Бурдина Анна

Бурдина Анна

Улӥсько Алнаш ёросысь Усо(Муважи) гуртын, нош дышетскисько Усо шор ёзо школаын 10-тӥ классын.
Гожъясько кылбуръёс но веросъёс. Валтӥсь темае: улон но солы дунъет.
Мынам музае – со ульчаын шудӥсь, бызьылись пичиос.
Гожъяськисько 5-тӥ классысен.


_____________________________________

ВЫЛЬ АР ОСКОН

Мамык кадь небыт лымы, каллен бергаса, пеймыт инмысь усе кынмем музъем вылэ. Тани ӝоген вуоз Выль ар. Котькин но сое возьма толсурлэн нырысетӥ нуналысеныз. Котькуд коркан сыло ни чеберъям кызъёс, анайёс нылпиоссылы вуро выль арлы костюмъёс. Пиналъёс Тол Бабайлы гожтэт гожъяло. Кин ке но куре выль мунё, кин ке но велик, кудӥз но соиз кучапи яке писэйпи.

Нош пичи Микилы кучапи но писэйпи но кулэ ӧвӧл. Льӧль бамтӥз кален васькись синкылизэ ӵушылыса Тол Бабайлэсь со шуд куре. Таиз Выль ар соиз кадь уз ортчы ни .Пичи Мики пумиталоз сое огназ, тодмотэм нылпиос пӧлын, нылпи приютын. Вӧзаз уз луэ ни анай-атаез, яратоно пичи Мани сузэрез. Куать аресъем пичи пилы со туж бадӟым куректон. Лек тылпу басьтӥз солэсь самой матысь адямиоссэ. Пичи сузэрез гинэ на вань, но со пыртэмын мукет нылпи юртэ. Кытынзэ Мики уг тоды. Кыӵе шудо вал со куинь нунал талэсь азьло. Котькуд нунал сое небыт киыныз маялляса сайкатэ вал анаез; атаез сьӧры со ветлылӥз нюлэскы, пу дасямзэ адӟыны; нош кыӵе зол со яратӥз пичи сузэреныз шудылыны!.. Огаз уе пичи Мики султӥз ӵын зынлэсь. Сое но Маниез атайзы кияз кутыса, чалякгес ураме поттӥз, нош собере выльысь пыриз лек тылын ӝуась корка - анайзэс поттыны. Кема возьмаз Мики соослэсь потэмзэс. Ӵукнапал гинэ на солы веразы, анаен атайзэс соос ноку но уз ни адӟе шуыса. Котьку но мынь потӥсь пияшлэн синъёсыз ноку но ӧз ни куасьмылэ со дырысен. Анай-атайтэк кылем нылпиослэн гуртазы вал на Онись кенаксы, но со соглаш ӧз луы соосты вӧзаз улыны басьтыны. Соин Микиен Маниез люкыса пӧртэм нылпи юртъёсы келязы. Уйзэ изьытэк, бӧрдыса потаз пичи Мики, анайзэ, атайзэ но сузэрзэ тодаз вайыса.


Тани вуиз ӵукна. Кык нунал кылиз на Выль арозь. Небыт анай киос уг ни сайкато сое. Султэмез Микилэн уг поты. Нош ик сое исалозы мукет нылпиос. Кӧня сое мыскыллязы ни ӟуч кылэз тодэмтэеныз. Комнатаяз пырыса, со ӝожмыса туж кема бӧрдылӥз.


Огпол Микилэсь бӧрдэмзэ адӟиз нылпи юртлэн директорез Валетина Михайловна. 


- Мики, мар-о луиз? - жингырес куараеныз со юаз пӧсь синкылиен бӧрдӥсь пияшлэсь.
- Маниелэсь мӧзмисько…- дыр ортчыса вераз со Валентина Михайловналы.


Пинал кышномуртлэн сюлмыз ӧз чида. Микиез ӟыгыртыса ачиз но бӧрдыны ӧдъяз…


Нуналлы быдэ обедзы бере нылпиос ульчае шутэтскыны потазы. Отын соос бызьылӥзы, лымы мунё лэсьтылӥзы. Пичи Мики гинэ палэнын соос шоры учкыса сылылӥз. Нокин но соин отын ӧз эшъяськы. Йырзэ ошыса, Мики каллен вамыштӥз юртсы пала. Мар юнме кынтӥськыса сылод. Нош мар со? Кин со Микилэн бордаз ӝиптӥськиз? Пияш берыктӥськиз но, Шарик пунызэ адӟиз. Пуны шумпотэменыз тэтча, бызьылэ Мики котыртӥ. Кызьы сое Шарикез кызь иськемысь гуртэзлэсь шедьтэм? Нош кыӵе со сюмам, сьӧд чилясь гонэз ӟугмаськем. Пичи пи сое ӟыгыртӥз но азьлонлэсь но золгес бӧрдыны кутскиз, нош пуны со шоры учке. «Кытын бон Мани?» - юа кадь со Микилэсь. Пияш сое валаса-а мар-а шуиз: «Мани татын ӧвӧл, Шарик. Кытын меда со? Пичи сузэре мынам… Тон гинэ на мынам вань, эн кошкы, ява».


Ӝытсэ сиёнзэ пияш пуныезлы сётиз. Одӥгзэ ке но ӝытсэ Мики мыняса выдӥз. Нош султыны озьы ӧз кылды. Уйвӧтаз Мики анай-атайзэ адӟиз. Бызе кадь со соос доры, но нокызьы уг вуы. «Анай! Атай! Эн кошке! Эн кельтэ монэ»,- кесяськыса, бӧрдыса со султӥз. Шуныт шобретаз биниськиз но нош ик бӧрдыны кутскиз. Озьы ик умме усиз. Сое сэйкатиз Валентина Михайловна. Пияшлэсь пыктылэм синъёссэ адӟыса, бам кузяз синкыли шапыкъёс васькизы. Мики бызьыса султӥз но укное учкиз: отын сое нокин но уг возьма ни.


- Кытын мынам Шарике? - юаз со Валентина Михайловналэсь.
- Со табере анаед но атаед дорын, Мики,- шуиз со.


Пичи пияш дӥсьтэк бызьыса потӥз. Кызьы выльысь комнатаяз вуиз, со уг тоды ни. 
Со уе туж кезьыт куазь вал. Сое чидатэк, жуммем пуны кулэм.
- Табере мон воксё огнам кыли…- синкыли пыр шыпыртӥз пияш Валентина Михайловналы.
Соиз Микилэн та кылъёсыз бере кытчы ке но бызьыса ик потӥз.


Выль арозь кылиз на 1 нунал. 31-тӥ толсуре пичи Мики азьлон сямен ик султӥз таза воспитательэсь «Подъём!» шуыса кеськемезлэсь. Пияш уг на тод, та нуналэ солэн быдэс улонэз воштӥськоз шуыса. Ӵукна ик со доры пыриз Валентина Михайловна. 
-Дӥськуттэ бича, - небыт куараен вазиз Микилы но выльысь кытчы ке потӥз.
Соиз марзэ созэ валатэк, арбериоссэ бичаны кутскиз. Дыр ортчыса нош ик пыриз Валентина Михайловна, нош табере со огназ ӧвӧл: ки вылаз пичи ныл. Мики соку ик тодмаз Мани сузэрзэ.
- Мани! - кеськиз но пичи ныл борды ӝиптӥськиз, - Мани, кыӵе зол мон тынэсьтыд мӧзми!
Куинь аресъем пичи ныл «дяди» шуыса, эшшо но зол ӟыгыртӥськиз Мики борды. Соос уг тодо на, табере выль анайзы вань шуыса.
Валентина Михайловна Микиез но Маниез аслыз басьтӥз.


Тани час ортчыса вуоз ини Выль ар. Мики пуке выль коркаяз. Вӧзаз выль анаез но яратоно Мани сузэрез. Корка трос вӧлмиськемын кызлэн зыныз, нош со улын кыӵе ке но коробка, кудӥз ке туж кемалась выре ини.
- Мар отын, анай? - юаз со Валентина Михаловналэсь.
Соиз шумпотэменыз, выль арез возьматэк, «Учкы ук, пие» гинэ на шуиз.
Мики каллен лэзиськиз но коробкаез усьтӥз, нош отын - пичи кучапи.
- Шарик, анай, Шарик! - кеськиз Мани.
- Зэм но, табере асьмелэн выль Шарикмы луоз.
- Тау, анай,- шумпотыса вазиз Мики.
Тани курантъёс йыгало дас кык час вуэмез. Выль ар вуиз. Нош соин ӵош выль шумпотон.
Изён азяз пичи Мики укно пала берыктӥськиз но шуиз :
- Тау тыныд, Тол Бабай, монэ кылэмед понна. Мон табере шудо!


Мар куриз вал Мики, асьмеос азьлон тодӥськом вал ни. Нош мар куриз кышномурт –ум на.
Валентина Михаловна, нылпи вайыны быгатӥсьтэм кышномурт, Выль арлы куриз вал, нылпиос. Озьыен сое но кылэм Тол Бабай.


Эн вунэтэ Тол Бабаез тӥ но, эшъёс. Со тӥледыз но одно ик кылоз.

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын