Выль куараосын тодматскон

18-тӥ коньывуонэ Филармониын кыкетӥзэ ни "Выль куара" крезьгуро шоу-проект ортчоз. Кылем арын кадь ик туэ но ӵошатсконэ дас егит кырӟасьёс пырисько, кудъёсызлэсь быгатонлыкъёссэс муромытыны «Шулдыр ӝыт» ансамбльысь дас кырӟасьёс-дышетӥсьёс юртто.

Кылем арын вормиз «10 гужем нунал» группаын кырӟась Алина Егорова. Со радиомикрофон утӥз. Туэ вормисьлы кузьым — со кырӟанзэ студиын гожтыны сертификат.

«Ваньмон дырлэн» выль корреспондентэз Лиза Шихова матысьгес тодматскиз «Выль куара» шоу-проектэ пыриськись егитъёсын. Котькудӥзлы со быдэн вить юан сётӥз. Концерт азьын тӥ но вуоно кизилиосын тодматске ай!

Юанъёс:

1. Кытысь тон? Маин выриськод? 
2. Кин тынад дышетӥсед? 
3. Кыӵе кырӟанъёсты тон быдэстод? 
4. Малы та вожвылъяськонэ пыриськиськод? 
5. Та проектын вормон — мар со? 

 

Юля Гаврилова 

1. Мон Ижкарысь. Дышетскисько Удмурт кун университетын. Озьы ик шудӥсько Les Partisans театрын, кырӟасько «Долбушина и Пугач» группаын, со сяна удмурт кырӟась кадь тодмо луисько. 
2. Мынам дышетӥсе Яна Белослудцева. 
3. Огнам мон быдэсто «Тонтэк» кырӟанэз, кудӥз туж яркыт но матын мон понна. Сое кырӟаку но кылзыку, пушкын ваньмыз берытске кадь, собере шуак каньыл луэ. Малпасько, сцена вылын мон быгато возьматыны та кырӟанлэсь пуштроссэ. Нош Янаен ми быдэстом солэсь кырӟанзэ, кудзэ нокин ӧз на кылы. Премьера луоз. Со нимаське «Тон быгатод». Но пусъеме потэ, таиз кырӟан туж висъяське огнын быдэстоно кырӟанэлэсь. 
4. Мон малпай пыриськыны та проектэ, малы ке шуоно, нырысь ик, со эшшо одӥг луонлык сцена вылэ потыны (нош мон туж но туж яратӥсько сценаез), кыкетӥез, со луонлык асме но быгатонъёсме сцена вылын возьматыны, малы ке шуоно кырӟась — со одӥг куара гинэ ӧвӧл, со озьы ик ачид вылын, мугорыд вылын, куараед вылын, дунневаланэд вылын ужан. Куинетӥез, со кылзӥсьёсылэсь лыдзэс будэтыны луонлык. Оло кин ке монэ нырысьсэ кылоз но солы яралоз. Ньылетӥез, со выль тодматсконъёс но кусыпъёс. Соин ик та проект сётэ трос луонлыкъёс, но татчы пыриськон озьы ик трос дырез кулэ каре. 
5. Та проектын вормон — со, нырысь ик, астэ ачид вормон, кышканъёсыдлэсь мозмытскон. Репетициосысен мон адӟисько, котькудӥз кырӟась кыӵе ке кышканэз пыр потыны тырше. Но со кышканъёс бордын котькуд нунал ужано. Ваньмыз со учкисьёслэн дунъетсы понна лэсьтӥське. 

 

Влада Митрофанова 

1. Мон Алнаш черкогуртысь. Дышетскисько Удмурт кун университетын удмурт кылосбуръя факультетын. Кырӟанъёс гожъяны 8-тӥ класс бере кутски. Ёросысьтымы ӵошатсконъёсы пыриськылӥ. Гожъясько удмурт но ӟуч кылын. Огзэ кырӟанме ми Инна Васильеваен гожтӥм но ни. Озьы ик кырӟасько «10 гужем нунал» группаын. 
2. Та проектын мынам дышетӥсе Андрей Камалтдинов, кудӥз кылем арын та проектын кыкетӥ инты басьтӥз. 
3. Огнам мон быдэсто аслэсьтым «Ой, мусо чебер пи» кырӟанме (кылъёсыз Н. Васильевлэн, крезьгурез аслам). Нош Андреен ми кырӟалом «Анай-атайлы» кырӟанэз, кудӥз берыктэмын башкир кырӟасьлэсь Элвин Грейлэсь. 
4. Та проектэ мон пыриськи шонер кырӟаны но асме сцена вылын шонер возьыны дышон понна. 
5. Вормон мон понна валтӥсь интыын уг сылы. Нырысь ик мон ачим аслым возьмато, мае мон быгатӥсько. Нош ворми ке, со возьматоз мыным аслым, мон кырӟаны дыши но кырӟанлэсь пуштроссэ учкисьёслы шонер сётыны быгатӥ шуыса. 

 

Рома Болтачев 

1. Вордӥськи Грак ёросысь Улӥ Йыраш гуртын. Ужасько Удмурт йӧскалык театрын. 
2. Дышетӥсе Эльвира Панченко. 
3. Дышетӥсеным ӵош ми кырӟалом «Синучконын» кырӟанэз. Огнам быдэсто «Мӧзмиськод-а?» кырӟанэз, кудӥзлэсь кылбуръёссэ гожтӥз егит артист но кылбурчи Алексей Котков, нош гурзэ ачим гожтӥ. 
4. Малы ке шуоно мыным кельше кырӟаны, мынам потэ таӵе тунсыко ужрадъёсы но проектъёсы пыриськеме. Потэ адямиослы кырӟанме возьматэме. 
5. Вормон сярысь ваньзы малпасько, дыр. Котькудӥз сюлэмзэ поныса тырше но тыршиз ук. Но мон понна нырысетӥ интыын вормон ӧвӧл. Татын ваньзы вормисьёс ни. Сцена вылэ потӥськод ке — со вормон ни. Котькуд адями озьы ассэ вормыны уз быгаты. 

 

Радис Гайниятов 

1. Мон Башкортостанысь Татышлы ёросысь Вязовка черкогуртысь. Дышетскисько Вотка карысь педколледжын. Мон крезьгурчи. Шудӥсько баянэн, арганэн, крезен. 
2. Мынам дышетӥсе Анна Плотникова. 
3. Огнам кырӟало «Шуд арганэ», дышетӥсеным — «Лыз сяська». 
4. Мынам кемалась потэ ни вал кыӵе ке вожвылъяськонэ пыриськем но куараме возьматэм. 
5. Мон понна вормон — со ваньмыз. Нырысь ик, со азьпала вамыш, кыкетӥез, асме Удмуртилы возьматыны луонлык, малы ке шуоно Вотка карын монэ тодо ни, нош мукет кар-гуртъёсын уг на. Куинетӥез, кызьы мон верай ни, куараме возьматыны луонлык. 

 

Ксения Ахметханова 

1. Мон Башкортотсанысь Янаул ёросысь камсьӧр удмурт. Дышетскисько Удмурт кун университетын Социальной коммуникациосъя факультетын. Пыриськисько камсьӧр удмуртъёслэн огазеяськоназы, «10 гужем нунал» группаын кырӟасько. 
2. Наташа Ушакова. 
3. Ӵошен ми быдэстомы Наташалэсь гожтэм кырӟанзэ. Со «Яратон» нимаське. Огнам мон кырӟало аслэсьтымзэ «Тон мынам» кырӟанме. 
4. Мон кылем арын та ӵошатсконлэн кастингаз пыриськи ни вал, но соку мыным инты ӧз сюры. Туэ «Выль куараез» радъясьёс асьсэос монэ ӧтизы ни. Мон пыриськытэк ӧй быгаты. Филармонилэн сценаез туж бордаз кыске. Кошкем ик отысь уг поты. 
5. Та проектын вормон — со асме вормон, ляб палъёсме кужмоезлы берыктон. Но вормон, вылӥ интыос сярысь малпаськонъёсты мон йырысьтым улляны тыршисько. Ас азям мукет курон пуктӥсько: ужме умой быдэстоно. Учкисьёслы кырӟанме озьы сётыны быгатоно, кызьы дышетӥз Наташа, кызьы ачим быгатӥсько. 

 

Ксения Кузьмина 

1. Мон Быги гуртысь. Дышетскисько хореографлы. 
2. Дышетӥсе Геннадий Ганьков. 
3. Ми быдэстом «Льӧмпуос сяськаян вакытэ» кырӟанэз. 
4. Та проект сётэ луонлык астэ быдэс Удмурт шаерлы возьматыны. 
5. Проектын вормон, малпасько, выль ӧсъёсты усьтыны луонлык сётоз. 

 

Екатерина Федорова 

1. Мон Красногорск ёросысь Тукташ гуртысь. Яратӥсько кырӟаны, кылбур гожъяны, суредаськыны. 
2. Дышетӥсе Регина Музиянова. 
3. Огнам — «Адями кырӟа», нош ӵошен — «Чупалляме потэ». 
4. Асме адӟытэме, выль тодон-валанъёс люкаме, выль эшъёс шедьтэме но сюлэмме буйгатэме потэ. 
5. Ворми ке, выль сюресъёс усьтӥськозы. 

 

Яна Пушина 

1. Мон Дэри ёросысь Подшивал гуртысь. 
2. Дышетӥсе Павел Васильев. 
3. Мон быдэсто «Тонэ уг вунэты» кырӟанэз, кудӥзлэсь кылъёссэ ачим гожтӥ. 
4. Та вожвылъяськонэ асме но куараме возьматон понна пыриськи. 
5. Вормон сётоз луонлык кырӟаны быгатэмме азинтыны. 

 

Валерий Мадазимов 

1. Мон Яр ёросысь Байдалино гуртысь. Улӥсько Ижкарын. Йылпумъяй Яр политехникумез. Дышетӥсь. Яратӥсько удмурт гуръёсты кылзыны но кырӟаны. Удмурт кырӟан — со мынам улонэ. 
2. Мынам дышетӥсе Руслан Серебренников. 
3. Кырӟалом «Чеберина»-ез. Нош огнам кырӟало «Улондэ улод». 
4. Бадӟым сцена вылэ пырыны но асме возьматыны быгато. 
5. Вормон — со шумпотон но умой мылкыд. 

 

Жаляса верано, дасэтӥеныз «выль куараен» тодматскыны ми ӧм быгатэ. Тодӥськом гинэ, со Татьяна Окорокова шуыса. 
Кылем арын ортчем «Выль куара» шоу-проект сярысь лыдӟыны татысь быгатӥськоды. 

 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын