Укыр дуно кырӟась

Иван Белослудцев удмурт эстрадае ар куспын пыриз но югак воректӥз. Али со кырӟа IB&4CHP группаын. Жаляса верано, Испаниын удмуртъёслэсь данзэс утем пияшез Выль арлы сӥзем ужрадъёсын адӟыны уз луы, укыр дуно усе, пе. Алигес Европаысь вуэм кырӟасез ми юри кутӥм но асьме юанъёсынымы ёртӥм. Журналистъёслэсь акыльтэм Ваня, милемын ӝогак вераськиз но, гитаразэ ӟыгыртыса, ури-бери пегӟиз.

 

 

- Ваня, удмурт эстрадае тон туж шуак вуид но утыр тодмо луид ни. Ӧжыт калыкъёслэн Евровидениязы но ас пытьыдэ кельтӥд. Кызьы малпаськод, кыӵе инты тон басьтӥськод удмурт эстрадаын?
- Мон малпасько, самой бадӟым инты уг басьтӥськы шуыса, малы ке шуоно мынэсьтым кырӟанъёсме тросгес егитъёс кылзко, мӧйыослы со валантэмгес. Соос чик но уг валало кадь, мае мон кырӟасько.
Малпасько, али мон кыӵе ке шор интыосын. Азьланяз оло вылэгес но ӝутско ай. 

 

- Тынад кырӟанъёсыд но стилед шундыпуксён палын кадь, тёп-тёп удмуртэсь ӧвӧл. Нош дась-а удмурт егитъёс сыӵе крезьгурлы?
- Калык пӧртэм ук. Кудӥзлы ке кельше, кудӥзлы ке уг, со адями бордысь потэ. Кин азьло но таӵе кырӟанъёсты кылзӥз, солы яралоз, яралоз удмурт кылэнэз но. Мукетъёсыз шӧдозы но дунъялозы, удмурт кырӟанъёс таӵе ӧй на вал шуыса. Нош кинлы сыӵе стиль уг кельшы вал, со монэ уз но кылзы.

 

- Нырысь ик тон ӟуч кырӟанъёсты быдэсъяськод вал, собере удмуртъёсыз вылэ выжид. Азьланяз мар малпанъёсад? Кутскод-а тон выльысь ӟуч кылын кырӟаны, яке англи кылэ потод?
- Азьланяз оломар но луоз ай. Йырам олокыӵе но малпанъёс бергало. Оломар но карем потэ, олокытчы но вутскем. Англи кылэз умойгес дышетӥ ке, выль кырӟанме со кылын гожтыны быгато, дыр.

Льӧль малпанэ – англи кылэз умой дышетыны но англи кылын кырӟан гожтыны.

 

- Кырӟанъёсыд шундыпуксён палан кадь бере, тонэ отысь калык мед дунъялоз шуыса, уд малпаськы-а удмурт кырӟанъёстэ англи кылэ берыктыны? Соку тонэ отысь но крезьгурчиос адӟозы, дунъялозы.
- Малпасько, удмуртсэ берыктоно ӧвӧл. Мон сое удмурт кылын удмуртъёслы валамон гожтӥ бере, озьыен, та кылзӥсьёслы ик со кырӟан сӥзиське но. Англи кылын луэ юри мукетсэ гожтыны но кырӟаны. Нош удмуртэз удмурт ик мед кылёз.

 

- Тынад кадь ӝож кырӟанъёс удмурт эстрадаын ӧй вал на. Нылъёс бӧрдо, сюлэмзы пыр потто. Кызьы сыӵе кырӟанъёс пӧрмытӥськод? Аслыд секыт вал но гожтӥд яке огшоры малпаса?
- «Тау тыныд» кырӟанэ так гинэ гожтэмын. Нош «Яратон кошке» – таиз ни со дыре гожтэмын, куке аслым зэмзэ но урод вал.

 

- Тон монэ туж паймытӥд. Малппасько вал, «Тау тыныд» со озьы ик улонысьтыд учыръя гожтэмын шуыса… Кызьы сокем мур пуштросо кырӟан пӧрмытӥд?
- Мур пуштросо? Ярам, тон понна озьы мед луоз. (серекъя). Гожтӥ но гожтӥ, кызьы пӧрмиз.

 

- Удмурт эстрадаысь кинлэсь адӟем кариськод, кинэ тросгес кылзӥськод?
- Уг тодӥськы, удмурт но ӟуч кырӟанъёсты туж ичи кылзӥсько. Тросгес Западысь крезьгурен тунсыкъяськисько.

- Соин ик аслад но кырӟанъёсыд сыӵе пӧрмо, дыр.
- Озьы. Соин ик тросэз верало, кырӟанъёсам нокыӵе удмурт шӧмыз ӧвӧл шуыса, удмурт кылъёс сяна.

 

- Азьланяз кыӵе выль кырӟанъёсыд луозы?
- Ӝожъёссэ, сюлэме пырисьёссэ кырӟанъёсты мыным лякытгес гожъяны.

Куке мон шӧдӥсько, маке вань шуыса, мон соку ик пуксисько но гожтӥсько. Тӥни «Тау тыныд» но гожтэмын 20 минут куспын.

 

- Нырысь калыклы тон тодмо луид ӝож кырӟанъёсыныд. Со «Тау тыныд» но «Яратон кошке», нош собере шуак потӥз шулдыр «Сьӧд очки» кырӟанэд. Кызьы озьы пӧрмиз?
- Бен… ну со эксперимент вал. Азьланяз сыӵе кырӟанъёс но луозы на.

 

- Нош аслыд кудзэ капчигес кырӟаны?
- Ӝожъёссэ.

 

- Куке кырӟаськод, тынад ымнырад вань малпанъёсыд гожтэмын кадь. Тани ӝожъёссэ кырӟанъёстэ быдэстыкуд, мар сярысь малпаськод? Тодад вайиськод-а мае ке?
- Мон номыр малпаны но уг тыршиськы. Но со ачиз лыктэ. Кыӵе ке образъёс, тусъёс…

 

- Кылсярысь?
- «Сьӧд очкиез» кырӟакум, чебер нылъёс син азям пуксё. Вакчи дӥсен. Кырӟанысь кылъёсын кадь образъёс кылдо, тӥнь. Соин шумпотыса кырӟасько. (серекъя)

 

- Кыӵе нылъёсты меда син азяд пуктӥськод?
- Конечно, удмуртъёссэ.

 

Вераськиз Лукерья Шихова
Туспуктӥз Кати Сысоева

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын