Светозарево

Гужем мон вуылӥ Киров улосысь Слободка ёросысь Светозарево гуртэ. Со нуналэ отын «Выль ӝук» ужрад ортчиз. Мыным тунсыко вал палэнысь удмуртъёс сярысь тодыны но та юмшанэз учкыны.


Вакчияк Светозарево гурт сярысь: Светозарево кылдӥз 1927-тӥ арын.Татын котьку улӥзы удмуртъёс. 

Нош нырысетӥ улӥсьёс вуизы Круглово черкогуртысь, отын тылпу потэм бере. Ачиз Круглово 1746-тӥ арын удмурт гуртлэсь пӧрмемын. Кудаз 1622 арын 22 удмурт семья улӥз, нош 1722-тӥ арын – 78 семья.

Гуртын 354 адями улэ. Нош данъяськон интыез – Киров улосысь удмурт лулчеберетъя центр.

 

Ижысь Светозаревое мынон понна 9 час пала быре: 8 час поездэн но 1 час автобусэн. Со дыр ӵоже синмаськыса учкыны луэ инкуазь шоры: возьёс, нюлэсъёс, куаро писпуос. Ачиз Светозарево туж чылкыт, коркаос паймыто пужыё укноосынызы.

 «Выль Ӝук» юмшан сярысь: «Выль ӝук» котькуд ар гудырикошконэ ортче. Отчы пырисько Киров улосысь но Удмуртиысь ансамбльёс но кырӟасьёс. 2013-тӥ арын «Айкай» ансамбль вуыны кулэ. Киров улосысь коллективъёс пӧлысь висъямон «Лыз кутюк» калык кырӟанъя но эктонъя ансамблез. Со котьку но улосысь концертъёсын ассэ  дано возьматэ.

«Выль ӝуклэн» тужгес тунсыко интыез -  парсьёслэн бызьылэмзы.
Валтӥсь сиён – туэ вуэм кеньырлэсь ӝук.

Та юмшан сярысь тросгес тодыны но луоз татысь: http://vj.svetozarevo.ru 

Школа азьын милемыз кырӟанъёсын но чечыен табанен, сюкасен кузёос пумитазы. Кунояськыса вуимы гинэ, милемыз котыртӥз ни «Тыпыртон» гурт эктонъя коллектив. Праздник 11.00 кутске ай, нош ми со азьын сиськыны вуимы но школаысь краеведческий музее ветлыны. Музейын Светозарево гурт сярысь умойгес тодыны луиз, но учкыны, кыӵе слободской удмуртъёслэн дӥсьсы вылэм.

Но тани кутскиз ачиз «Выль ӝук»: эктонъёс но кырӟанъёс, ӝук сиён, парсьёслэн бызьылэмзы, гала-концерт, Батыр-шоу но мукет. 18.00 часын ужрад йылпумъяськиз. Нош калык уг дырты кошкыны. Соос азьланьто шулдыръяськонзэс: арган шудэм улсын кырӟало, экто, яке удмурт кылын вераськыса пуко. Озьыен, та ужрадэ ог-огенызы адӟиськыны вуыло кыдёкысь эшъёс, ӵыжы-выжыос, тодмоос. Сотэк-а татчы вуизы Польшаысь но Владивостокысь куноос. Туэ Италиысь куно но вал.
Нош асьсэос гурт калыкъёс тон Удмуртиысь шуыса тодо ке, юанъёсынызы ёрто. Соослы туж тунсыко удмурт бускельёссы сярысь тодыны.

Соосын вераськыса валано, удмурт кылзы Удмуртиысь калыклэсь висъяське. Со небытгес. Со гожъяськоназы но шӧдӥське, шуо.

Нош 22.00 часын клубазы этно-диско марафон кутске.

«Выль ӝук» ужрад сяна, Светозаревоын трос мукетсэ но адӟыны кылдӥз. Паймыны буслы, чорыганы ветлыны, вашкала удмурт дэремзэс мертаны, ӵужкушманэн но шуэн перепеч веръяны! 


 

Кати Сысоева

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын