Чечым - удмурт калык бренд

Самвел Сукиасян - Удмуртиын вордскем армян пияш. Дышетске юристлы Удмурт кун унивеситетын. Тросэзлы тодмо "Чечым" нимын печення поттонэныз. 

 

- Самвел, кызьы кылдӥз удмурт нимын "Чечым" бренд?

- Удмурт бренд кылдытон ласянь малпан лыктӥз, удмурт егитъёслэн "Шунды" огазеяськонэнызы тодматскеме бере. Монэ паймытӥз соослэн удмурт кылын сокем тунсыкъяськемзы. Куке кылӥ, кызьы соос удмурт кылын верасько, ымы ик усьтӥськиз. Нош берло ачим но удмурт кылъёсты йырам кельтылыны кутски. Кӧня ке улыса, удмурт кылын быдэс шуосъёсты дышетыны кутски. Мыным кельшиз. 
Нош брендлы ним малпан туж кема кыстӥськиз. "Вконтакте" вотэс бамысь "Удмуртлык" огинысь 800 адями юттӥськиз. Озьы "Чечым" ним кылдӥз. Озьыен, та удмурт калык бренд. 

- Кызьы малпаськод, малы удмуртъёслэн йыразы "Чечым" брендэз кылдытон ӧз лыкты? 

- Малы удмутъёс монэ ӧз азьпалтэ? Уг тодӥськы. Удмуртъёс но тэк уг пуко. Усьтӥськиз ни удмурт кафе "Перепечкин". Нош мон, армянин, удмурт кондитер печенняосты поттон борды кутски. 

- Кызьы окто "Чечым"-ез? Калыклы со кельше-а? 

- "Чечым"-ез окто! Та туж умой! Но кулэлыксэ нырысетӥ интые поттон понна, кулэ 100%-лы тыршыны. Но мон печення поттонэн гинэ уг выриськы, соин ик азьланьскиськом калленгес. Шумпоттэ, берлань ум чигнаське шуыса. 

- Кытысь луэ шедьтыны "Чечым"-ёсты? 

- Соос Ижкарлэн тросаз лавкаосаз вузасько. Лавкаосы оптовой базаос пыр сюро. Озьы милемлы но капчигес. Малпасько, лэсьтоно кыӵе ке презентация, кытысен адямиос быгатозы оскалтыны печеннямес. Оло со ик "Перепечкин"-ын! Удмурт кафеын - удмут бренд печення! 

- Маин висъяське "Чечым" мукет печенняослэсь? 

- Маин? Кондитеръёс тодо ас ужзэс! Но вань на мынам аслам куронэ - нокыӵе химиез ватсано ӧвӧл!  Натурпродукт. 

- Кыӵе малпанъёсыд азьланяз? Азьланьтод-а бизнесад удмурт шӧм пыртонэз? 

- Малпанъёсам мар гинэ ӧвӧл! Ки улам "Чечым" бренд, кудзэ олокыӵе но ӧръёсын азьланьтыны луэ на. Со сяна потэ маке сыӵе кылдытэм, кытын армянэз удмуртэныз огазеяськоз - эшъяськеммес возьматоз. Соин ик, лыдӟисьёслэн малпанъёссы кылдӥзы ке, гожтэ мыным. 

- Тау бадӟым! Мар сӥзьысалыд лыдӟисьёсмылы? 

- Кыӵе ке малпан йырады лыктӥз ке, лэсьтэ сое! Эн кельтэ берлолы! 

 


Бадӟым удмурт диктант - кузьымъёсын шумпоттон

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын