Вормизы выль куараос

26-тӥ коньывуонэ Филармониын "Выль куара" крезьгуро шоу-проект ортчиз. 10 егит кырӟасьёс пӧлысь, кудъёссэ дышетӥзы "Шулдыр ӝыт" ансамбльысь 10 кырӟасьёс, быръемын вал тужгес но чеберез куара. Зэм-а?  

Нырысь ик вераме потэ, берло дыре егитъёс Филармониез палэнтӥ ортчо. Одӥгъёсызлы уг яра "Шулдыр ӝыт" ансамбльлэн вошъяськисьтэм репертуарез, мукетъёссэ дуно билетъёс кышкато, нош куинетӥосызлы чурыт пуконъёс адӟемпотостэм йӧто. Соин ик мон кема малпаськи, мыноно-а, ӧвӧл-а та ужрадэ. Но шуак ивор вуиз, "Малпа выль кыл" вожвылъяськонын вормемед понна, ми тыныд ӧтён сётӥськом, озьыен, дунтэк пыремед луоз". Мон понна со шумпотон вал, котькыӵе студент таӵе кузьымъёслы шумпотэ, дыр. 

 Я, вуи мон Филармоние. Интые 15-тӥ радын вал. Ачим пичи бере, сыӵе кыдёкын пукон инты монэ инбамысь берен музъем вылэ васькытӥз. Мукет ӧтем муртъёс та радын ик пичи пиналъёсын пукизы, таиз воксё абдрамон вал. 

Тани концерт-вожвылъяськон но кутскиз. Сое Алексей Ложкин тёпак огназ нуиз. Но котькуд потэмаз Геннадий Ганьков вылэ чӧлскылӥз, кудӥз та ӝытэ "мемлы" пӧрмиз кадь. Нош мон малы ке малпай, Ложкинэз Саша Бикузинэн валче пуктысалыд ке, кин кинэ серекъятыса быдтысал меда... Ярам ай, кыкетӥез "Элькуновидениез" нуоз. 

Вожвылъяськонлэн нырысетӥ люкетаз 10 егит кырӟасьёс огназы сцена вылэ потазы но кырӟазы. Котькудӥзлэн потон азяз пичи видео ӝуатскылӥз, кытын кырӟась асэныз тодматӥз. Таиз мыным тужгес но кельшиз. Но малы ке видео фон - шкаф ӧсъёс - серемме поттӥз. 

Табере вакчияк верано, дыр, кин маин пукисьёсты паймытӥз. Кӧня малпаськи, критика гожтоно-а, ӧвӧл-а... нокин медаз но куатаськы кадь, критика но кулэ кадь... гожто ик! Кин укыр куатаськись, отӥзэ эн ни лыдӟе. 

Нырысь ик сцена вылэ потӥз Софья Булдакова, кудӥз "Сьӧд дэреме" кырӟанэз быдэстӥз. Ачиз Софья туж чебер, дэремез но чебер... но та кырӟан со понна ӧй вал кадь, куараез кытӥ-отӥ воксё ляб чузъяськиз. Малы ке тросэз дышетӥсьёс егит кырӟасьёслы тупасьтэм кырӟанъёс бырйиллям. 

Собере залэз улӟытӥз Катя Камали Измайлова. Кырӟамезъя эктэм ик потыны кутскиз. 

Азьланьтӥз концертэз... уг ни тодӥськы, кин, соин ик черодтэк азьланьто. 

Артемий Гаврилов потӥз пиджакен, бубылиен, сыӵе зэмос принц кадь. Кырӟамез но ассэ сцена вылын йӧно воргорон кадь воземез Николай Басковез тодам вайытӥз. Малпасько, вань нылъёслэн но нылкышноослэн сюлэмъёссы соку золгес йыгаськыны кутскизы. 

Аня Камали Образцова малы ке лябгес кырӟаз. Яке мон солэсь быгатонъёссэ тодыса, укыр вылӥ куронъёс пуктылыны кутски ни. Но зэм ик, трослы умойгес быгатэ ук! 

Башкириысь Андрей Камалтдинов! Мон уг тодӥськы, кытӥ со азьло ветлӥз, малы ке шуоно со сыӵе мусо-о-о... ой, зарни куараё, шуыны медӥсько вал! Кызьы сое пумитаз зал, кыӵе зол чабиз! Мыным соку нокин кулэ ӧй вал ни, вормисез шедьтӥ кадь. 

Алина Егорова но солэн зол куараез! Маиныз ке но тупа Алина Антоновалы. (Тужгес но куке Антонова Zaz-лэсь кырӟанъёссэ быдэстэ). Егоровалэн крезьгурез валанэз но кырӟасьёсты тодэмез бадӟым. Со туж висъяськиз асьме удмурт кырӟасьёслэсь, кудъёсыз экспериментъёслэсь кышкало. 

Игорь Уткин учкисьёсты басьтӥз балалайкаеныз. Ну таизлы зал быдэс кырӟам ӵоже чабиз ке чабиз. 

Марина Черепановалы укыр "щекщи" образ лэсьтэмын вал. Солы но, Лиана Корепановалы но, Наташа Шараевалы но нырысетӥ люкетаз укыр тупасьтэм кырӟанъёс быръемын кадь вал. Ляб кырӟазы но ӧз усьтӥське. 

Антракт дыръя учкисьёс асьсэлы кельшись кырӟась понна куаразэс сётыны быгатӥзы. 

"Выль куара"-лэн кыкетӥ люкетаз егит кырӟасьёс "Шулдыр ӝыт" ансамбльысь кырӟасьёсын ӵош кырӟазы. Татын Лиана но Наташа усьтӥськизы. Соос калык кырӟанъёсты быдэстӥзы но асьсэлэсь зол палзэс возьматӥзы ик! Мукет егитъёсты учконо ке, кин ке дышетӥсезлэн вужераз кылиз, кин ке юри со сьӧры ватскиз, нош кин ке ассэ татын но возьматӥз. Тодам кылизы Руслан Серебренников но Аня Образцова - "Кылдысин" кырӟан шуг ке но, таос быгатӥзы; Наташа Ушакова но Артемий Гаврилов - одиг эктэмзы гинэ но кыӵе зол вал, нош кыкназылэн но ӝуась синъёссы образъёссэс йылпумъяз; Павел Васильев но Алина Егорова - "Удмурт блюзэз" быдэстӥзы бере, куараоссылэсь зол луэмзэс валаны быгатӥськоды, дыр; Геннадий Ганьков но Катя Измайлова - мон али но уг валаськы, кызьы Катя быгатӥз дышетӥсезлэн аспӧртэмлыко куараезъя тупатскыны, со вал туж чебер; Анна Плотникова но Игорь Уткин - арган но балалайка - зал чабиз но, шулаз но.  

Озьыен, вормизы: 

1-тӥ инты - Алина Егорова (кудӥныз ми лыдӟисьёсты тодматӥм ни вал);

2-тӥ инты - Андрей Камалтдинов; 

3-тӥ инты - Лиана Корепанова но Марина Черепанова. 

Вылӥ гожтэмез лыдӟыса, валалоды, дыр, куд-ог вормисьёслэн интыязы мукетъёсыз луыны кулэ кадь шуыса. Но огзэ мон валай, "Выль куара" вожвылъяськонын вормизы зэмзэ но та дырозь тодмотэм выль куараос. Нош "Шулдыр ӝыт" лэсьтӥз воксё выль но тунсыко проект. Кин ӧй вал, гырпумъёстэс таре куртчылэ ни!  

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын