Удмурт филологъёс паймытӥзы

Толон Удмурт кун университетын ортчись "Огни большого ВУЗа - 2013" вожвылъяськонын удмурт филологъёс возьматӥзы Эдна Мазиялэн "Игры на заднем дворе" пьесаезъя спектаклез, кудзэ адӟыны тросэз дась ӧй вал. 

Вакчияк пьесалэн пуштросэз сярысь: быдэ вуымтэ нылаш аслэсьтыз бадӟым пиос пӧлы сюре. Соос вӧзын со но ассэ бадӟымен возьматыны тырше. Сур юэ, пиосты гочатыса эктэ. Собере пиос сое эриктэмало. Суд кутске: нош кин янгыш? 

Спектакльын вить мурт шудӥз: соос ик егитъёс но, соос ик судэз нуисьёс. Пель сьӧрын али но Вова Вахрушевлэн курись куараез но Люба Киселёвалэн курадӟонэз возьматӥсь ымнырыз. Возьмамтэ шорысь луиз тодмо кырӟасьлэн Иван Белослудцевлэн шудэмез. Вылтусызъя туж тупаз аслаз героезлы Женя Китов. Нош Никита Зайцев кемалы тодэ кылёз на со муртэн, кудӥз сцена вылысен вераз сыӵе арбериосты, кудъёссэ Россиысь калык яке юн горыса, яке юн гордэктыса пумита. 

Быдэс спектакль ӵоже залын вал пӧртэм мылкыдъёс: кин ке дугдылытэк серекъяз, кин ке бӧрдон калозь вуиз, нош кин ке возьдаськыса пукиз. Вал сыӵеез но, кин ӧсэз дыг! ворсаса кошкиз... Нош пумаз ваньзы таос юн чабизы. Озьыен, спектакль шедьтӥз учкисьсэ? 

Ӧйтӧд. Али шуг вераны. Тодмо огез: та спектакль сярысь трос вераськозы на. 

Иван Белослудцев, Женя Китов, Вова Вахрушев, Никита Зайцев

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын