Николай Михайлов

«Ваньмон дыр» туж капчиен выль кылбурчиосты шедьтэ, нош веросчиосын ваньмыз трослы секытгес. Коля Михайлов — кыкетӥез верос гожъясь, кудӥзлэсь вероссэ ми лыдӟыны дэмласьком. Но тодады вайытӥськом, пӧлады верос гожъясьёс вань ке, ужъёссэс милемлы (lukretsia@mail.ru) мед ыстозы. 

Вордӥськи 11-тӥ коньывуонэ 1995-тӥ арын Татарстанысь Кукмор ёросысь Вуж Каенсар гуртын. 2002-тӥ арын Сутэр Починка шор ёзо школае дышетскыны мынӥ. 2013-тӥ арын сое йылпумъяса Удмурт кун университетысь Удмурт кылосбуръя факультетэ дышетскыны пыри. Али мон кыкетӥ курсын дышетскисько ни. Ваньмон дыръёсам асме проза амалэн гожъяськон удысын эскерисько. Тужгес но магической реализм но фэнтези жанр тунсыко пото. Азьло асме кылбуранын но эскери вал, но проза амалэн гожъяськон сюлме юнгес пыӵаз. Прозаын гожтэме луэ сое, мае кылбураку усьтыны уггес быгатӥськы на. Мае ке выльзэ пӧрмытон понна котькуд удысын трос ужано ук. 

 

 

ПЕСЯНАЙЛЭН МАДЁСЭЗ 

верос


    
    Одӥг шимес бер сӥзьыл нуналэ мон школаысен гуртэ бертӥсько вал. Корка вуон понна котьку кадь ик шуръёсты но кӧшкемыт нюлэсъёсты ортчоно луисько. Нош одӥг пичияк шурез потыкум пересь песянаез пумитай. Та интыын кинэ ке пумитан сярысь малпанэд но уз лу… Соин ик пересь монэ туж паймытӥз.
    - Кытысь тӥ, песянай?
    - Ма, татысь ик, - шуиз со мыным кажга куараен.
    - Мар бон тӥ татын кариськоды?
    - Малпаськисько ай тани… мар таре кароно, - одӥг дырлы малпаськонэ усиз но шуэ – Вералом-а тыныд, пие, пичияк мадёс?
    Лякыт сямыз адӟиське вал кадь солэн ымныраз, быдэсак кисыриё ке но, нош синъёсыз…туж синмаськымон чебересь.
    - Бон, вералэ, -  мынектӥ мон.
    Ваньмыз Матӥлэн Петыр нимо пияшен тодматскемез бордысен кутскиз. Со туж чебер йӧно пияш вылэм, вань нылъёс со котырын бергаллям. Арганэныз крезьгурзэ шудэ ке, соку ик ваньзы люкасько но котыраз кырӟаны но эктыны кутско вылэм. Нокин кулэ ӧвӧл вылэм Петырлы, Матӥлы гинэ сюлэмзэ усьтэм. 
    Матӥ Петырен ӵош кык толэзь пала ветлэм. Соку ик шӧдтэк шорысь гуртазы пеймыт ужрад азинскем. Котькуд толэзь одӥген-одӥген нылашъёс ышыны кутскиллям.  
    Матӥ Петырзэ чакласькыны кутскем, соин сэрен но мар ке ӧвӧл меда шуыса. Шонер. Паймытӥсез вань вылэм. Котькуд толэзь пияшез выль нылашъёсын пумиськылэм. Одӥг пол Матӥ синйылтэм, кызьы Петырез, шур доры васькыкуз, нылашен ӵош бус пӧлы ышем. Матӥ но шур доры васькыса та паймытӥсь ужрад шоры матысенгес учкыны малпам. Петыр шур дурын сылэ вылэм, нош нылашез сьӧд куараен кесяськыса ву пушкы кошкем. Соку ик вуысь вож турын-куаръёсын пересь потэм. Пияшен куспазы соос мар ке вераськиллям. Матӥ соосты кылымтэ ни.
    Соос кошкем бере, ву дуре матэ лыктыса учкем но отысь нылашлэсь ымнырзэ адӟем. Соиз Матӥлы синзэ кынем. Матӥ кышкаменыз берлань кошкыкуз, мар ке борды шуккиськем. Учке но… пумитаз Петырез сылэ.
    Ог-огзы шоры кӧня ке учкем беразы Петыр солэсь юам:
    - Мар тон татын кариськод?
     - Мон… мон… - кышкаменыз Матӥ мар вераны но тодымтэ.
    - Мар мон, мон… Мынам ваньзэ умоен лэсьтэм потэ вал, нош табере кызьы кулэ луоз.
    Пияш сое йырсьытӥз нюж кыскыса шур дуре нуиз. Со дыре ик вуысь быдэсак вож турын-куаръёсын бинялскем пересь песятай потӥз. Кызьы гинэ нылаш ӧз пумитъяськы, номыр каремез ӧз луы.
    Вумурт нылаш шоры, собере пияш шоры учкиз но шумпотыса мыняз.
    - Быгатӥд уске аслэсьтыд яратондэ мыным кузьманы?- куараез солэн векчи но кыӵе ке ӟазырес вал.
     - Мон жади, мынам уг пот ни та кӧшкемыт ужрадэз лэсьтэме. Тон шуид, аслэсьтым яратонме тыныд сётӥ ке, мыным та чеберлыкме кельтод. Котькуд толэзь нылашъёсты ву доры нуллыны но кулэ уз лу ни.
    - Шонер, Сандыр.
    Матӥ шыпыт кыллиз, немар верамез луытэк. Но со валаз, малы Вумурт пияшсэ Сандыр шуыса нимаз. Куке но азьло Сандыр нимо пияш сьӧраз ветлэ вал, солэн ымнырыз туж шӧтэм вал. Тусбуез понна нокин соин уг вераськы вал. Одӥг нуналэ со пияш ышиз, нокин сое собере ӧз адӟы ни.
     Матӥ мар ке вазьыны тырше вал но, Вумурт сое соку ик ас дораз кыскыны ӧдьяз.
    - Сыл! Мон тыныд вераса ӧй быдты на, - шуиз Вумурт Петырлы. – Яратонэз ултӥян – берпуметӥ алама уж со. Сыӵе сюлэмо луэмед понна тон излы берытскод. Со дырысен Петырез нокин ӧз адӟылы ни…
    Одӥг дырлы ву шоры учки но малпаськонэ уси:  адӟеме вань ук кытысь ке со излэсь адямиосты. Асьме дыре котькуд адями урамын сыӵе излэсь ымнырен ветлэ ук…Тӥни кытысь со… Песянайлэсь юаны малпасько вал но, олокытчы ышем. Котырын нокин ӧвӧл. Шур доры матэгес васькыны малпай. Кин бон тодэ, та шуре-а пыртэм Вумурт со Матӥез? Пыдесъяськи но учкыса кыллисько. Вуын отӥ-татӥ чорыгъёс уяло, со сяна немар ӧвӧл кадь. Шӧдтэк шорысь син азям нылашлэн ымнырыз адӟиськиз. Мон кышкаменым берлань кошки но мар ке борды шуккиськи. Отын излэсь йыр кылле вал.  
     Вуысь пересь потӥз но мыным векчи куараен шуиз:
     - Мар тыныд кулэ, эше… 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын