Кин луоз Эль ныл?

30-тӥ оштолэзе Филармониын "Эль ныл" удмурт мода фестиваль ортчоз. Эль ныллэсь нимзэ нулдон понна вожвылъяськозы 13 модалиос. "Ваньмон дыр" тодматскиз нылъёсын но вить юанлы валэктон сётыны куриз. 

1. Кызьы нимаське гурт (черкогурт) но ёрос, кытын тӥ вордскиды (улӥськоды)?
2. Кызьы ортчытӥськоды ваньмон дырдэс?
3. Вань-а тӥляд удмурт дэремды? Кыӵе арбериез удмурт дэремысь тӥледлы тужгес но кельше? Малы? 
4. Удмурт нылъёс сярысь кыӵе супыльтонъёс тӥледлы тужгес но адӟемпотостэм йӧто?
5. Малы тӥ Эль ныл луыны кулэ? Мар со тӥледлы сётэ?

 

Тутаева Анастасия:

Мон вордӥськи Дебес ёросысь Заречная Медла гуртын.

Ваньмон дырме мон пӧртэм сямен ортчытъясько. Ӵемысь эшъёсыным ӵош урамтӥ поръясько яке сюлмысь вераськыса пукисько. Яратӥсько тодматскыны пӧртэм кылбурчиослэн творчествоенызы, куд-ог дыръя аслам но кылбуръёсы вордско. Газетъёсы статьяос гожъясько, яратӥсько вуриськыны но чильпаськыны.

Жаляса верано, удмурт дэреме ӧвӧл на. Но таяз гужем малпасько сое удмуртъёслэн уйпал дэремзылэн катъёсызъя вурыны. Удмурт дӥсьлэн вань арбериосыз пӧлысь мыным золгес кельше ачиз дэремез. Малы ке шуоно туала аръёсы нылашъёс тросгес ветло брюкиосын - со бадӟым янгыш. Дэрем - котькыӵе со мед луоз, нылмурт понна вуремын, со асьмедыз чебергес, синмаськымонгес каре.

Уг яратӥськы нылашъёслэн "личной" улонзы сярысь трос супыльтыса уло ке. Малы со кулэ?!

Мон малпасько, Эль ныл нимез басьтыны котькуд нылашлэн быгатонлыкез вань. Соин ик та ужрадын вормон мон понна нырысетӥ интыын уг сылы. Мон понна - со улонам эшшо одӥг вамыш, сюрес, кудӥз юрттэ пӧртэм удысъёсын азинскыны.


Иванова Елена:

Мон Татарстанысь Балтаси ёросысь Гондыр гуртысь.

Ваньмон дыры трос ик ӧвӧл. Дорысь уж трос сёто, трос лыдӟиськоно луэ. Озьы ик ветлӥсько пӧртэм репетициосы: хип-хоп эктонъёс, «Неофолк» этно мода студия, MADEMOISELLE OUDMOURTE модельной агенство.

Мынам вань удмурт дэреме. Со туж висъяське Удмуртиысь дэремъёслэсь. Тужгес но кельше камали. Мынам со лэсьтэмын вашкала манетъёслэсь, соин ик данъяськисько.

Уг яратӥськы, куке удмурт нылъёсты возьдаськисесь шуо.

Эль ныл монэ али ик мукет сямен усьтӥз ни. Мон уг кышкаськы ни сцена вылэ потыны, мыняны, ветлэме но умойгес луиз ни. Мон Эль ныл луысал ке, малпасько эшшо но тросгес усьтӥськысал. Али талэсь мар ке но кутыса возе на кадь.

 

Полатова Олеся:

Мон вордски Татарстанысь Кукмор ёросысь Вылӥ Шунь гуртын.

Ваньмон дырме турттӥсько ортчытыны пӧртэм сямен. Яке керттӥськисько, яке эшъёсын поръясько, яке Ижкарысь доре вуылӥсько но семьяеным ӵош кырын пикникын поръясько.

Удмурт дэреме мынам вань. Песянаелэн мыным кузьымез. Тужгес но яра камали, малы ке шуоно со туж мылкыдэз ӝутэ, солэн куараез сыӵе чылкыт но шулдыр.

Шуо, удмурт нылъёс туж возьдаськисесь, нош бигеръёс оп! шуытозь ваньзэ лэсьто. Монъя та шузи супыльтонъёс. Огез вераз, нош мукетъёсыз оскизы. Мон асме чылкак удмурт нылашен лыдъясько, но возьдаськонэ нокытӥям ӧвӧл. 

Мынам малпамъя, Эль ныл - со сыӵе кылсуред, кудӥзлэн ваньмыз луыны кулэ. Пальпотонэз но, шулдыртонэз но, оглом вераса, котькыӵе быгатонлыкез. Модалиос пӧлысь котькудӥз Эль ныл луыны быгатэ. Но соиз, кин та нимез нулдоз, азьланяз кулэ ассэ зэмос удмурт нылашен возьматыны. 


Петрова Дарья:

Вордӥськи Агрыз ёросысь Терси станциын, улӥсько Ӟатча черкогуртын.

Яратӥсько керттӥськыны, эктыны, туспуктыны, великен ворттылыны, кырӟаны. 

Ӵужаелэн удмурт дэремез вань. Аслам али ӧвӧл на.  

Удмурт нылъёс возьдаськисесь, шуо. Шонертэм! Удмурт нылъёс акцентэн верасько, шуо. Со озьы ӧвӧл!

Малы мон кулэ луыны Эль ныл? Малы ке шуоно мон веськрес, чебер удмурт ныл. 2008-тӥ арын Алнаш ёросысь "Чеберина" вожвылъяськонын ворми. 


Тихонова Кристина:

Вордски Можга ёросысь Кватчи гуртын.

Ваньмон дыры ортче эшъёсын. Но мон малпамъя, ваньмон дыр - со нырысь ик шутэтскон: кино учкон, гань-гань карись яке улонлы оскытӥсь кырӟанъёсты кылзӥськон. Ваньмыз мылкыдлэсь но кӧня жадемлэсь потэ. 

Удмурт дэреме вань. Но золгес кельшо удмурт чеберъяськонъёс, кудъёсызлэн вашкала шӧмзы шӧдӥське (мониста, пельугыос, суйпонэтъёс).

Сыӵе супыльтонъёс вань, удмуртъёс туж востэмесь шуыса. Эшшо вань веранъёс, вань удмуртъёс горд йырсиё но сюбег синмо шуыса. Фенотип али сураськемын ни.

Эль ныл ним сьӧры уг уйиськиськы, со мыным кабзэ кулэ ӧвӧл. Мотивъёс пӧртэмесь луыны быгато. Малпасько, мынам со асме утчанэн биниськемын.

Щёткина Татьяна:

Мон вордски Можга ёросысь Чемошур-Уча гуртын. 

Ваньмон дыр сюре шер, но сюре ке, одно ик сӥзисько сое ас азинсконэлы но яратоно адямиосылы, матысь эшъёсылы.

Удмурт дэреме матысь дыре кылдыны кулэ. Тужгес но зол кельше монисто, малы ке шуоно туж яра солэн жингыртэмез но ворекъямез, кельше шӧдыны солэсь секталазэ.

Уг яратиськы, куке шуо, милям йырамы визьмы ӧвӧл шуыса.

Эль нылэ бырйизы ке, оско, зэм но юнме ӧй тыршы шуыса, мон - "юнме так" адями ӧвӧл шуыса та дунне вылын.

 


Векшина Мария:

Мынам Пуро гуртэ Пичи Пурга ёрослэсь музъемзэ шулдыртэ.

Ижкарын улыса, туж шер вуылыны кутски ни вордӥскем палъёсам. Туж жалясько, малы ке шуоно ваньмон дыръям яратко вал поръялляны солэн мусо интыостӥз. Нош али, дыр сюрыку, гожъяськыны, лыдӟиськыны, дано адямиос сярысь тодыны но киужен вырыны тыршисько.

Удмурт дэреме котьку вал, калыкен дэмен шулдыръяськонъёсы дӥсяллясько вал. Туж данъяськисько солэн пужъятэм айшетэныз. Уго озьы дунъяны луэ нылъёсмуртлэсь тыршемзэ.

Удмурт нылъёс сярысь урод сямо супыльтонъёс ӧй кылылы на.

Нош Эль ныл ним, мон понна, чебер луонъя но астэ сцена вылын возёнъя пус. Али дыре удмурт нылашъёслы возьдаськонзэс кыдёке куштоно ни всё-таки!


Волкова Наташа: 

Мон вордӥськи Пичи Пурга ёросысь Норья черкогуртын.

Дыры мынам ӧжыт. Весь маке лэсьтӥсько, кытчы ке пырисько. Нош ваньмон дыры вань ке, эшъесыным пумиськисько яке киуж кыӵе ке лэсьтӥсько (керттӥськисько, оригами лэсьтӥсько, бисерен вырко).

Удмурт дэреме вань вашкалаез но, туалаез но. Кыкез но чебер. Нош монистаез но пельугыез тужгес но кельшо, малы ке шуоно соос жингырто, чиляло. Но отын манетъёсыз 1830-тӥ арёсысь. Со милям семьяысь семьяе выже.

Супыльтонъёсты мон ӵем уг кылӥськы. Но тани таӵезэ кылэм вань ик: вот, пе, тӥни со вотячка кыӵе ке гуртысь вуиз но малпа, со чебер шуыса. Ӵемысь озьы карысь нылъёс зулё. Кыӵе ке чебер пияш удмурт ныл шоры учке ке, ӟуч нылъёслэн вожзы потэ. Соку соос оломар но супыльтыны кутско.

Мон уг мальпаськы, Эль ныл луо шуыса. Милям трос модалиосмы, кудъёсыз та нимез нулдыны кулэ. Но шуак ворми ке, туж шумпото. Оло соку асме золгес данъясал, дӥсьтӥсьгес луысал. Анай-атае монэн данъяськысалзы. Кин тодэ, соку оло зэмос модали луыны тыршысал, чеберинаослэн вожвылъяськоназы пыриськысал.  

Евсеева Ксения:

Вордӥськи Яр ёросысь Никольское черкогуртын. Али Ижын улӥсько. 

Ваньмон дыръёсам матысь дуно адямиосын пумиськисько: семьяеным но эшъёсыным.

Вань аслам кык удмурт юбкаосы. Песятаелэн анаез кузьмаз вал. Вашкалаесь, аслаз ай вуремез. Тужгес но кельше кышет. Йырез чаклась, чеберматӥсь арбери. Сямылы тупа.

Супыльто, удмурт нылъёс возьдаськисесь шуыса. 

Эль ныл луи ке, тунсыко луоз.


Ившина Наташа:

Вордски Балезино ёросысь Зятчашур гуртын. 

Ваньмон дыръёсам порьясько эшьёсыным, соос доры куное ветлӥсько.

Мынам вань вашкала удмурт дэреме. Тужгес но кельше солэн болероез, кызьы со вуремын.

Мон малпасько, ми котькудмы Эль ныл луыны быгатӥськом. Нылъёс ке вормизы, мон соос понна шумпото гинэ.

Игнатьева Ирина:

Вордӥськи Можга ёросысь Бальзяшур гуртын. Улӥсько но ужасько Ижын.

Ваньмон дыры луэ ке, бертыны тыршисько. Отын котьку монэ возьмало.

Удмурт дэремъёсы трос, сое мон пичи дырысен ик тодӥсько ни. Кеносысь, сюры вылысь песянаелэн дэремъёсыз шуак принцессалэн кадь луо вал, эшшо ке бергаку. Яратоноез - песянаелэн анаезлэн, со мыным вашкала луэменыз дуногес потэ. 

Удмурт нылъёс сярысь супыльто шат? Ӧй кылы.

Эль ныл луысал ке, туж шумпоттысал матысьёсме, яратоноосме.

Юферева Кристина: 

Вордски Дэбес черкогуртын. 

Ваньмон дыръям поръясько, спортэн вырисько. 

Удмурт дэреме вашкалаез ӧвӧл ке но, туалаез вань. 

Удмурт нылъёслэн вожъяськисьёссы гинэ вань. Нош супыльтонъёсты мон уг кылзӥськы. 

Мугорыя мон тупасько зэмос модельлы. Вормон сётоз мыным аслым оскыны но асме умойгес шӧдыны. 

 

Загуменнова Анна: 

Мон Кизнер ёросысь Вылӥ Тыжма гуртысь.

Ваньмон дыр сюре ке, мон лыдӟиськисько, УдГУ-ысь ужрадъёсы ветлӥсько, вотэсын эшъёсын зулисько но картӥ эшъёсыным поръясько.

Аслам дэремэ ӧвӧл , но азьланяз мон сое вуро!  Тужгес ик мыным кельшо монистаос но муресазьёс, соос нырысь синме шедё но чебер пото.

Адӟемпотостэм потэ, куке удмурт нылъёс асьсэлэсь алама малпанъёссэс пушказы возё. Нош собере соосты асьсэ пичи котыразы гинэ верало, куке сое ик луэ трос калык азьын вераны.

Мон аслым выль вормон лэсьто, Эль ныл луи ке. Но мон али ик асме Эль ныл шӧдӥсько ни, малы ке шуоно мон - удмурт нылаш, мон туж гажасько удмуртлыкез, но сое азинтон бордын ужасько.

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын