Туала кылбурчиос - пиос

Толон Удмурт кун университетын "Удмурт кылбур BATTLE" ортчиз. Кузебай Герд нимо гимназиын дышетскисьёс удмурт филологи факультетысь студентъёсын ӵошатскизы.  

Кылбуран - со туж секыт уж. Кинлы ке кыӵе ке кылбур кельше, нош кинлы ке уг, куинетӥезлы со воксё но валантэм потэ. Туала вакытэ кылбурчиос рифмаосты но ритмез уг но чаклало ни, кылбуранын эрик кузёяське. Таин валче эшшо но шуг кылбуранлэсь шонер катъёссэс шедьтыны. Вань меда соос? Таӵе малпанъёсын мон лыктӥ та ужрадэ. Жюрие пуктыкузы но йырам бергаз: вормыны кулэ эшъяськон! Но... 

Тани люкаськизы вань жюриос-кылбурчиос - Зинаида Рябинина, Василий Ванюшев, Виктор Шибанов. Но мон. Василий Михайлович уг но тоды вылэм, гимназиын дышетскисьёс студентъёсын ӵошатскозы шуыса. Тодӥз но ӧз оскы гимназистъёслэн зол кылбураны быгатэмзылы, пичиесь на ук. 


Кузебай Герд нимо гимназиысь дышетскисьёс 

Но тани гимназиын дышетскисьёслэн но удмурт филологи факультетысь студентъёслэн батлзы кутскиз. Вераны кулэ, соос нимаз командаосын вал. Кыказ но быдэн сизьым егит кылбурчиос. 


Удмурт филологи факультетысь студентъёс 

Нырысетӥ этапын котькудӥз командае пыриськись асэныз тодматӥз. Нош тодматӥз кылбур пыр. Гимназиын дышетскисьё кузь кылбуръёсазы вань быгатонъёссэс вераса куштӥзы ке, удмурт филологи факультетысь студентъёс валтӥсьсэ куинь-ньыль чуре тэрытӥзы. 

Оглом ужрад яратон темалы сӥземын вал бере, кыкетӥ этапын кылбурчиос сётэм куать темая кылбуръёссэс лыдӟизы:
1. "Ой, гуртэ, вордскем гуртэ..."
2. "Тӥ понна мон котьку но нылпи"
3. "Эмезь кисьман вакытэ..."
4. "Пилиськиз зарни чаша, табере уз пилиськы со ноку..." 
5. "Малпанлэн сопал пумаз вуи ке..." 
6. "Яратон, яратон, мар меда сыӵе тон?" 


Ужрадэз нуисьёс - Вова Вахрушев но Алина Герасимова 

Ӝытэз нуисьёс яло темаез, собере командаосысь быдэн одӥг кылбурчиос кылбурзэс лыдӟо. Та этап котькуд кылбурчиен нимаз тодматскыны юрттӥз. Жюриос но кылзыны лыктэмъёс юанъёс но сётканы быгатӥзы. 


Даша Шиляева 


Юля Пчельникова 


Марина Пахомова 


Марина Дозорова 

Куинетӥ этап "Кылбур-бугор" нимаськиз. Командаослы ваньзылы тодмо "Лудкечпи гебыр-гебыр..." чурез яратон темая азьланьтоно вал. Нырысь огез команда чур малпа, собере мукетыз выль чурзэ ватса. Кык командаослэн тыршемзыя, таӵе серемес кылбур пӧрмиз: 
*** 
Лудкечпи гебыр-гебыр 
Синмаськиз ук ӟичылы, 
Нош ӟичы - куакапилы. 
Куакапи сое чупаз, 
Не бамаз, а ымдураз. 
Чик ӧз кельшы та солы, 
Чупаськын, пе, дышетскы. 
Лудкечпи кылиз куанер, 
Соку вуиз ӟичы-бигер. 
Милямез удмурт ке но, 
Ӵуж ӟичы выриз йӧно. 
Отӥ-татӥ котырске. 
Куакапи шуак вуэ. 
Вот соку ни паймоно: 
Куакалэн йырыз гоно. 
Кызьы талы синмаськоно? 
Синмасько ай парсьпилы, 
Чебергес ук кык поллы. 
Кечпимы гебыр-гебыр... 
Синмаськемын ук куанермы. 
Тани быриз ук кылбурмы. 
*** 
Шӧдӥське командаослэн кылбурлэсь рифмазэ чакланы тыршемзы, нош пуштросэз... Сынано на, дыр, тае. 

Ньылетӥ этапын "сюлэм" кылъя акрокылбур гожтоно вал. Кыкез но командаос вакчи дыр куспын тузӥ кылбуръёс гожтӥзы. 

Нош витетӥ этапын асьсэ гожтэм кылбурзыя кырӟан быдэстоно вал. Огез команда яратон сярысь кылбурзэ кырӟанлы пӧрмытӥз, нош мукетыз - анай сярысьсэ.  

90 но 91 балл люказы командаос. Озьыен, одӥг баллы азьлане потӥзы но вормизы... Кузебай Герд нимо гимназиысь дышетскисьёс. Ӟечокъёс!  Но командаосын быдэн сизьым кылбурчи вал ке но, зэмос батл удмурт филологи факультетысь Алексей Пикулев но Кузебай Герд нимо гимназиысь Григорий Иванов вискын гинэ ортчиз кадь. Табере возьыт ни шуыны, туала удмурт кылбурчиос пӧлын одӥг нылъёс гинэ шуыса. Уд оскиське ке,  рэп кырӟась Лёшаез но арганэн шудӥсь Гришаез кылзэ.


Григорий Иванов (татын видео)


Алексей Пикулев 

Озьы ик жюри бырйиз тужгес усто кылбурчиосты: 
1-тӥ инты - Алексей Пикулев; 
2-тӥ инты - Григорий Иванов но Марина Пахомова; 
3-тӥ инты - Анастасия Тутаева но Ульяна Пчельникова. 

Зэмзэ верано ке, та ужрадлэсь ортчемзэ юри пыр-поч гожтӥ. Малпасько, таӵе батлъёс школаос вискын но ортчыны кулэ. Сценарий дась ни, азьлань! 

 

Лукерья Шихова 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын