Жингрес куараё вормись

18-тӥ коньывуонэ Филармониын «Выль куара — 2014» крезьгуро шоу-проект ортчиз. Дас тодмо но тодмотэм егит куараос вормон понна ӵошатскизы. 

«Ваньмон дырын» ужась корреспондентъёс та ужрадэ билет басьтонзэс берло нуналъёслы кельтӥзы, собере асьсэос ик жалязы. Азьло «Шулдыр ӝытлэн» концертъёсаз умой интыосы билетъёс концерт нуналэ но сюро ке вал, али куинь нунал азьпала вуэмъёс дэймизы — зал, пе, тырмемын, билетъёс сьӧр радын но азьпалаз одӥг-ог гинэ кылемын на. Валамон ни, бераз пукисьёслэн интыоссы дунтэменгес. Нош милемлы материал гожтоно на бере, ми кызьы но озьы куатетӥ радэ кык билет шедьтыны быгатӥм ик. Талы соку но, али но шумпотӥськом. 

Концертэз нуизы Удмурт йӧскалык театрысь артистъёс Сергей Наговицын но Марина Самсонова. Нуисьёс сярысь номыр верам уг ни поты. Уг, уг тырмо милям Бегешевъёсмы. Кагаз вылысь лыдӟыны быгатӥсьёс трос, нош ужрадлэн ӧраз пырыны но капчиен сое нуыны, сыӵеос малы ке но али но ӧз на сюре. Кылем арысь «Выль куараез» тодэ ваёно ке, соку Алексей Ложкин огназ ке но сое нуиз, солэн трослы устогес пӧрмиз. Али но серекъятыны но капчи мылкыд сётыны быгатэмез тодын на. 

 

Нырысетӥ люкет 

Ужрадлэн нырысетӥ люкетаз дас егит кырӟасьёс оген-оген сцена вылэ потазы но асьсэ быръем кырӟанъёссэс быдэстӥзы. 

Нырысь ик ненег куараеныз паймытӥз Яна Пушина. Нырысетӥез ик кырӟась сыӵе чебер куараеныз паймытоз шуыса, ми ӧм возьмалэ вал. Соин ик кырӟанзэ быдэстытозяз номыр вазьылытэк шып пуким но паймыса улӥм. 

Яна бере потӥз Ксения Кузьмина. Со «Ой, тӧл тӧла» кырӟанэз быдэстӥз. Ми оскытэкгес учким сцена вылэ. Быгатоз меда егит кырӟась сое быдэстыны сыӵе ик зол, кыӵеен ми дышемын сое кылыны Надежда Уткиналэсь? Быгатӥз ук! Эшшо ке кырӟан пушказ сокем выйиз, учкисьёслэн синкылиоссы ик потӥзы. 

Куинетӥез кырӟась Катерина Федорова паймытӥз ӝуждалаеныз но чебереныз. Кызьы шуизы ӝытэз нуисьёс, модалие сое ыстоно. Зэм но. Нош кырӟаменыз Катерина сокем ик ӧз паймыты. Оло кырӟанэз тупасьтэмгес вал, оло тулкымъяськеменыз йырин со учкисьёслы усьтӥськыны ӧз быгаты. 

Валерий Мадазимов мусо бен, но кырӟанэз нош ик аслыз тупасьтэм кадь вал. Яке куараез быръем кырӟанзэ быдэстыны лябгес вал. 

Удмурт кылосбуръя факультетын дышетскись Влада Митрофанова пыймытӥз ке паймытӥз! Гитараен шудэменыз но, воксё выль тусо сцена вылэ потэменыз но, аслэсьтыз кырӟанзэ быдэстэменыз но — ваньмыныз! Со ужрадэ кыӵе ке выль шӧм пыртӥз. Та нылашез али удмурт эстрадае выль шӧм пыртӥсь егит кырӟасьёс пӧлы пыртоно но концертъёсы ӧтчано, ӧтчано, ӧтчано! 

Ксения Ахметхановалэн видеовизиткаяз ик шаплы луэмез адӟиськиз. Ух! Нош сцена вылын со дась кырӟась луэмзэ возьматӥз. Ӟечок! 

Собере учкисьёслэн яратонзы Татьяна Окорокова потӥз. 15 аресъем нылашлэн сыӵе жингрес куараез! Эшшо ке Таня быдэстӥз сыӵе кырӟанэз, кудӥз туж тупаз удмурт калык кырӟанлы. Учкисьёс — туж тросэз арлыдо кышномуртъёс но воргоронъёс бере — соослы туж но туж яраз. Озьы ке но, таӵе выступлениос вашкалаяз берыкто, туала удмурт эстрадалы выльзэ уг сёто кадь. 

Удмурт театрысь Роман Болтачев шоры мынятэк учкыны ӧз луы. Кыӵе мусо! Мыняны кутске ке, воксё вешам потэ. Нош кырӟакуз адӟиське, кыӵе солы кырӟанэз кельше. Жаляса верано, Романлэн кырӟамез озьы ик огшорыгес потӥз, мукет ӵошатскисьёслэсь ӧз висъяськы. 

Тодмо удмурт кырӟась Юлия Гаврилова мазэ та шоу-проектын ыштэм, валантэм. Юля кемалась шедьтӥз ни ас ӧрзэ туала удмурт эстрадаын. Соиз но зэм, Юляез сцена вылысь адӟыны но кылзыны — со одӥг шумпотон. Куараеныз но, мур пуштросо, сюлэмез вырӟытӥсь но йыре кылись кырӟанъёсыныз но та нылаш куэз ӟазег вылтыро каре. Со понна солы нимысьтыз тау! 

Радис Гайниятов озьы ик быръем сыӵе кырӟанзэ, кудӥз калык кырӟанлы матын вал. Ух, учкисьёсты эктытӥз ук! Адӟе вал асьтэос, кызьы залын пукисьёс чабизы, кесяськизы но тапыртӥзы. 

Ужрадлэн нырысетӥ люкетэз йылпумъяськем бере, учкисьёс кельшымон кырӟась понна куаразэс сётыны быгатӥзы. Умой малпамын. 

 

Кыкетӥ люкет 

«Выль куаралэн» кыкетӥ люкетаз егит кырӟасьёс «Шулдыр ӝытысь» кизилиосын кырӟазы. Котькудӥз кырӟаз аслаз дышетӥсеныз. Куд-ог номеръёсты учкыса, малпан ик кылдӥз, таиз люкет воксё но медам луы вылэм шуыса. Угось ӵемысь кырӟанъёс кизилиослы тупало ке, егит кырӟасьёслы чик но уг тупало вылэм. Кылсярысь, Яна Белослудцевалэн Юля Гавриловаен кырӟамзы воксё серем вал. Кызьы Юля сыӵе аслыз тупасьтэм кырӟанэз быдэстыны соглаш луэм?! Кӧшкемыт. Яке тани Эльвира Панченкоен Роман Болтачев сцена вылын пӧсь яратонэз возьматыны выризы ке но, Романлэсь мынямзэ адӟыса валано вал, солэн мусо-мусо луэмез испан пӧсь яратонэз возьматыны воксё но уг тупа. Серекъятэ гинэ. Нош куд-ог дыръя кизилиослэн куаразы егит кырӟасьёсты согылӥз. Кылсярысь, Руслан Серебренниковлэн чебер куараез согиз Валерий Мадазимовлэсь небытгес ик куаразэ. Яке тани Галина Платоновалэн куараез согиз сокем жингрес, кызьы огназ кырӟакуз милемлы потӥз вал, Татьяна Окороковалэсь куаразэ. Катерина Федоровалэн куараез воксё ышиз «Шулдыр ӝытысь» нылъёслэн куараоссы пӧлы. Со дыре ик пумиськиз сыӵеез но, куке егит кырӟасьлэн куараез дышетӥсезлэсь золгес вал. Кылсярысь, Ксения Ахметханова согылӥз Наташа Ушаковалэсь куаразэ. 

Яке огъя номеръёс бордын тросгес ужано вал, яке куд-ог учыръёсы дышетӥсьлы но дышетскисьлы ог-огзэс кылыны дышетсконо на вал. 

Вормисьёс 

Вылӥ гожтэмез лыдӟыса, валады ни, дыр, кин милемлы кельшиз, нош кин калыклы яраз. Нош кин вормиз? Ватсалом гинэ, калык кырӟанъёслы тупась кырӟанъёс вормизы туалаоссэ. Озьыен:

1-тӥ инты — жингрес куараё Татьяна Окорокова; 
2-тӥ инты — кужмо куараё Ксения Ахметханова; 
3-тӥ инты — ненег куараё Яна Пушина. 

Вормись утӥз кырӟанзэ студиын гожтыны сертификат. 

Ӟечкыласьком! Но тау шуиськом «Выль куараез» кыкетӥ арзэ ни радъясьёслы таӵе выль но тунсыко ужрадэз пӧрмытэмды понна. Али ик возьмаськом ни «Выль куара -2015» шоуэз но таӵе ик усто выль проектъёстэс! 

 

P.S. Туспуктэмъёс понна вождэс эн вае! :)

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын