Возьдаськонэз валасьтэм но кышканэз тодӥсьтэм удмурт

25-тӥ толшоре «Птица» театр-студиын тодмо удмурт артистка но режиссёр Ольга Александрова возьматӥз «Куинь сюан гуръёс» спектакльзэ. Спектакль бере ачиз сярысь мадемзэ татысь лыдӟыны луэ.

Но со азьын пичи ялон! Кин спектакле ӧз на вуылы, луонлыкты вань на. Дыртэ, билетъёсты туж чаляк быдто, пе. 

Озьыен, сётӥськом Ольга Александровалэсь ачиз сярысь мадемзэ. 

Театрын ужакум, мон валай, быдэс улонме Белоснежкаосты, Лымынылъёсты шудыса ортчытэм уг поты. Соосты нырысетӥ 10 арзэ шудыны луэ, нош собере арлыд но будэ, аслыд но тунсыко уг поты ни… Соин ик мон тырши асме, аслэсьтым кылме, аслэсьтым ӧрме шедьтыны. Но, жаляса верано, театрын мон кадь малпаськисьёс ӧй вал.  

Соку мон шуи, мон лэсьто моноспектакльёс. Ачим. Нырысь мон пуктӥ 12-тӥ даурысь вашкала ӟуч кылын «Слово о полку Игореве» моноспектаклез.

Собере малпай, малы мон сокем тунсыкъяськисько ӟуч фольклорен но лулчеберетэн, куке ачим мон удмурт. Потӥз удмурт спектакль лэсьтэме. Малпай, мон ке ӧй лэсьты, кин лэсьтоз на?! Жанна Д’арк кадь (серекъя). Егит дыръям аслым осконэ туж бадӟым вал, соин монэ номыр ӧз куты.

Куке тон лэсьтӥськод моноспектакль, тон ас пушкад пӧзиськод, копаськиськод. Со туж секыт. Туж секыт огнад лэсьтыны. Моноспектаклез гинэ но.

«Куинь сюан гуръёс» спектаклез лэсьтыкум, куддыръя юрттӥзы эшъёсы, куддыръя – тодосчиос. Тужгес но юрттӥзы Владимир Емельянович Владыкин но Татьяна Григорьевна Владыкина. Со туж бадӟым шуд 30 ар пала ни соосын кусып возьыны. Та дыр куспын соос мон понна дышетӥсьёс но, эшъёс но, анай-атай но луыны вуизы.

Малы шаман бубен удмурт спектакльын? Удмуртъёслэн ӧй вал шаманзы, но соослэн вал вӧсясьсы, тунозы, кудъёсыз озьы ик быдэстӥзы шаманлэсь миссизэ. Озьы ик спектакльын бубен – со бубен гинэ ӧвӧл, со пӧрме кӧтлы но, зыбкалы но, но трос малы мукет. Бубен пыр мон быгатӥ возьматыны кутсконысеныз пумозяз адямилэсь улонзэ но быдэс Индуннеез.  

90-тӥ аръёсы перестройка вакытэ усьтӥськиз кунгож. Таин валче финн-угор кусыпъёс юнмазы но огъя проектъёс азинскыны кутскизы. Азинскиз этнофутуризм. Вал пӧртэм адӟытонъёс, перформансъёс… Потӥз луонлык кунгож сьӧры потаны но отысь куноосты дорамы ӧтчаны.

1994-тӥ арын Суомиын ортчиз финн-угор фестиваль, кудаз ӧтемын вал пӧртэм йӧскалык театръёс. Та фестивальын «Куинь сюан гуръёс» спектакльлэн премьераез ортчиз. Но соку мынам нокыӵе валанэ но ӧй вал на, кыӵе бадӟым уж мон лэсьтӥ. Мон малпай, со луоз одӥг фестивальын возьматэм спектакль, кудзэ учкоз удмурт интеллигенция. Удмурт кылын спектакль азьланяз нокинлы кулэ уз луы – сыӵе малпанэн мон лэсьтӥ та спектаклез.

Фестиваль бере мон «кизили» луыса сайкай. Спектакльме возьматыны курыса, монэ соку ик ӧтизы Хельсинкие но, Туркуе но. Озьы кутскиз мынам кунгожсьӧр турнее. Собере мыным дэмлазы 15 спектакль шудыны Удмуртиын, Эстониын, Норвегиын, Швециын…

Мыным удалтӥз ужаны финн сцена вылын. Режиссёр луыса, мон пуктӥ Гогольлэсь «Записки сумасшедшего»-зэ. Актриса луыса, мон валтӥсь рольын шудӥ юри мон понна гожтэм спектакльын. Шудӥ ӝыны сезон, малы ке шуоно кунгож сьӧрысь пичи каръёсын одӥг спектакль сезон яке ӝыны сезон гинэ мынэ. Куке карысь но бускель каръёсысь калык сое учке, отын выль спектакль бордын ужаны кутско.

Но со дыре ик Удмуртиын мон шоры кырыж учко вал. Яке со вожан вал, мон огнам сыӵе тодмо луи шуыса, яке мар. Но кивалтэт монэ отӥгес кариз. Со понна мыным ӝож вал…

Огпол, куке мон вуи Удмуртие, «Редукторлэн» директорез ӧтиз монэ кивалтыны егитъёслы усьтӥськись театрен. Озьы 90-тӥ аръёслэн пумазы мон 3 арлы выльысь вуи Ижкаре но ужай егитъёслэн «Иднакар» театренызы. Театрен ми пуктӥм «Тристан и Изольда» спектаклез. Со сярысь соку туж трос вераськизы. Но собере театрез кутскизы таланы…

Мон нош ик кошки Муское.

2002-тӥ арын монэ ӧтизы ужаны Ханты-Мансийске но шуизы, соослэн потэ усьтэмзы ханты но манси калыкъёслы йӧскалык театр, кудӥз ноку ӧй вал. 10 ар мон ужай отын. Соку усьтӥськиз Обско-Угорский театр, соку мон пуктӥ 10 пӧртэм пумо спектакльёс, соку вал мынам тужгес но шудо творческой улонэ. Театрен ми вуылӥм Кремле, Нью-Йорке, Страсбурге. 2012-тӥ арын мон кошки Муское.  

Ханты но манси калыкъёслэн лыдзы пичи ке но, туж тунсыко лулчеберетсы.

Мар огкадез удмурт но ханты-манси калыкъёслэн? Мыным капчигес вераны, мар пӧртэмез та калыкъёс вискын (серекъя). Та калыкъёс уг уло кавказ калыкъёс кадь, соослэн ваньмыз пушказы, кыре уг поты. Кыкетӥез, та калыкъёс асьсэды пушказы кӧня ке сиё. Коми, удмурт, пор калыкъёс, кудъёсыз Европалы матын, соос ваньмызлы усьтӥськемын. Нош ханты но манси калыкъёс сярысь верано ке, таос ни копак Ӵукпал. Соослэн азиат ымныр туссы. Собере ханты но мансилэсь мае ке юаськод ке, со быгатоз тыныд валэктон сётыны яке ӝыны ар ортчыса, яке ноку но. Мыным туж шуг вал соосын ужаны, усьтыны соослэсь актёр луон быгатонъёссэс. Мон шуисько: «Мынялэ, мынялэ!» Соос мон шоры номыр кадь но учко. Номыре верасьтэм ымныръёс! Огпол огез шуиз ик: «Ми тӥлесьтыд вождэс поттыны ум турттӥське, но ми ум быгатӥське ваньмы ӵош мыняны». Соин ик валантэм, мар сярысь соос малпасько, вожзы-а соослэн потэ, яке шумпото-а, малы ке шуоно ымнырзыя номыре лыдӟыны уг луы. Нош мынам туж трос энергие. Мон удмурт ке но, но кыӵе ке туж интыяз пукыны чидасьтэм удмурт. Возьдаськонэз валасьтэм но кышканэз тодӥсьтэм удмурт. Сыӵеен мон будӥ но сыӵе ик кыли.

Ми ке улӥськом гуртъёсын, огазе, ханты но мансиос оген уло. Тундраын, тайгаын. Соос ог-огзы дорысь сыӵе кыдёкын уло! Висказы 100 яке тросгес иськем, дыр. Кинэн соос верасько, кызьы уло?! Соослэн огазе маке карон сямзы ик ӧвӧл. Соос ваньзы ӵош уг кырӟало, хорын кырӟаны уг быгато. Асьмеос шуиськом ке, фольклор – со калыклэн шыкысэз, кудӥзлэн авторъёсыз ӧвӧл, ханты но мансиослэн фольклорзы но висъяське. Котькуд фольклор кырӟанлэн вань авторез. Кылсярысь, манси фольклор, сыӵе-сыӵе стойбищеысь, сыӵе-сыӵе муртлэн кырӟанэз. Со манси фольклор! Собере соослэн ӧвӧл асьмелэн кадь эктонъёссы. Кызьы шуо, удмуртъёс ке экто, соос инбамез ӵашъё, поръёс ке экто, соос выжез тӥяло, сокем зол экто, нош ханты но мансиослэн шыпыт эктонзы. Но ваньмыз одӥг кадь. Соослы туж секыт вал профессионалъёс луыны. Оген соос ваньзы устоесь, нош ӵош… Кинлэн ке вань куараез, кин ке шудыны быгатэ, нош ӵош маке пӧрмытыны соос уг быгато…

Мынам туж потэ ужаме Удмуртиын. Потэ вань театръёсын герӟет воземе. Но Удмуртиысь театръёсы монэ малы ке но али но уг ӧтё. Тужгес но мынам ужам потэ Удмурт йӧскалык театрын.

Али мон удмурт мифъёсъя пиналъёслы спектакль бордын ужасько. Сӥзьыл со спектаклез Ижкаре вайыны малпасько. 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын