Вакчияк: 8-тӥ шуркынмон

«Вакчияк» — со «Ваньмон дыр»-лэн выль рубрикаез. Котькуд нунал вакчияк ми тыршом тодматыны тӥледыз Ижкарлэн но оглом удмуртъёслэн улонысьтызы тунсыко выль иворъёсынызы. Куриськом тӥледыз но милемлы юрттӥськыны но иворъёстэс татчы келяны: info@vanmondyr.ru  

 

МОН ТОДАМ ВАЙИСЬКО 

Туннэ 19:00 часын Филармониын «Мон тодам вайисько» концерт ортчоз. Со сӥземын тодмо удмурт композиторъёслы Герман Корепановлы но Геннадий Корепанов-Камскийлы. 
Герман Корепанов асьмелы тодмо нырысетӥ удмурт «Наталь» операеныз (1961-тӥ ар) но нырысетӥ удмурт симфониеныз (1964-тӥ ар), кудӥз сӥземын Кузебай Гердлы но со кадь репрессиос улэ сюремъёслы, курадӟыса быремъёслы. 
Нош Геннадий Корепанов-Камскиез тодӥськом нырысетӥ удмурт «Италмас» нимо балетэныз. 
Концерт сярысь тросгес татысь тододы. 

 

WITH YARATON 

ЦСДР (Центр современной драматургии яке Туала драматурги центр) туннэ кык ар тырмонзэ пусйъе но 18:00 часын Филармониын (3-тӥ этажын) концерт сётэ. Верасько, концертысь удмурт кырӟанъёсты но кылыны луоз шуыса. 
Тросгес татын

 

НОШ ИК ЭЛЬКУНОВИДЕНИЕ 

Нош кинъёс туннэ ӝыт доразы пукозы, соос 18:20 часын «Мынам Удмуртие» телеканалтӥ «Светӥ дорын куноын» программаез учкыны быгатозы. Татын «Элькуновидение-2014» вожвылъяськонын вормисьёсты ӟечкылалозы. Тодады вайытом, туэ «Элькуновидениын» Шаркан ёросысь «Тулкым» ансамбль вормисе потӥз. 
Тросгес татысь тодыны быгатоды. 

 

УСТОЕЗ ДЫШЕТӤСЬ  

Толон «Анай кылъя устоез дышетӥсь» элькун ӵошатсконын вормисьлэн нимыз ялэмын вал. Финалэ потэм удмурт кылъя куатез дышетӥсь пӧлысь тужгес но устоез Шаркан ёросысь Ляльшур школаысь Светлана Малинина луиз.
Та сярысь тросгес татын

 

УМОЙ ИВОРЪЁСЫН ЭСТАФЕТА 

Facebook-ын удмурт кылэз тодӥсьёс пӧлын сокем кельшымон луэм умой иворъёсын эстафета мокшаос дорозь вуиз. Тунсыко, кыӵе эшшо финн-угор кылъёсын умой иворъёсты лыдӟыны луоз на? 

 

ТУПИ-ТАП: бускельёсмы сярысь 

Тросэз асьме пӧлысь «ВКонтактеысь» коми-пермяк кылын нуиськись «Тупи-тап» огинлы гожтӥськемын. Угось тросэз отысь верамъёс асьмелы валамон луо. 
Туннэ та огинэз нуись Василий Епановез армие кутӥзы. Оскеммы потэ, Васяез воштӥсьёс сюрозы. Яке со ачиз ик армиысен огинзэ выль малпанъёсын но чуръёсын тырмытыны дыр шедьтылоз. 
Нош кин та огинлы гожтӥськемын ӧвӧл на, гожтӥське! Оло маке со выллем удмурт кылын пӧрмытэмды потоз. 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын