Туала егитъёслы удмурт пужыосын дӥсь

Ортчем "АРБЕРИ. Дизайн-маркет. Winter2014" но Showcase #5 ужрадъёсын MADEMOISELLE OUDMOURTE удмурт модали агенство возьматӥз пӧртэм дизайнеръёслэсь коллекциоссэс. Пӧлысьтызы тужгес но висъяськиз Яна Баймурзиналэн удмурт пужыосын дӥсез.  

Яна Баймурзина - Башкортостанысь Краснокамск ёросысь Редькино гуртын вордскем но будэм пор ныл. 2007-2013-тӥ аръёс Удмурт кун университетын дизайнерлы дышетскемын.

Яна Баймурзина

- Яна, туж тунсыко коллекциед! Кызьы со нимаське но мар татчы пыре?
- Та коллекция нимтэм. Татчы пыре огшоры нуналъёсы нулдон туала егитъёслы дӥсь. Со чебермамын удмурт пужыосын, малы ке шуоно проектлэн валтӥсь малпанэз - удмуртъёслэсь аспӧртэмлыксэс утён. Та коллекцие пырись дӥсен картӥ, паркъёстӥ поръяны, гужем юмшанъёсы потаны, кафеын шутэтскыны луэ. 

- Нош пужыосыд пужъятэмын?
- Ӧвӧл, со пужыос басма вылын ни. Пужъятэмын номыриз ӧвӧл. Соин ик та дӥсез каньыл нулдыны огшоры нуналъёсы но туж капчи миськыны.

- Пужыос удмуртъёслэсь аспӧртэмлыксэс утьыны юртто-а?
- Юртто. Соос юртто егитъёслы удмурт луэмзэс тодазы возьыны, юртто вашкалазэ утьыны, тодыны, тунсыкъяськыны соин. Мон малпамъя, пужыос котьку но валтӥсь интыын луозы. 

- Та коллекциед Францие но вуылӥз?
- 2012-тӥ арын мон вуылӥ Францие. Алис эшелы туж кельшиз коллекцие, тужгес но пужыё басмаос. Со шуылӥз, быдэс коллекциме аслыз басьтыны дась (мыня). Соку ик Парижын Алис туспуктӥз коллекциме, нош мынӥсь-ветлӥсьёс дугдыса ик учкылӥзы но чабизы. Аспӧртэмлыко мода возьматон вал. 

- Со малы ке сӥзем туспуктон вал?
- Францие мон ветлӥ Игорь но Марина тодмоосыным. Соос Ямало-Ненец автоном округысь Салехард карын уло. Телевидениын ужало бере, соос коллекцие сярысь репортаж лэсьтыны медо вал. Озьы ик Марина костюмъёсме но туспуктэмъёсты аслаз адӟытоназ возьматӥз на. 

- Кин тон - пор, ижкар, удмурт яке ӟуч модельер?
- Азьланяз тодмо росси дизайнер луэме потэ. Соин асме пор яке удмурт дизайнер шуыса уг нимаськы. 

- Вань-а мукет коллекциосыд?
- Жаляса верано, ӧвӧл на. Но 8-тӥ южтолэзьлы яке солэсь азьлогес кыкетӥ коллекцие дась луоз. 

- Мар малпаськод карыны азьланяз? Кылдытод-а аслэсьтыд бренддэ, усьтод-а шоу-рум?..
- Ваньмыз со али льӧль малпанъёсам гинэ ай. Но мынам со малпанъёсме улонэ пыӵатэме потэ. Потэ тодмо модельер луэме, аслэсьтым брендме кылдытэме, ужме усьтэме но адямиос понна чебер арбериос кылдытэме. Оломар но потэ, но соиз сярысь дас ар ортчыса верало, куке ваньмыз быдэсмоз. Яке вазьгес (мыня). 

 

Туспуктэмъёс Игорь Новиковлэн 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын