Туала удмурт проза но магической реализм

Толон Генераллэн юртаз туала удмурт прозалы но магической реализмлы сӥзем "Палэс" ӝыт ортчиз. 

Ӝытэз нуиз тодмо удмурт блогер, кылбурчи но веросчи, журналист Маша Векшина. Со ик та ӝытлы аспӧртэмлыко программа дасям. 

Ӝытлэн нырысетӥ люкетаз «магической реализмен» тодматскон мынӥз. Нырысь Маша солы валэктон сётыны тыршиз, собере лыктэмъёслы Хорхе Луис Борхеслэсь «Книга Песка» новеллазэ люкылӥз но отысь магической реализмлэсь пытьыоссэ утчатӥз. Та люкетын, кылсярысь, тунсыко вал кылзыны кык блогеръёслэсь — Маша Векшиналэсь но Марина Сергеевалэсь — колумби гожъяськисьлэн Габриель Маркеслэн «Сто лет одиночества» романэз сярысь ваче вераськемзэс но отысь магической реализмез шараямзэс. Озьы ик тунсыко вал кылзыны комиксъёсты суредась но «Инвожо» журналын ужась Миша Николаевлэсь «Книга Песка» новеллаез син азяз пуктэмзэ: та пияш книга чуръёсты но суредъёс пыр адӟе! 

Ӝытлэн кыкетӥ люкетаз магической реализм сярысь вераськон асьме туала прозамы вылэ выжиз. Асьсэлэсь веросъёссэс лыдӟизы Марина Пахомова, Николай Михайлов, Маша Векшина но Дарали Лели. Котькудзылэн гожъяськон сямзы туж аспӧртэмлыко вылэм. Кылсярысь, туж чебер удмурт кылыз Алнаш палъёсысь Марина Пахомовалэн. Нош кыӵе быгатыса со лыдӟиз Шурали сярысь вероссэ! Нылаш веросъёс уггес гожъя, пе, но мыло-кыдо кылбура. Соин ик Маринаез али ик видео-кылбуръёс гожъяны лобатэм потыны кутскиз. Эшшо но паймымон но чебер удмурт кылыз шӧдӥськиз Николай Михайловлэн веросаз. Бигерысь удмуртъёслэн кылзы Удмуртиысь удмуртъёслэсь узыргес кадь. Колялэсь удмурт кылзэ эшшо но чебер но аспӧртэмлыко каро куараос, кудъёссэ Удмуртиысь удмуртъёслэсь уд шедьты. Малпасько, филологъёс куанэмме валалозы. Я, мар шуод, Колялэсь вероссэ но мон али ик кыӵе ке удмурт газет-журналэ печатланы курысал. Туала удмурт прозамес мед узырмытоз. Узыр удмурт кылын гожтэм веросъёс бере дневникысьтыз люкетсэ Дарали Лели лыдӟиз. Суро-пожо удмурт-ӟуч гожтэмзэ лыктэмъёс серекъяса кылзӥзы. Нош Марина Сергеева шуиз: «Палэнысен учконо ке, кыӵе ямсыз суро-пожо удмурт кыл вылэм. Мон ачим но блогам озьыгес гожъясько ке но, татчыозь ямсыз луэмзэ уг валаськы вал...» (ред. ямсыз — шуш). Пумаз «Бубыли» вероссэ лыдӟиз Маша Векшина. Ну, мар татын шуод, кӧня Машалэсь веросъёссэ лыдӟи ни, пумаз котьку но одӥг юанэ кылдылӥз: Маша, ку ни веросъёсын бичетэд потоз?! 

Жаляса верано, берыктонэн вырыны та ӝытын ӧз ни кылды. Яке дыр ӧй вал, яке ӝытэз нуисьлэн сое ортчытэмез ӧз ни поты, яке со йырысьтыз воксё потӥз... Но, Машалэн верамезъя, таӵе ӝытъёс эшшо радъяськозы на. Умой луысал, огез таӵе ӝыт берыктӥсьёслэн нуналэнызы тупасал ке. Соку берыктонлэн шуг-секытъёсыз сярысь вераськыны но мае ке берыктыны но луысал. 

Нош та ӝыт, зэмзэ верано ке, егит литераторъёслэн пумиськемзылы тупаз. Кин ке лыдӟиз, кин ке дунъяз. 

 

Лукерья Шихова

Ӝытэз нуиз Маша Векшина

Дарали Лели но удмурт кылосбуръя факультетысь студентъёс

«Книга Песка» новеллаез лыдӟон

«Книга Песка» новеллаез лыдӟон

Егит филологъёс 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын