылгизьыос пазя.
Дэри колӟо — секыт малпан — 
Чука кадь ньылонам.
Лобе, лобе со кыдёке,
Бераз сайкыт омыр кельтэ.
Дэриез лымы воштэ,
Чылкыт нунал вуэ – капчи луэ! 


 

***
Малы вӧтъёсам мон доры лыктӥськод?
Вылтырме пӧсь вуэн погыльткод-сутӥськод?
Малы йырвизьме сураськод-пожаськод,
Тон сярысь малпанэн улыны косӥськод?
Сюлэмы чигиське азьлозэ малпаса,
Нош йыры пороме гожтэттэ адӟыса.
"Вунэто! — малпасько мон соку ас поннам. — 
Оскисько – быгато!
Бышкалтэм интыысь
Ӟар вирзэ утялто!
Оскисько, мон тонтэк улыны быгато!"  


 

Анай 


Нокин уз тоды тынэсьтыд малпанъёстэ,
Нокин уз вала сюлэмшугъяськондэ.
Огез шуоз: "Мар тон озьы каркод?"
Мукетыз, лек кылын курласа, кошкоз.
Дыр ортчоз — вордӥськем гурттэ кельтод,
Вань куректондэ пушкысьтыд куштод...
Вамыштод тодмотэм дуннее,
Эрикез данъяса, лобод вылӥе!..
Ваньмыз пӧлысь огез тонэ валалоз,
Гадь бордаз ӝиптоз, юн ӟыгыртоз.
Кыдёке азьлане мыныны,
Юн оскон сётоз улыны.
Со — тынад пальпотӥсь шундыед,
Со — тынад чылкыт зарезед,
Со — тынад шуныт омыред,
Со — тынад Анаед! 


 

Кин тон сыӵе, адями? 
 

Кин тон сыӵе, адями?
Эрико лопыръясь бубыли?
Оло тон юг инмысь сьӧд кырныж?
Яке тэбинись пуштрес быж?

 

Кин пуке тынад лулсюлмад?
Кин кужым сётэ улыны?
Яке со сюпсе кырсь вирдэ,
Выль шокан пыӵатса вирсэрад? 

 

Кин тон? Мар тон?
Малы та дунне вылэ вордӥськид?
Кузьманы бадӟым шумпотон?
Яке сьӧсь кион ку улэ ватӥськид?

 

Адями! Шунды улын тон поръяськод
Ачид кадьзэ яратыны,
Ӟеч ужъёстэ быдэстӥськод
Адямилыктэ утьыны! 

 


***
Учкы мынам синъёсам,
Кузьма чылкыт шумпотон,
Шунты кезьыт сюлэмме,
Ӝуат пӧсь яратондэ. 

Мед со юрттоз улыны,
Мед гажаны дышетоз,
Мед шундыен ӝужалоз,
Кырсь сӥльвирез сайяны.

 


*** 
Синъёсыд тынад — паськыт зарезь,
Сюлэмыд тынад — бадӟым крезь.
Куараед — жингрес гырлы,
Куректонме пазьге кема дырлы.
Киосыд тынад — небыт бурдъёс,
Бамъёсыд тынад — горд узыос.
Лулыд тынад — узыр шыкыс, 
Сяськаясь но югыт тулыс.
Кырӟаськод — шулдыргес луэ дорын,
Эктӥськод —  веттаське ваньмыз котыр.
"Яратӥсько тонэ!" — улон кужым будэ,
Нош кошкиськод ке, сюлэмы бӧрдэ.

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын