Тузӥ нылъёс нуо блогъёс

Блог - со одӥг/кык/куинь/... муртэн нуиськись вотэсбам. Нуись мурт гожъя татчы малпанъёссэ, иворъёссэ, пуктылэ туспуктэмъёссэ, нош лыдӟисьёс гожъямъёс улэ комментарийёс кельтыны быгато. 

Блоггер - со блогез нуись мурт. 

Блог усьтыны но нуыны быгатэ котькин. Но котькин ик уг быгаты сое нуналысь нуналэ выль тунсыко гожъямъёсын тырмытыны. Эшшо ик удмурт кылын! "Ваньмон дыр" копаськиз вотэсын но шедьтӥз тямыссэ тунсыко блогъёсты, кудъёссэ нуо туала тузӥ удмурт нылъёс. Но эшшо куинь блогез, кудъёсыз нуиськемысь дугдэмын ни ке но, отысь вань мае лыдӟыны. 

 

1. Shushy Nati  

 

Кин нуэ: Наташа Михайлова 
Блоглэн нимыз: Shushy Nati 
Чӧлскон:
http://shushynati.ru/  
Ку кутскиз нуиськыны: 27-тӥ толсур, 2012-тӥ ар 
Мар сярысь гожъя: Натӥлэн туж узыр блогез. Татын ик удмурт азьветлӥсьёсын но тодмо адямиосын интервьюос но, ужрадъёслэн ортчемзы сярысь иворъёс но, аслаз но кузпалызлэн (Микаль Михайловлэн) кылбуръёссы но, Эрик пиезлэн улонэз но мукет. Аспӧртэмлыко вотэс-журнал кадь. 

 

2. Егит кышномурт 

 

Кин нуэ: Наташа Романова 
Блоглэн нимыз: Егит кышномурт 
Чӧлскон: http://kyshnomurt.ru/ 
Ку кутскиз нуиськыны: 10-тӥ куарусёнэ 2010-тӥ арын 
Мар сярысь гожъя: Наташалэн блогез секытэн луэмез сярысь иворысен кутске но али нуналъёсозь вуттэ, куке солэн Италмас но Айно нимо нылъёсыз вордскемын ни. Тужгес но мусо блог! Лыдӟемъя лыдӟем потэ! 

 

3. Мынам малпанъёсы 

 

Кин нуэ: Марина Сергеева (Аськей Маринӥ) 
Блоглэн нимыз: Мынам малпанъёсы 
Чӧлскон: http://udmurto4ka.blogspot.ru/ 
Ку кутскиз нуиськыны: 8-тӥ гудырикошконэ 2013-тӥ арын 
Мар сярысь гожъя: Тужгес но егитэз блог. Нырысетӥ толэзьзэ Маринӥ котькуд нунал выль гожъямъёссэ поттаз, али шергес но шергес. Гожъямъёсаз трос ӟуч кылъёс кутӥсько, озьы капчигес лыдӟыны, пе. Маиныз бордаз кыске та блог? Нырысь ик, Мариналэн гурт улон сярысь, песяняаез но песятаез сярысь гожъямъёсыныз, кыкетӥез, туала улонэз вашкалаеныз ӵошатыса возьматэменыз, куинетӥез, дунне шоры аспӧртэмлыко учкеменыз. 

 

4. Марайко 

 

Кин нуэ: Маша Векшина 
Блоглэн нимыз: Марайко 
Чӧлскон:  http://marjamoll.blogspot.ru/ 
Ку кутскиз нуиськыны: 20-тӥ толшоре 2012-тӥ арын
Мар сярысь гожъя: Маша Векшиналэн блогаз гожъям темаосыз котьку но шуак шорысь воштӥсько. Яке соос мур философи пуштросоесь, яке пичи марыське бадӟым малпанэ вуттӥсесь, яке малы ке пумит луэмез возьматӥсесь но эшшо трос пӧртэм "яке"-ос. Шӧдӥське Машалэн трос тодэмез-валамез но лыдӟиськемез. Интеллигентъёслы татчы! 

 

5. Darali Leli  

 

Кин нуэ: Дарали Лели
Блоглэн нимыз: Darali Leli 
Чӧлскон: http://daralileli.blogspot.ru/ 
Ку кутскиз нуиськыны: 2-тӥ толшоре 2009-тӥ арын 
Мар сярысь гожъя: Огез тужгес но туалаез блог. Удмурт дуннеын гинэ ӧвӧл, трослы паськытгес. Нокыӵе цензуратэк. Зэмос блогинялэн гинэ таӵе блогез луыны быгатэ, дыр. 

 

6. Нунал бӧрсьы нунал 

 

Кин нуэ: Лара Дмитриева
Блоглэн нимыз: Нунал бӧрсьы нунал 
Чӧлсконhttp://ladamiri-lari.livejournal.com/ 
Ку кутскиз нуиськыны: 30-тӥ инвожое 2010-тӥ арын
Мар сярысь гожъя: Али Лара Эстониын дышетске. Соин блогаз но Тарту сярысь, дышетскон сярысь малпанъёссэ пыртэ. Нош азьлогес гожъямъёсаз копаськид ке, мае но уд шедьты! Утчаське, выль Лараез тододы! 

 

7.  Zangarik 

 

Кин нуэ: Ирина Зангарик
Блоглэн нимыз: Zangarik
Чӧлскон: http://zangarik.ru/ 
Ку кутскиз нуиськыны: 4-тӥ куарусёнэ 2011-тӥ арын 
Мар сярысь гожъя: Чебер блогез Ирина Зангариклэн. Со ӵем уг ке но тырмытӥськы, котькуд гожтэмез йылаз-пумаз вуттэмын. Пунктуация ласянь яке кыллэн шонер гожтӥськемез пумысен шекъёсыз но уг сюро. Татын Ириналэн кунгож сьӧры потам туспуктэмъёсыз но мылкыдъёсыз, "Инвис" кинопотонниын ужан нуналъёсыз но удмурт ужрадъёслэн ортчемзы. Малпаськытӥсь Зангариклэн дорез, гуртэз, семьяез сярысь гожъямъёсыз. 

 

8. Burdjos 

 

Кин нуэ: Маша Золотарева
Блоглэн нимыз: Burdjos 
Чӧлскон: http://burdjos.ru/ 
Ку кутскиз нуиськыны: 18-тӥ инвожое 2012-тӥ арын 
Мар сярысь гожъя:  Маша котькытчы вуэ, котьмае туспуктэ. Блогысьтыз шедьтыны луэ кыӵе ке ужрад сярысь гожтэмез но отын лэсьтэм туспуктэмъёсты. Берло дыре Маша Кечолын но мукет гуртъёсын удмурт патиос ортчытъя, нош собере блогаз ивортэ. 
Озьыен, кыӵе ке ужрадэ потыны ӧд вуэ ке, та блогысь со сярысь иворез одно ик шедьтоды. 

НУИСЬКЕМЫСЬ ДУГДЭМ БЛОГЪЁС

9. Удмурт сямен 

 

Кин нуиз: Юля Никитина
Блоглэн нимыз: Удмурт сямен     
Чӧлскон:
   http://tugoko.livejournal.com/ 
Ку кутскиз нуиськыны: 17-тӥ гудырикошконэ 2012-тӥ арын 
Берпуметӥез гожтэм вал: 19-тӥ оштолэзе 2013-тӥ арын 
Мар сярысь гожъяз: Блоглэн нимыз "Удмурт сямен" ке но, пушказ удмурт кылын 2-3 гожтэмез гинэ. Но Юлия Германовналэн блогысьтыз сяна, кытысь шедьтод на Ижкарын ортчем кылъёсъя фестиваль сярысь, финн-угор дунне сярысь шара малпанъёсты, ӝожтӥськонъёсты но визьноданъёсты?! 
А, бен, татын ик Юлия Германовна Удмурт кыллы яратэмез сярысь вера. 

 

10.  Kualaluly 

 

Кин нуиз: Лена Ильина
Блоглэн нимыз: Kualaluly
Чӧлскон: http://kualaluly.ru/ 
Ку кутскиз нуиськыны: 28-тӥ толшоре 2012-тӥ арын 
Берпуметӥез гожтэм вал: 17-тӥ шуркынмонэ 2012-тӥ арын 
Мар сярысь гожъяз: Мускоын улӥсь Леналэн дунне шоры учконэз но, улонэз валанэз но, удмурт дуннеез шӧдонэз но паськыт, соин ик блогез но туж тузӥ. Одӥг комментарийёссэ гинэ но учкид ке, валалод, та блог кельше вал егитъёслы но, мӧйыослы но. Угось лыдӟисьёсыз пӧлын вал Василий Ванюшев но, Пётр Захаров но. 
Эх, Ленӥ, оло улӟытод ик блогдэ?! 

 

11. Чимали 

 

Кин нуиз: Ксюша Ворончихина
Блоглэн нимыз: Чимали
Чӧлскон
http://chimali.ru/ 
Ку кутскиз нуиськыны: 12-тӥ тулыспалэ 2011-тӥ арын 
Берпуметӥез гожтэм вал: 19-тӥ оштолэзе 2013-тӥ арын
Мар сярысь гожъяз: Ксюша Чимали но Чудья Жени - паренъёс. Кыкназы но ас дуннеязы уяло. Но огзэ валаны луэ ке, мукетыз воксё но аспӧртэм мурт. Озьы ке но, кыкназылы но блог нуыны умой луысал. 
Чималилэн блогысьтыз Ван Гог, сюрреализм, театр, уйвӧтъёс но ишанъёс сярысь гожъямъёсты шедьтоды. Пуш дуннедэс узырмытэмды потэ ке, кутсконысеныз пумозяз лыдӟе та блогез.
Ну, коть визьмо кылъёсын узырмытоды визькыллюкамдэс. 

 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын