"Малпа выль кыл": йылпумъянъёс

21-тӥ коньывуонэ "Перепечкин" кафеын "Малпа выль кыл" вотэсӵошатсконлы йылпумъянъёс лэсьтэмын вал. "Ваньмон дыр" тодӥз вормисьёслэсь нимъёссэс.

"Малпа выль кыл" - выль удмурт кылъёс кылдытон вылысь вотэсӵошатскон, кудзэ радъязы МУШ ужан огин, "Удмуртлык" дэменлык но Удмурт егитъёслэн "Шунды" огазеяськонзы. Та ӵошатскон удмурт кылбурчилы но выль кылъёс кылдытӥсьлы, Кузебай Гердлы, вордскем тырысеныз 115 ар тырмемезлы сӥземын вал. 

Ӵошатсконлэн нырысетӥ люкетаз вань мылкыд карисьёс радъясьёсын ӵектэм кылъёсты удмурт кылэ берыктӥзы. Вожвылъяськонлэн кыкетӥ люкетаз жюри но удмурт кылэз тодӥсьёс малпам кылъёс пӧлысь тужгес но устооссэ бырйизы. Калыклэсь малпамзэ но жюрилэсь дунъямзэ лыдэ басьтыса, вормисьёслэн нимъёссы туннэ тодмо луизы. 

 

Озьыен, нырысетӥ инты басьтӥз Анатолий Мурзин. Малпам кылъёсыз понна калык 290 балл сётӥз, нош жюри - 384,5 балл. Ваньмыз ӵош - 674,5 балл. 

Ачиз Анатолий та ужрадэ лыктыны ӧз быгаты. Со али Тарту университетын дышетске. 

 

Кыкетӥ интые потӥз Наташа Михайлова. Калыклэн дунъетэз - 451 балл, жюрилэн - 188,5 балл. Оглом 639,5 балл. 

Наташа озьы ик лыктыны ӧз быгаты, угось со Татарстанын улэ. Но "Ваньмон дыр"-лы со таӵе малпанъёссэ вераз: 

"Нырысь шумпотэмме вераме потэ. Уг оскиськы вал, ваньмыз озьы пӧрмоз шуыса. Ӵошатскон сярысь тодэме бере но кузпалэлы серекъяса гинэ шуи вал, ойдо выль кылъёс малпаса эскером, оло асьмелэсь кылъёсмес быръёзы, нош собере соос ик вераськонэ пырозы. Озьы ик пӧрмиз. Тау картэлы, уго со но юрттӥськиз мыным та ужам. Оскиз мыным. Нош мон оскисько, выль кылъёс одно ик вераськонамы пырозы шуыса. Нырысь "сиськонниослы", "огъяулонниослы" но калыкъёс пумитъяськизы, соос валантэмесьгес пото вал. Но али дышизы ни ук. Таосызлы выль малпам кылъёслы но озьы ик дышозы. Каллен-каллен одно ик вераськоназы но пыртыны кутскозы. Малпасько, нырысь ик та кылъёсты онлайн-кыллюкаме тыроно. Уго мон ачим весяк онлайн-кыллюкамез ужам кутӥсько. Собере газетъёсын, журналъёсын со кылъёсын гожъяськоно.  Нырысь-вылысь вӧзаз ӟуч кылзэ но пуктылоно, нош собере удмуртсэ гинэ кельтоно. Калыклы валамонгес мед луоз шуса. Озьы калык каллен-каллен дышоз со кылъёслы." 

 

Куинетӥ инты басьтӥз Лукерья Шихова. Калыклэн дунъетэз - 215 балл, жюрилэн - 270,5 балл. Ваньмыз ӵош - 485,5 балл. 

Вормисьёс пӧлысь со огназ та сӥлы карон ӝытэ лыктыны быгатӥз. "Ваньмон дыр"-лы Лукерья вераз: 

"Мон Удмурт филологи факультетын дышетскисько. Соин милемлы ялан выль удмурт кылъёсты дышетоно луэ. Экзамен сётыку но чаклаське, удмурт кылын-а "предложение", "синтаксис", "глагол" выллем кылъёсты вераськом яке ӟучен-а. Соин филологъёс выль кылъёсты малпасьёсты уг ярато, котьку но вылазы кӧтсы ӝож. Эшшо ке со ик "предложение" кылэз нырысь ми "веран" шуыса дышетӥм, собере сое "шуос" ниманы кутскизы. Яке одиг книгаын та кыл тазьы нимамын, нош кыкетӥяз мукет сямен. Соин та ӵошатсконэ мон нырысь пыриськыны ӧй дӥсьты, собере асме утчаме потӥз ик. Малпасько, али филолог-эшъёсы тодӥзы ке, мон вормисьёс пӧлы пыри шуыса, монэ но тышкаськемысь уз дугдэ (серекъя). Нош мукет ласянь учконо ке, финнъёс асьсэ кылзэс выль малпам кылъёсын ӧй тырсытысалзы ке, оло али кылзы но ӧй луысал ни. Нош ми, удмуртъёс, маин пӧртэмесь? Азьтэмъяськемысь дугдоно ни вал..." 

 

Вормисьёс сяна, Сергей Максимовен нимысьтыз пусъемын на Маркова Наталия. Нош "Шунды" огазеяськонэн пусъемын Муш Нади, Роза Николаева но Ольга Угланова. Таос лыктыны ӧз быгатэ бере, кузьымъёссы соосты витё на.  

Ваньзылы ӵошатсконэ пыриськисьёслы "Малпа выль кыл" пусэн значокъёс кузьмамын. Озьы ик табере ваньзы соос 10%-лы дунтэменгес "Перепечкин" кафеын сиськыны быгато. Со сяна, вормисьёс коньдонэн, футболкаосын но визьмо книгаосын пусъемын на. 

Оглом калыкез сокем ик трос ӧй вал ке но (ӵошатсконэ пыриськисьёс но, вормисьёс но, жюри но пал киысь чиньыосын лыдъямон вал), вормисьёсты сӥлы карон ӝыт умой ортчиз. Но та выллем ужрадъёсты сиёнэз кушан, тяпкетон, тусьты-пуньыен куашетон куараос чузъяськемъя ортчытоно ӧвӧл, дыр. Угось ачиз ӵошатскон  воксё мукет ӧрысь потэ. Соин ик тодмо ӧвӧл, кӧтсы-а тыриз люкаськемъёслэн яке визьёссы-а выль кылъёсын узырмизы. 

 

Тужгес но устооссэ малпам кылъёсты татысь учкыны луэ:
 
http://mushgroup.wordpress.com/2013/10/21/mvk-vormem-kyljos/ 
Учкыны но вераськон кылады пыртыны. 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын