Мария Васильева

Мария Васильева — «Удмурт кылбурчи» огинэз кылбуръёсыныз узырмытӥсь но «милемлы АнФиНоГеНнО» огинэз нуись. Дэмласьком Машалэн кылбуръёсыныз тодматскыны. 

Мон вордӥськи Алнаш ёросысь Мукшур гуртын 1998-тӥ арын. Али 10-тӥ классын дышетскисько. Кылбуръёс борды нылпи садысен бинялски ни. Но рос-прос 5-тӥ классысен басьтӥськи. Нырысетӥ вамыш лэсьтыны удмурт кылъя дышетӥсе Конюхова Валентина Васильевна дышетӥз. Кылбуръёсы яратонлы, адямилы но инкуазьлы сӥземын. Кылбур чуръёс сяна, кырӟанъёс но гожъяны вырисько. Ёросысьтымы «Ошмес син» но «Шунды» огазеяськонъёсы пырисько. 
 

Кызьпу арамаын
 

Мон нош ветлӥ кузьпу арамае,
Азвесь лысву пӧлтӥ вамышъяса.
Сюлэм но жугиськын кутскиз ортчыт,
Ӵук омырен гадьме веськатыса.

 

Чагыр инбам но дӥсьтытэк веша
Писпуослэсь кырӟась вож куаръёссэс.
Шунды, сиосыныз йӧттӥськыса,
Арамае кисьтэ шуныт мынямьёссэ.

 

Лызгырлыос чингыльтыло турын пӧлын,
Малпанъёсме азьлань валтылыса.
Дото сюлэм буйга та интыын,
Шудэн-бурен лулме пачыласа.

 

Ӵуж купанча но кисьтаське пырыосын,
Зарни тулкым кадь кыстӥське ошмес дуре.
Улонэлэн бичам ненег шудэз
Пинал кызьпу улын дыр люкаське...


***

Бурдъёсыныд ӧд ушъяськы кема,
Бен поръяны инмын ӧз тырмы кужымыд.
Мурт кылъёслэсь сантэмамзэс кылзӥськыса,
Тыбыр вадьсад пазьгиськизы малпанъёсыд.

 

Мар верамзэс эн поны тон пеляд,
Кылзӥсь муртлэн гадяз со кугӟаське.
Яратӥсез сюроз на улонад,
Соку уд ни адӟы кезьыт синвуоссэ.

 

Пумит тӧллэсь эн кышкалля юнме,
Ӵук ӟардонлы шуныт кылын тон вазь.
Ӟеч шумпотон — со ваньмызлы сётске,
Куке визьмын но лулыныд тон сазь.

 

Соку гинэ вӧлъяськозы тӧдь бурдъёсыд,
Вамышъёсыд но луозы тынад юнгес.
Улон вайись чылкыт тулыс омыр
Выль кужымен буйгатскытоз сюлмаськондэ.

 

Мон пуктӥсько аслым корка...
 

Мон пуктӥсько аслым корка,
Борддоръёсыз тэшкаськемын.
Сэрэгъёсаз но тӧл шула,
Отчы лулы бинялскемын.

 

Мынам коркам трос адями,
Пырась-потась котьку сюроз.
Шокчын ке но уз лу инты,
Адямиез уз быр, йылоз...

 

Тылын гома ни коркае,
Мон витисько аслым юрттэт...
Ӧвӧл вӧзам ни табере
Одӥг ке но "луло шелеп".

 

Эгыр вылын пукто корка,
Андан кыдам капкаосын.
Оскон ӝуаз со коркаен,
Таяз коркам нокин уз пыр!

 

***


Куддыр одно ик ваньмыз пожаське,
Вань малпанъёс лӧбӟо тӧлъя-буръя.
Улонэлэн ӧрыз, дыр, сураське,
Оло маке шимес уж малпалля...

 

Мыным кышкыт вамыштыны азьлань,
Ӵушкаськылын ӧвӧл ни кужыме...
Уг валаськы, кытын лэсьтӥ мыдлань,
Кытын мынам ӧбкельымтэ уже?

 

Поромытӥсь льӧмпу сяська туж ӝог тӧлӟиз,
Ум пуке ӝытъёсы ӟыгырскыса...
Яратонмы милям ышиз-быриз,
Улом огкадь: ас даурмес куректыса.

 

Выльысь пумиськыса ум вазе ни пумит,
Яке кин ке касаз шудо дырмес?
Легезьпудлэн шиез туж лек бышкиз,
Туж меӵ яраосаз сылаз пазьгиз.

 

Ярлэсь шуре уг висъя кусыпсэс
Грӟаськемын ке но люкиськонтэм.
Малы меда шудтэм янгышъёсмес
Эзель ваче бича куд-огмылэсь?

 

Куддыр одно ик ваньмыз пожаське,
Вань малпанъёс лӧбӟо тӧлъя-буръя.
Яратонмы улвай кадь чигтӥське,
Куасьмем бераз гинэ бурмын ӧдъя... 


*** 


Сюрес дурысь веськрес кызьпу 
Югыт изнэсъёсын лэйка,
Куддыр гинэ вужер пӧлысь,
Аслыз "сюлэм пыртос" утча...

 

Адямиос вӧсь карыса
Улвайёссэ весь чигтыло,
Кызьпу сылэ мыкырскыса,
Пӧсьяськонзэ ватэ пыдло...

 

Вӧзаз ӧвӧл ни кемалась 
Валче будэм эшъёс, вынъёс...
Шунтӥсь ӧвӧл ни табере,
Буйгатскисьтэм лулыз пумоз... 


***


Луд вылэ лёгаськын потыса,
Сюлэме курисько выль чуръёс.
Ӵук азвесь лысвуэз чупаса,
Выжыкыл кадь пото ук соос!

 

Нош отын кыдёке-кыдёке
Кыстӥсько сяськаясь тулкымъёс.
Чагырен чиляса инбаме
Пӧрмыло пӧртэмесь пужыос.

 

Тэль дурын вож буртчин арама
Саюлаз весь ӧте на монэ...
Кытын ке тодмо выль куара
Шаер тыр туж шулдыр чузъяське!

 

Италмас кадь шунды но ӝужа,
Пылатэ дуннеез кужымен.
Шокаса но сюлмы уг сюма
Юз ошмес кадь чылкыт омырен!


***

Котьку озьы... ваньмыз сылме...
Аръёс ортчо выль кужымен.
Лысву усем бурдчин турын
Гинэ мар вал, сое тодэ.

 

Дунне берга но воштӥське
Вогыриё ву тулкымен.
Мусояса тонэ вордӥз,
Анай сямен, дуно музъем!

 

Азьвыл выллем ошмес дуре
Люкаськозы пинал дыръёс.
Нош пытьыос гуждор вылын,
Гольык пыдын, лёгем ужъёс...

 

Бадьпу куаръёс ыркыт тӧлъя
Уз шулалэ ни ас гурзэс...
Ӝужай татын егит дыръям,
Лулӟиськыса шуиз пересь... 


Луысал...
 

Луысал улмопу, сяськаян вакытаз
Гольтырес омырен шунтысал сюлэмдэ.
Уясал ю пӧлын, шепаськись кӧкыяз
Азвесё лысвуэн вешасал пыдъёстэ.

 

Луысал тыр толэзь, кӧшкемыт уйёсы
Кыдёкын, инмысен югдысал сюрестэ.
Лэйкасал тӧдь пилем кадь сайкыт инбамын,
Чагырес пужыен ӝутысал мылкыддэ.

 

Луысал пӧсь шунды, кыдырась нуналэ
Ӵук зарни сиосын йӧтскысал бамьёсад.
Выйысал ошмес ву кадь буртчин саюлэ,
Ышысал куренесь оскымон синъёсад.

 

Луысал ыркыт тӧл, но ӝокыт инкуазе
Маясал пеймыт ӝыт кадь ненег йырсидэ.
Выжыкыл уйвӧтын весь тылӝу на кенӝе,
Яратон ке пыре егит сюлэме...

 

Кылбуран мынам сюлэмам...
 

Кылбуран мынам сюлэмам
Эрико куараен чузъяське.
Со кельтоз, дыр, йӧтэ улонам
Кыӵе ке но пытьы лёгетэ. 

 

Шӧдӥсько аслэсьтым кужымме,
Гожъяны бурдъяське ке мылкыд.
Бубыли кадь лобе со инме,
Син азьын но луэ туж югыт.

 

Усьтӥське паськыт сюресэ.
Кышкатэк вамышто мон отчы.
Вунэто вань азьвыл шекъёсме,
Бурмозы коралтэм бурдъёсы.

 

Мон шедьто ас ӧрме му вылысь,
Пыӵало омырлэн ыркытаз.
Нош тодоз на меда коть кин ке,
Лэсьтэмын-а ваньмыз вакытаз...

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын