"Герд не Обама" яке кызьы ортчизы кылбур лыдӟонъёс

Толон "Грифон" галереяын ортчизы "Герд не Обама" кылбур лыдӟонъёс. Радъяз та ужрадэз "ИнГОЖ" газет но "Ваньмон дыр" .

Асэнызы но кылбуръёсынызы тодматӥзы удмурт ӝужась кылбурчиос: 

Маша Векшина - лыдӟонъёсты нуиз но мукет кылбурчиосты бышкись юанъёсын ёртӥз, озьы соосты люкаськемъёслы усьтыны выриз. Нош аслаз Машалэн кылбуръёсыз "йырын гожтэмын, сюлэмын ӧвӧл". Солэн котькуд кылбур кылэз кыӵе ке пуштрос нуэ, куддыр сое валан понна, кылбурез 3-4 пол лыдӟыны кулэ.  Нош куддыр Маша куараосын шудыны яратэ. Вань та амалъёсты кутыса, нылаш гожъямъёссэ аспӧртэмлыкогес карыны тырше. 

 

Даша Шиляева - тужгес егитэз кылбурчи. Но та дырлы нылашлэн аслаз "Шыпырты" нимо кылбур бичетэз потӥз ни. Тунсыко соиз но, Даша - ӟуч, нош удмурт кылэз дышетӥз Кузебай Герд нимо гимназиын, кытын со дырлы, сцена вылэ потон понна, удмурт кылэз тодоно вал. Али нылаш шуэ: "Удмурт кыл усьтӥз мыным дуннее сюрес." Дашалэн кылбуръёсыз кужымез ворсаса возёнлы но катъёсъя гинэ улонлы пумит луисесь. Соосын тодматскыны быгатоды татын

 

Наташа Клабукова - берло дыре тросгес яратон сярысь гожъя, нош азьло уногес удмурт кылэз, кырӟанэз, шаерез данъяса кылбураз. Туж усто Наташалэн висъянпусъёстэк кылбуръёсыз. Капчиесь. Кызьы нылаш шуэ, философи кылбуръёсты со уг гожъя. Вань нылашлэн льӧль малпанэз - поттыны аслэсьтыз кылбур бичетсэ. Солэсь кылбуръёссэ лыдӟыны луоз татысь

 

Ксюша Евсеева - люкаськемъёслэсь соку ик висъяськиз ас образэныз. Лэзьям йырсиен но пеймыт кузь дэремен со туж романтической адӟиськиз. Сыӵе ик Ксюшалэн кылбуръёсыз но: мур пуштросъем но философиен герӟаськем. Таизлэн но кылбурчилэн ас бичетэз вань. Нимаське со "То, вечное...". Соин валче выль бичет сярысь малпанъёс но Ксюшалэн йыраз бергало ни. Нылаш гожъя ӟуч но удмурт кылын. Берпуметӥ ӟуч романтической кылбурез СТОЗлы сӥземын, угось инженерлы дышетсконэз йырин Евсеева трос уйёссэ трубаослы, насосъёслы быдтэ. Солэн кылбуръёсыз вань татын.  

 

Лиля Юртаева - вылтусызъя но улон шоры учконъёсызъя туж аспӧртэмлыко нылаш, нош кылбуръёсаз со пыӵамын ӧвӧл. Лиля яратэ вылтуссэ вошъяны, нош кылбуран удысэ сыӵе воштӥськонъёсты пыртыны уг дырты, кепыра. Нылаш гожъя удмурт калык, зэмлык но пыраклык сярысь но крезьгур сярысь. Но солы кельшымон крезьгур, кылсярысь, пост-хардкор, удмурт эшъёсызлы кӧшкемыт йӧтэ, пе. Паймытӥз соиз но, Лиля кылбура на немец кылын. Солэсь кылбуръёссэ дунъяны быгатоды татын

 

Богдан Анфиногенов - таиз кылбурчи кемалась ваньзылы тодмо ни Ullapala Boy кырӟась кадь. Кылбура Богдан суро-пожо удмурт-ӟуч-англи кылын. Анай-атаез солэн удмуртъёс ке но, пияш удмурт кылэз тодытэк будӥз. Нош али каллен дышетэм каре. Кылбура Богдан Маяковскийлэсь адӟем карыса. Кылбуръёсыз солэн кытчы ке ӧтисесь, яркытэсь, зол чузъяськисесь. Со тырше туала улонысь удмуртъёслэсь интызэс валаны, шедьтыны. 

 

Озьы ик ӟуч кылбуръёссэ лыдӟиз но "Инвожо" журнал сярысь пал кыл поттӥз Андрей Гоголев. Соин асэныз но кылбуръёсыныз быгатоды тодмасткыны 19-тӥ толшоре "Брезентовая цапля" лыдӟонъёсын. 

 

Оглом калыкез ичи ке но вал, лыдӟонъёс туж туныско ортчизы. Кузебай Гердэз но солэсь кылбуръёссэ лыдӟем сяна, тодматскыны луиз выль кылбурчиосын, соослэн кылбуръёсынызы но улон шоры учконъёсынызы. Умой луысал, таӵе лыдӟонъёс ӵемгес ортчылысалзы ке, нош соосын валче выль кылбурчиос, ас ватскон интыосысьтызы потыса, калыклы усьтӥськысалзы ке.  
Соин ик вазиськиськом тыныд, гажано лыдӟись, тон удмурт кылын кылбураськод яке верос гожъяськод ке, ысты ужъёстэ татчы info@vanmondyr.ru

 

Лукерья Шихова
Туспуктӥз: Мария Золотарёва

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын