Малы мыным удмурт кыл?

Ижкарын куинетӥ арзэ ни удмурт кылъя курсъёс радъясько. Кызьы ивортӥз "Удмуртлык" огин, ньыль нунал куспын курсъёсы 200 пала мурт гожтӥськиз ни. 

Курсъёс усьтэмын Удмурт Элькунысь Йӧскалык политикая Министерстволэн кичӧлтэмезъя. Радъясьёс пӧлы пӧртэм огазеяськонъёс пыро, соос пӧлын Анай кылэз дышетонъя "Выжы" ассоциация но "Удмуртлык" огин. 
Курсъёс тулыспалэ кутскозы но куинь толэзь кыстӥськозы. Тодмоостылэн удмурт кылэз дышетэмзы потэ ке, та анкетаысь - http://kursy.udmurtlyk.ru - юанъёслы валэктонъёс мед сётозы. 
Юанъёссы кылдӥзы ке, та телефонъя мед вазиськозы: 8 904 3163205 Анна Киршина. 

Кылем арын 200 мурт курсъёсы кык толэзь куспын гожтӥськиз ке, туэ - ньыль нунал куспын. "Ваньмон дыр" тодӥз, малы гожтӥськисьёслы удмурт кыл кулэ. 

М., 31 арес: Ачим удмурт, но школаын удмурт кылэз ӧй дышеты. Али дышетӥ ке, собере тодон-валанме пиналъёсылы сётэм потэ. 

Марина, 51 арес: Малпасько, милемыз школаысен ик удмурт кыллы дышетоно вал шуыса. Гажасько удмурт калыклэсь сямъёссэ но лулчеберетсэ. Вордски но будӥ Сарапулын. 32 ар Ижкарын улӥсько ни. Удмурт ужрадъёсы пыриськыкум, ӧжыт ке но удмурт вераськемез но удмурт кырӟанъёсты валам потэ. 

Анатолий, 48 арес: Вашкалаосмылэсь кылзэс тодыны кулэ. Мон - кылъёслэн фанатсы. Со мынам хоббие. Жаляса верано, англи но немец кылэз удмурт кыллэсь трослы умойгес тодӥсько. 

Александра, 29 арес: Мыным возьыт, мон анай кылме уг тодӥськы шуыса. Пиналъёсы вашкалаосмылэсь кылзэс но лулчеберетсэс мед тодозы вылэм. Мыным удмурт лулчеберет тунсыко, нош лулчеберет кылтэк уг быгаты луыны. 

Анастасия, 31 арес: Ашальчи Окилэсь кылбуръёссэ лыдӟем потэ. 

Наталья, 35 арес: Малпасько, Удмуртиын улӥсьёс ваньзы ик удмурт кылэз тодыны кулэ! 

Ольга, 33 арес: Картэлэн вань ӵыжы-выжыосыз удмурт кылын верасько. Мон номырзэ уг валаськы. Пӧлазы асме шузиен шӧдӥсько. 

Софья, 23 арес: Мыным возьыт, вордскем шаерелэсь кылзэ уг тодӥськы шуыса. Уг поты, со мед быроз шуыса. Данъяськисько Удмуртиын улэменым. Потэ удмурт кылын гожъяськем. 

Луиза, 28 арес: Удмурт кыл - Удмурт Элькунлэн кун кылыз. Соин ик сое тодоно. 

М., 55 арсе: Мон вордски но улӥсько Удмуртиын. Туж потэ дышетэме кылэз, кудӥныз гожтэмын трос пӧртэм кырӟанъёс но кылбуръёс. Олег Поскребышевлэн кылыныз вераськеме потэ. 

Елена, 39 арес: Ӵыжы-выжыосыным удмурт кылын вераськеме потэ. 

А., 42 арес: Анае сузэръёсыныз но агайёсыныз котьку удмурт кылын вераське. Нош ми (пиналъёс) соосты ум валаське. Туж потэ, анай кылмы семьяысьтымы медаз ышы шуыса. 

Алексей, 29 арес: Анае - удмурт, атае - удмурт, нош мон - "ӟуч". 

Ольга, 19 арес: Удмурт кун университетын одӥг семестр ӵоже удмурт кылэз дышетӥ, но со туж ӧжыт вал. Кылем арын курсъёсы ветлыны кутски, туж кельшиз. Но аслам параосы йырин дышетсконме азьланьтыны ӧй быгаты. Али выльысь луонлыке вань бере, азьланьтэме потэ. Малпасько, удмурт кыл улонам кулэ луоз. 

Юлия, 14 арес: Гужем быдэс семьяенымы шутэтскыны гуртэ кошкиськом. Отын вань ӵыжы-выжыосмы удмурт кылын верасько. Мынам соосты валам потэ. 

Е., 26 арес: Картэ удмурт. 

Ольга, 46 арес: Ужам кулэ луэ. 

Марина, 29 арес: Мынам песянае - удмурт, нош анае но ӵыжы-выжыосмы куспазы удмурт кылын верасько. Сыӵе дыръёсы йыры кур, ӧжыт мае валасько шуыса. Эшшо удмурт кыл - туж ненег, чебер но крезьгуро кыл.
Умой, дыр, лушкем малпанъёсты матысь адямиослы удмурт кылын вераны, куке нокин мукетыз уг вала. 

Анна, 37 арес: Анай кылме тодэм потэ. Со сяна, уж дурам ӵемысь песянайёс вуыло, соосын удмурт кылын каньылгес вераськыны. 

А., 24 арес: Шудӥсько кык удмурт группаын. Валам потэ, мар сярысь кырӟанъёс. 

Евгений, 26 арес: Кельше удмурт кыл. Эшъёсы но тодмоосы пӧлын трос удмуртъёс, соосты валам потэ. 

Елена, 49 арес: Удмурт кылбуръёсын, кырӟанъёсын, прозаен тодматскем потэ. 

Юлия, 25 арес: Мон вордски Удмуртиын. Удмурт кылын верасько тодмоосы но ӵыжы-выжыосы, кудъёссэ валам потэ. Удмурт кылын передачаосты учкем но книгаосты лыдӟем потэ. 

Оксана, 38 арес: Картэлэн семьяез быдэсак удмурт кылын вераське. Мынам соосты валам потэ. 

Анастасия, 21 арес: Диплом ужелэн нимыз "Удмуртъёслэн нуны веттан гуръёссы", соин ӧжыт ке но удмурт кылэз тодэм потэ. Озьы капчиенгес кулэ материалъёсты шедьтысал. 

Мария, 23 арес: Вуоно кузпалы - удмурт. Солэн тодмоосыныз но ӵыжы-выжыосыныз капчиен вераськем потэ. 

Алла, 48 арсе: Картэлэн ӵыжы-выжыосыныз но бускельёсыным вераськон понна. 

Н., 60 арес: Книгапоттонниын ужасько бере, куддыр удмурт текстъёсын ужано луэ. 

Андрей, 35 арес: Вотэсысь вачевераськонэз лыдӟи. Огез шуэ: "Ачим удмурт, кӧня ке удмуртэз валасько". Нош пумитаз: "Тӥ "пуны" кадь: ваньзэ вала, но номыр верамез уг луы. Вождэс эн вае, ачим но сыӵе ик..." Мынам валаны ке но дышетскем потэ, вераськыны ӧй дышы ке. 

Антон, 23 арес: Кӧня ке пол Украинае вуылӥ. Туж кельшиз. Но отын котьку юаллязы, кытысь мон. Удмуртиысь шуылыкум, соку и юаллязы, нош кылме тодӥсько-а. Возьыт вал. Удмурт кылэз ӧжыт ке но тодэм потэ, берло мукет кунъёсын удмурт кыллэсь чеберзэ возьматысал. 

Денис, 25 арес: Анай кылын вераськем потэ. 

Озьы ик туж тросэзлэн удмурт кылэз дышетэмзы потэ, малы ке шуоно соос: 
- удмуртъёс; 
- уло Удмуртиын; 
- уг поты, удмурт кыл мед быроз шуыса. 

 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын