Вакчияк: 13-тӥ шуркынмон

Бур ӵукнаен, эшъёс! Туннэ иворъёс таӵеесь: 

 

МИКАЛЬ МИХАЙЛОВ: #вылькнига 

«Шунды» ивортэ: «Нош али дасяське ни нырысетӥ «Куарагур» проектын вормись кылбурчилэн Микаль Михайловлэн бичетэз». Бичетлэн нимыз «Мон одӥг пол уг сайка улыны...» 
Тодады вайытом, Микаль Михайловлэн «Выль» кылбурезъя Юля Гаврилова кырӟан гожтӥз но сое та проектын быдэстӥз.
Дэмласьком эшшо огпол кылзыны таланто кылбурчилэсь но кырӟасьлэсь огъя ужзэс. 

 

ДАРАЛИ ЛАВКАлэн логотипез: #выльпус

«Дарали Лавка»-лэн выль логотипез кылдӥз. Сое удмурт азьветлӥсь Алексей Шкляев лэсьтӥз. 
«Дарали Лавка» «Сахар» арт-интылыкын интыяськемын. Ӵуказе лавкаысь арбериосты Dart party-ысен учкыны, дунъяны, мертаны но басьтыны луоз. 

 

«ЧИПЧИРГАН» Вильнюсын: #выльтуспуктэмъёс 

«Чипчирган» ансамбльлэн Литваын ортчись «Покровские колокола» фестивале пыриськемез сярысь толон валлян ивортӥм ни вал. Нош туннэ ансамбльысь нылъёслэсь Вильнюсын толло концерт азьын лэсьтэм астуспуктэмъёссэс возьматэммы потэ. Чебересь ик бон асьме удмурт нылъёсмы! Туспуктэмотчет лэсьтэмзы понна тау Аллалы, Леналы но Леналы!


Алла Лебедева но Лена Михайлова 


Кык Ленаос — Беспалова но Михайлова 


Алла Лебедева 

Вильнюсысь берпум иворъёсъя, «Чипчирган» толон туж умой кырӟам-эктэм. 

 

УДМУРТ КЫЛОСБУРЪЯ ФАКУЛЬТЕТЛЭН вуоноез: #кӧтӝож но #улонвӧсь 

Толон вотэсын Удмурт кылосбуръя но Журналистикая факультетъёслэн огазеяськонзы сярысь ивор вӧлмиз. Та сярысь вераськонъёс азьло но вал, но шара вераськон поттыны нокин ӧз дӥсьты кадь. Кызьы та ӝож югдур шоры учке «Удмурт Кенеш»-лэн тӧроез Игорь Семёнов, татысь лыдӟе. Нош Удмурт кылосбуръя факультетлы дурбасьтэмды потэ ке, юрттыны дась ке, гожтэ татчы: artem@udmurtlyk.ru 

 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын