Выль куараос - кинъёс соос?

26-тӥ коньывуонэ 17:00 часын Филармониын "Выль куара" крезьгуро шоу-проект ортчоз. 10 егит кырӟасьёс, кудъёсызлы быгатонлыкъёссэс муромытыны «Шулдыр ӝыт» ансамбльысь 10 кизилиос-дышетӥсьёс юртто, нюръяськозы элькунмылэн тужгес но чеберез выль куараез луон понна! 

1-тӥ, 2-тӥ но 3-тӥ интыосты "Шулдыр ӝыт" ансамбльысь тодмо но дано артистъёс быръёзы. Со сяна, учкисьёс тужгес но чеберез "выль куара" понна куаразэс сётыны быгатозы. 

Нош "Выль куара" проектлэн вормисез но элькунмылэн тужгес но чеберез егит куараез басьтоз валтӥсь кузьым - радиомикрофон. Ваньзы вожвылъяськонэ пыриськись егит кырӟасьёс но кузьымъёсын пусъемын луозы. 

"Ваньмон дыр" тодматскиз "выль куараосын" но котькудӥзлы быдэн 5 юан сётӥз. 

 

1. Кытысь тон? Маин выриськод?

2. Кин тынад дышетӥсед?

3. Кыӵе кырӟанэз тӥ быдэстоды?

4. Малы та вожвылъяськонэ пыриськиськод?

5. Та проектын вормон – мар со?

 

 

Лиана Корепанова:

1. Мон дышетскисько Удмурт Элькунысь лулчеберетъя колледжын, 2-тӥ курсын. Ачим Дэри ёросысь. 

2. Дышетӥсе Регина Музиянова. 

3. Кырӟаломы ми "Ой эсьмаса, эсьмаса" кырӟанэз. 

4. Мыным дэмлазы пыриськыны, но мон соглаш луи. Вормо-а, уг-а, но асме возьмато. 

5. Мон понна вормон - со ваньмыз. 

 

 

Артемий Гаврилов: 

1. Мон Дэбес ёросысь Удлем гуртысь. Али Удмурт Элькунысь лулчеберетъя колледжын дышетскисько.

2. Наталья Ушакова.

3. Солэсь "Мае вераны"кырӟанзэ.

4. Дыр вуиз асме возьматыны.  

5. Вормон – со дасяськемлэн дунъетэз.

 

Катя Измайлова:

1. Мон вордскемын, будэмын но улӥсько Ижкарын. Туж яратӥсько кылбуръёсты но кырӟанъёсты гожъяны. Тунсыкъяськисько пӧртэм ӟуч но удмурт книгаосын. Озьы ик яратӥсько классической гуръёсты кылзыны. Быдэстӥ крезьгуръя школаез, туала удмурт крезьгуръя «Камали» студие ветлӥсько. Студилэн атаез – Эркишев Анатолий Викторович, кудӥныз мон туж данъяськисько. Озьы ик али Политехнической колледжын дышетскисько.

2. Мынам дышетӥсе Ганьков Геннадий Николавевич.   

3. Кырӟан сярысь али номыр уг вера, малы ке шуоно со выль премьера луоз.

4. Та проектэ мон асме чаклан понна пыриськи: быгато-а асме сцена вылын возьыны, аслэсьтым лулпушме кырӟан пыр адямиослы возьматыны.

5. Мон понна вормон - со куке тон астэ но аслэсьтыд кышканъёстэ вормыным быгатӥськод.     

 

Софья Булдакова:

1. Мон Ижкарысь. Дышетскисько Элькунысь крезьгуръя колледжын, 2-тӥ курсын.

2. Наталья Стерхова.

3. «Сьӧд дэреме».

4. Монэ Наташа Ушакова ӧтиз. Учком ни, мар пӧрмоз.  

5. Мынам туж вормеме потэ. Вормон сётоз мыным эшшо но бадӟым мылкыд но усьтоз вокалистлэн улоназ сюрес.

 

Алина Егорова:

1. Мон Кизнер ёросысь, Вужь Бодья гуртысь, нош али ИГМА-ын дышетскисько. Туж яратӥсько кырӟаны. Шуыны луэ, кырӟан - кыкетӥ мон. Соин, малпасько, улонэ крезьгурен пыраклы геӟаськемын луоз шуыса.

2. Павел Васильев.

3. Удмурт блюз.

4. Мон малпасько, та проектын быгатозы сётыны выль профессиональной дасян но юрттон азьпал творческой улонэлы. Мон усьто мар ке но выльзэ, быгатонлыкме но быдӟымато.

4. Вормон - со адямиос пӧлы потон но зэмзэ соослы кельшон. Тон соослы тунско ке - со нырысетӥез бадӟым вормон ини.

 

Наташа Шараева: 

1. Мон Башкортостанысь Можга гуртысь. Яратӥсько кырӟаны, нош ваньмон дыръёсам мукет кырӟасьёсты кылзыны кельше. Крезьгур - со мынам улонэ. 

2. Мынам дышетӥсе Владимир Мальцев. Но со али висе, соин ик мон Руслан Серебренниковен кырӟало.

3. Кырӟалом "Веськрес льӧмпу" нимо кырӟанэз.

4. Куараме ваньзылы адӟытэм потӥз. 

5. Ворми ке, шумпото. Ӧй вормы ке, озьы кылдэмын, дыр.  

 

Марина Черепанова:

1. Мон улӥсько Дэри ёросын. Эстрадно-джазовой «БИС» студиын кырӟасько. Озьы ик али Удмурт Элькунысь лулчеберетъя колледжын дышетскисько. Мынам улонэ пыр сцена вылын ортче.

2. Мынам дышетӥсе - Яна Белослудцева.

3. Ми кырӟалом ньыль кузя: Регина Музиянова, Наташа Ушакова, Яна Белослудцева но мон. Кырӟан нимаське «Кыдёкысь тӧл сьӧрысь».

4. Мон быгато возьматыны аслэсьтым вокалме.

5. Ворме тужгес но кужмоез.

 

 

Аня Образцова:

1.Мон Дэбес палась, дышетскисько УдГУ-ын, искусствоя но дизайнъя институтын. Соин суредаськонэн но театрен вырыны туж яратӥсько.

2. Дышетӥсе Руслан Серебренников.

3. Кырӟалом «Кылдысин» кырӟанэз.

4. Малпай, таӵе проектъёс трос уг кылдо, одно ик пыриськоно.

5. Вормон сярысь уг малпаськиськы. Та проект мон понна выль вамыш мед луысал.

 

 

Андрей Камалтдинов:

1. Мон вордӥськемын но будэмын Башкириын. 2006-тӥ арын Иже вуи, Удмурт Элькунысь лулчеберетъя колледжын дышетски, нош али УдГУ-ын 5-тӥ курсын фольклорез эскерисько но быдэстӥсько.

2. Дышетӥсе Платонова Галина.

4. Малпай асме эстрада удысын чакланы. Мон ведь ӝыны улонме калык кырӟанъёсты быдэсъяй, табере эстрадае кыске. Асме но куараме сцена вылын возьматэме потэ.

5. Вормон понна уг тыршиськы. Валтӥсез – та проектэ пыриськеме. Туж потэ, учкисьёслы мед кельшом шуыса.

 

 

Игорь Уткин: 

1. Мон Кияса ёросысь Карамас-Пельга гуртысь. 

2. Дышетӥсе Анна Плотникова. 

3. "Эх, луысал ке" кырӟанэз. 

4. Таӵе проектъёсы мон ӧй на пыриськылы. Но вожвылъяськонъёсын котьку тунсыко, кин тужгес устоез но кин вормоз. Калык понна но ачим понна выльысь сцена вылэ потэме потэ. 

5. Мон понна вормон валтӥсь интыын ӧвӧл.  

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын