Удмурт синпелетъёс

Ижкарын туж трос синпелетъёс. Но адямилэсь шуак юаськод ке, кыӵеоссэ со тодэ, кылӥськод Крокодил, Кеч но Пужей сярысь. Паймонэз ӧвӧл, Крокодил ваньзылы тодмо “Ещё!” пиццерия вӧзын сылэ, Кеч аслаз Кеч парказ кузёяське, нош Пужей сюръёс вылаз сюан сяськаосты бичамысь уг дугды. Нош адямиослы пуктэм синпелетъёс сярысь туж шерез тодаз вае. Яке калык соосты уг синйылты, яке нимъёссэс йыраз уг кельты. Ма сыло но соос калыктэм интыосын.

Мар ватонэз, удмурт муртъёслы сӥзем синпелетъёсты асьсэос удмуртъёс ик ниманы уг быгато. Кузебай Гердэз сяна. Соин ик тросэз малпало, Ижкарын номыр удмуртэз ӧвӧл шуыса. Малпан кылдэ, оло асьсэлы удмуртъёслы калыкомытоно та интыосты но пумиськон интыослы пӧрмытоно? Тӥни ук, Герд дорысь кылбур лыдӟонъёс гинэ но арысь аре калыкез люкало.

Туспуктӥсенымы ӵош ми ветлӥм Ижкар кузя но туспуктӥм вить синпелетъёсты, кудъёсыз сӥземын дано удмурт адямиослы.

 

Кузебай Герд

Кузебай Гердлэн, тодмо удмурт кылбурчилэн, дышетӥсьлэн, фольклористлэн, этнографлэн, югдытӥсьлэн но гожъяськисьлэн, из кыктоез сылэ К.Герд нимо йӧскалык музей азьын. Со пуктэмын 2005-тӥ арын. Со сяна Ижын вань К.Герд нимо ульча, К.Герд нимо гимназия. Озьы ик Советской урамын вань мемориал пу.

 

Трокай Борисов

Трокай Борисовлы сӥзем синпелет ӵыж выль на. Со пуктэмын 2012-тӥ арын. Сылэ Коммунаров ульчаын, Удмурт кун университетлэсь кыдёкын ик ӧвӧл. Ачиз Трокай вал этнограф, эмчи, политик но Удмурт автономиез кылдытӥсьёс пӧлысь огез валтӥсь мурт.

 

Иосиф Наговицин

Иосиф Наговицын сылэ Советской урамын. Та адямиез тросэз удмуртэн уг лыдъяло, но юнме. И.Наговицын - Удмурт исполкомлэн нырысетӥ председателез, революционер но Удмурт автономиез кылдытӥсьёс пӧлысь огез мурт. Солэн нимыз сётэмын на огезлы Ижкар ульчалы.

 

Михаил Петров

Михаил Петровлэн нимыз сётэмын Автозавод палась ульчалы. Кин уг тоды, со пырак ТРЦ “Петровский” палан. Тодмо удмурт кылбурчилы но “Вуж Мултан” романэз гожтӥсьлы татын синпелет уг сылы ке но, вань мемориал пу.

 

Степан Барышников

Степан Барышников - таиз тужгес но тодмотэм удмурт ним но синпелет. Но удмуртъёслы сое тодыны умой ик, угось Барышников удмурт коммунист, революционер, СССР-ысь Верховный Советлэн депутатэз вал, пусъемын Горд Знамялэн орденэныз. Синпелет вӧзысь огез ульча солэсь нимзэ нулдэ.

 

Гожтӥз Лукерья Шихова, туспуктӥз Кати Сысоева

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын