IB&4CP группалэн нырысетӥ концертэз

Толон Филармониын IB&4CP группалэн нырысетӥ концертэз ортчиз. Нимаськиз со "Кылзы сюлэмдэ". 

Кутскон азьын. Нырысь ик учкисьёсты паймытӥзы горд но тӧдьы буёло дӥсьёсын мальдӥсь Les Partisans театрысь артистъёс. Кузьылиос мында! Котькытын! Малы ке кышкан но кылдӥз, соос учкисьёслэсь тросгес шуыса. Ярам, озьы вылымтэ. Кыкетӥ кышкан кылдӥз, куке котыр учкыса валанэ вуиськиз, лыктэмъёс пӧлысь ӝыныез удмуртъёс ӧвӧл. Берын пукисьёс пӧлысь кин ке ӟуч сямен шуиз на: "Тӥни иське, кӧня соос, удмурт кырӟасьёсты дунъясьёс..." Таос группаысь крезьгурчиосты кылзыны вуиллям, лэся. 

Кутскон. Но тани потӥз Павел Поздеев, кудӥз радъяз та концертэз. Потӥз но группа сярысь маке кема вераз. Ӟуч сямен. Собере гинэ потӥзы пиос но Иван Белослудцев. Чебересь. 

Нырысетӥ люкет. Сыӵе чебер потэм пиосты зал кичабыса пумитаз. Сюлэм золгес йыгаськыны кутскиз, тани-тани Ваня аслэсьтыз кырӟанъёссэ быдэстоз. Но со интые Ваня вашкала кырӟанъёсты туала крезьгуръёс улсын кырӟаны кутскиз. Паймымон. Бен, со ваньмыз чебер ке но вал, номырин висъяськисьтэм кырӟанъёсты ӝоген кылзыны акыльтӥз. Мырдэм пукиськиз ни кыкетӥ люкетозяз. Но таӵе дыръёсы малпано, умой ки улын вань пелепон но вотэс, нош отын котьмар кар: потэ ке Instagram-ад пыр, потэ ке "Вконтакте"-ад вый. Бен, бен, кыкысьтыз но пелепонъёсы пуктэм туспуктэмъёсты адӟыны быгатӥськоды, со понна #ванязбс, #IB4CP хештегъёсты гинэ зӥбоно но тӥни, азяды концертысь нырысетӥ туспуктэмъёс потозы. 

Кыкетӥ люкет. Куке оскон ышиз ни, мар ке воштӥськоз на шуыса, экран вылын #туала кыл потӥз. Тани татын зал но улӟиз кадь, пукыса но эктыны выриз Ванялэн туала кырӟанъёсызъя. Но талы но кема шумпотыны ӧз кылды, ӝоген концерт йылпумъяськиз. Куке берпуметӥ "Тау тыныд" кырӟанэз азьын Ваня микрофонэ вераны выриз, концерт йылпумъяське, таиз берпуметӥ кырӟан шуыса, нокин ӧз оскы кадь. Сыӵе вазь? Али? Куке калык валаны кутскиз группалэсь "шӧмзэ"... 

Иван Белослудцев. Бен, Ваня сокем ик кемалась уг на кырӟа ке но, солы дышетсконо ни, дыр, залэн вераськыны. Куараез вань, группаез вань, ачиз но чебер, нош вераськыны яке кышка, яке мар. Куддыръя маке вераны выриз ик ке но, сокем тулкымъяскеменыз йырин, малпанзэ пумозяз ӧз вуттылы кадь. 
Вашкала кырӟанъёсты кырӟакуз шӧдӥське вал, кышка, сое вылтусызъя но валаны луэ вал. Аслэсьтыз кырӟанъёссэ быдэстыкуз, берытскиз ас ӧраз. Ӟечок! Но эктон выросъёсаз кӧня ке эрикез ӧз тырмы. 
Эшшо висъям потэ на вал одӥг пичи мае ке. Одӥг кырӟаназ Ваня анаезлы вазиське: "Ой, анай, ма каром табере" шуыса. Та чуръёсты быдэстыкуз, со сыӵе мусо мыняса анаез пала учкиз. Тӥни соку гинэ Ванялэн учкисьёсын контактэз кылдӥз ик кадь. Мукет дыръя синъёсыз кытчы ке кыдёке борддоре лякиськемын вал. 

Группаысь крезьгурчиос. Номыре уг валало ке но, соослы кельше со, мае соос шудо. Мыняса учконо вал выросъёссы но ымнырзы шоры. Таосты котькудзэс нимаз видеое пуктоно вал. Мусоесь! 

Les Partisans. Бен, та театр котьку но висъяське. Татын но соос умой шудӥзы. Шудӥзы концертлэн нырысетӥ но кыкетӥ люкетъёсыз вискын сцена вылын, нош мукет дыръя - залын. Дугдылытэк. Котькуд минутсэ. Но валамон, соос татчы концертлэсь дырзэ кыскон понна пуктэмын вал шуыса. Яке малы соку пу сюлэм сяна, группа но таетр вискын нокыӵе мукет герӟетъёс ӧй вал?.. 

Учкисьёс. Татын ӧй вал быдэ вуымтэ нылъёс, кудъёсыз быгатысалзы плакатъёсын сылыны, урмемъёс кадь кесяськыны яке концерт бере Ваняез сяськаосын но шудонъёсын липыны. Вал кылзӥсьёс, кудъёсыз умой крезьгурез кылзон понна вуизы. Соин ик концерт ӝыныё тырмемын вал. Но малпаськоно ке, огшоры улонын нырысетӥосыз (гуртъёсысь быдэ вуымтэос) Ваняез тросгес но ӵемгес кылзо, кыкетӥосыныз ӵошатыса. Ярам коть пумаз, Ванялы сӥзем фан-группаез нуись нылъёс султӥзы но "Молодцы" шуыса кесяськыны кутскизы, нош зал сьӧрысьтызы ӧз кыльы. 

Мукетыз. Концерт сярысь ивор нокытын рос-прос сётэмын ӧй вал. Мар луоз концертын - таиз но ватэмын вал. Соин ик ӝыныё тырмем заллы паймонэз ӧвӧл, дыр. Калык пӧлын нош воксё вераськонъёс мынӥзы, концерт уз луы, дыр, шуыса. Луиз ик! Умой! Но со буш интыос сярысь та концертэз радъясьёслы азьло ик тодмо вал бере, кутэ но Кезысь ик дышетскисьёсты автобусэ пуктыса вае вал. Соослы шумпотон луысал. Зал но буш ӧй луысал. Эх! кӧня ...салъёс... 

IB&4CP группалэн кыкетӥ концертэз сярысь, оскем потэ, ивор ӝоггес но трослы азьлогес калыке вӧлмоз шуыса. Берпуметӥ нуналаз гинэ "Вконтактеын" спам кадь уз берга. Нош Ваня - ЗБС! 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын