Керпотӥсь вормись

19-20-тӥ оштолэзе Пермьын "Горд дэрем" калыкуспо мода фестиваль ортчиз. Удмуртиысь та вожвылъяськонэ пыриськизы 4 нылашъёс-модельеръёс. Нош вормон интыен огез гинэ берытскиз. "Ваньмон дыр" вераськиз Люба Широбоковаен но синмаськиз солэн горд дэремезлы. 

Люба Широбокова но солэн горд дэремез

- Люба, кытысь тон таӵе кибашлы но маин выриськод? 

- Мон вордски Якшур-Бодья ёросысь Кекоран черкогуртын. Али дышетскисько Удмурт кун университетысь Искусствоосъя но дизайнъя институтын. 

- Кытысь лыктӥз малпан  "Горд дэрем" мода фестивале пыриськыны? 

- Огпол институтысьтымы дышетӥсьмы шуиз: нылъёс, ойдолэ кыӵе ке вожвылъяськон сярысь ивор утчалом но отчы пыриськом. Шедьтӥм та фестивалез но дэремъёс вурон борды басьтӥським. Куд-огез ӵош дышетскись эшъёсы соку ик куштӥськизы та малпанлэсь, кутскизы мукет уж борды. Нош мыным тунсыко вал учкыны, мар пӧрмоз. 

- Фестивальын трос пӧртэм номинациос вал, тон кудаз пыриськид? 

Мон "Царица" номинациын куинетӥ инты басьтӥ. Дэреме сӥземын вал ӟуч императрицалы Александра Фёдоровна Романовалы. Огъя кылдытэм образэ "Святая" шуыса нимаськиз. 

- Кема-а вурид дэремдэ? Учкисько ке, со тынад туж трос детальёслэсь. 

- Уг ни тодӥськы, кӧня дыр ӵоже вури. Но тани дуръёссэ одӥг но ӝыны нунал куспын пужъятӥ. Дышетӥсе ужме чаклаз но юрттӥськиз. Кылсярысь, тани дэрем азе мае ке пужъятоно шуыса, со вераз. 

- Туж тунсыко дэремедлэн азьыз! Кызьы отчы туспуктэмъёс вуремын? 

Со туспуктэмъёсты мон юри холст вылэ поттӥ. Татчыозь ачим но уг тодӥськы вал, озьы карыны луэ шуыса. 

- Зэмзэ ке, та горд дэремедлы синмаськыса быри ни! Трос-а коньдон басмаослы кошкиз? 

- Куинь ар ӵоже Ижкарын улытозям, мон тодӥсько ни, кытысь дунтэм но чебер басмаос шедьтыны луэ. Оглом дэремме учконо ке, чеспыриослы мон тросгес коньдон быдтӥ. 

- Дышетӥсед сяна, кин ке юрттӥз-а та тыршонад? 

- Анае туж юрттӥз. Дэремез пужъятонме со йылпумъяз. Солы сяна нокинлы та ужез ӧй оскысал. Анае ик Якшур-Бодьялась горд чиньыё пӧзьёсты басьтӥз, аслам соосты утчаны дыры ӧй вал ни. 

- Нош кема-а тупась буёло туфлиосты утчад? 

- Зэмзэ ке верано, мон соосты дунтэмен басьтӥ но акрил краскаосын буяй. Пӧрмиз сыӵе буёл, кудӥз огъя образлы тупа. 

- Мар шуо эшъёсыд но семьяед вормемед пумысен? 

- Огез эше куриз ни солы горд дэрем вурыны. Нош бордаз, пе, та дэремелэсь сирессэ куто. Анае монэ эшшо но паймытӥз. Мон бертыса ӧй вуы на, нош со вотэсысь утчаськыса тодэм ни 3-тӥ интые сярысь. Со ик берло "ВКонтакте" бамам туспуктэмъёслэсь вуэмзэс чакласа улӥз. Но тужгес но выны шумпотӥз кадь. Со вормемелы сокем ӧз куаны, дыр, кызьы калыке потэмелы. Ялан монэ куаретэ нокытчы ветлэмысьтым. Зэмзэ но, мон школаын дышетскыкум, Кунгур мугурке гинэ ветлылӥ, солэсь кыдёке нокытчы вуылэм ӧвӧл. 

- Азьланяз кыӵе малпанъёсыд? Вань-а мылкыдыд коллекция кылдытыны? Яке та выллем вожвылъяськонъёсы пыриськыны? 

 - Уг тодӥськы. Мон керпотӥсь туж. Та ужрад бере мылкыды ӝутскиз ик выль ӵошатсконъёсы пыриськыны. Нош ас коллекциме мон кутски вал лэсьтыны, но дыр ӧвӧлэн дугдӥ. Озьы ик кылле со мынам ӝыныё-урдсо. Кин тодэ, дышетсконме быдтӥ ке, оло быдэсто сое. 

- Сыӵе кибашлы но сыӵе керпотӥсь? Али вормись луыса но, возьдаськонэд ӧз ышы. Кызьы озьы? 

- Школаын дышетскыкум таӵе возьдаськись ӧй вал кадь. Пӧртэм ужрадъёсы мылысь-кыдысь пыриськылӥ. Нош огпол сцена вылын кылъёсме вунэтӥ, сыӵе возьыт луиз. Тӥни собере ик керпотэмысь ӧй дугдылы ни. 

 - Оскем потэ, ӝоген керпотонэд ышоз шуыса! Нош коллекциед быдэсмоз. 

- Тау! 

 Туспуктӥз Богатырёв Дмитрий

 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын