Пальпоттӥсь суредъёс

Удмурт егитъёслэн мерлыко «Шунды» огазеяськонзы «Удмурт комиксъёсын бичет» поттӥз. Милям тодмоосмы, нималом соосты Суредаськись но Кылбурчи, комиксэз учкизы но котькудӥзъя вакчияк веранзэс кельтӥзы. 

«Удмурт бичетъёсын комикс» — «Шундыкар-2014» лагерьысь суредаськись пиналъёслэн ужъёсынызы бичет. Пиналъёсты комиксэн вырыны дышетӥз суредаськись Михаил Николаев. Бичетэ 8 нылпилэн ужъёссы пыризы. Соос пӧлын Таня Пудова, Наташа Сильвестрова, Олеся Малыгина, Марина Прокопьева, Софья Чузова, Саша Вахрушев, Анна Корепанова, Маша Федотова. 

 

Бичетысь комиксъёс сярысь огъя малпан 

Суредаськись: Комикс — со графика. Соин ик живопись комиксын луыны кулэ ӧвӧл. Кулэ сыӵе техника, кудӥз комиксысь сюжетэз одӥг-кык суред пыр валаны юрттоз. Соин ик та бичетын тужгес но устоосыз сьӧдо-тӧдьы комиксъёс яке соосыз, кудъёсаз ӧжыт буёл кутӥське. Сыӵе комиксъёссы Саша Вахрушевлэн но Маша Федотовалэн. 

Кылбурчи: Бичетысь комиксъёсыз учконъям мынямысь ӧй дугдылы. Котькудӥз туж огшоры но мусо гинэ серекъямез возьматэ. Ӧй вал озьы, кӧты висьытозь кудӥз ке вылын мед серекъялом шуыса. Озьы ик синмам йӧтӥзы янгышъёс но диалектын гинэ пумиськись кылъёс. Нырысетӥосыз понна йыры кур, кыкетӥосыз понна «лайк». 

 

Нимысьтыз котькуд комикс сярысь 

Суредаськись: Таня Пудова укыр живописе кошкем.
Кылбурчи: Танялэн туж тунсыко комикс суредан амалэз. Нылпиослы книга поттыны малпасал ке, мон сое иллюстратор луыны ӧтьысал. Но ымныръёс суредатысал ик. Татын соос быгатымтэеныз яке вуымтэеныз суредатэк кельтэмын, дыр, яке эшшо кыӵе ке муген, но со буш котрес ымныръёс шоры учконъям «татын тынад ымнырыд луыны быгатэ вал» яке «со интыын тон луыны быгатӥськод» гожтэмъёс йырам лыкто.

 

Суредаськись: Наташа Сильвестровалэн сюжетэз туж капчи ке но, со сое детальёс пыр туж узыр сётыны быгатэм. Нылашлэн экранэз чупамез, койка вылын кӧня ке кадр ӵоже пӧртэм сямен тэтчамез но вань мукет детальёс возьмато, Наташа суредзэ син азяз пуктыны быгатэ, нош техника ласянь со лябгес на. 
Кылбурчи: Зэмзэ ке, туж огшоры сюжетэз. Татын серекъяны но номыр вылын кадь. Но «Шундыкар» лагере ветлэмъёс комиксысь асьсэдыз тодмалозы, дыр. Мон но асме тодмай но нош ик пальышай. 

 

Суредаськись: Олеся Малыгина шедьтӥз комикслы геройёсты но лэсьтӥз соосын кык комикс! Кык! Ачиз комикс туж пинал синмын учкымон ке но, кык комикс пӧрмытэмез шумпоттэ. Озьыен, та нылашлы азьлантӥськись ужъёсты оскыны луэ. Малпасько, та геройёсын комикслэн но азьланез вань. 
Кылбурчи: Олесяез мон озьы ик нылпиослы учебник лэсьтыкум иллюстраторе ӧтьысал. Таоссэ но солэсь комиксъёссэ али ик учебнике пыртыны луоно кадь. Но вӧзаз гожтоно: та суредъёсъя верос малпалэ. Пиналъёслы кельшысал кадь. 

 

Суредаськись: Марина Прокопьева — профессионал. Трос пӧртэм детальёс, кыдёкысен но матысен геройёсты возьматон — суредась туж быгатыса лыдӟисьлэсь саклыксэ одӥг арбериысь мукет арбери вылэ выжтэ. Живописьсэ ӧжытак палэнтӥз ке, эшшо но усто пӧрмоз. Комикс туж тунсыко кутске, азьланьтӥське, нош пумыз малы ке но огшорыгес пӧрмем. Хэппи энд но тӥни. 
Кылбурчи: Кыӵе кельше мыным Мариналэн комиксэз! Йырын одӥг юан: сокем шуак йылпумъяськем комикслэн мукет люкетъёсыз луозы на меда? Малпасько, Мариналы аслыз комиксъёсын бичетъёс поттано ни. Лыдӟисьёслы та нылаш уз ёрмы. 

 

Суредаськись: Софья Чузовалэн техникаез туж тунсыко. Но сое графика ласянь золгес кароно на. Озьы ик шрифтъёсын но детальёсты висъян бордын ужано на. 
Кылбурчи: Та комиксэз учки но асме тодмай. Луэ ук озьы, уг удалты но уг удалты, котьма кар! Сюжет ласянь таиз комикс йылаз-пумаз вуттэмын. Ӟечок! Междометиосты ке учконо — комикс быдэсак куараосын тырмытэмын. Со гинэ но лыдӟисез мынь поттэ ни. 

 

Суредаськись: Саша Вахрушевлэн суредъёсыз туж огшорыесь ке но, соос графика ласянь туж устоесь. Огез гинэ урод, суредасьлы уг тырмы анатомиез умойгес тодэмез. Но бадӟым суредъёс вылын, кылсярысь, пияшлэн ымнырыз но мылкыдыз умой суредамын. Комиксысь суредъёслэн быдӟалазы, композициез — ваньмыз туж усто. Суредась векчи макеосты суредан бордын ёрмемын ӧвӧл — таиз но туж ушъямон. Котькуд кадрын вань маиз ке валтӥсез но маиз ке со валтӥсез сьӧрын кылемез. Комикслэн пумыз огшорыгес пӧрмем. 
Кылбурчи: Усто комикс. Ваньмыз ас интыяз. Пумыз туж мусо быре, возьмамтэ пум кыӵе ке. Тумошо. Тужгес но куке маймыл сыӵе лек ымнырын эшъяськыны дэмла. Малы ке «Восстание планеты обезьян» киноысь маймыл син азям пуксиз. Одно ик та комиксэз азьланьтоно! Возьматоно, мар та аспӧртэмлыко эшъяськонлэсь пӧрмыны быгатоз. 

 

Суредаськись: Аня Корепановалы одӥг сӥзёнэ — векчи макеосты суредан бордын йырдэ эн тӥя но соин сокем эн выры. Тужгес но устоосыз бадӟымъёсыз кадръёсыд. Таосыз понна ушъясал. 
Кылбурчи: Кутсконэз валантэмгес потӥз, нош пумыз мусо. Сыӵе пинал шумпотон возьматэмын. Комикслэн нимыз гинэ но серемез поттэ ни. 

 

Суредаськись: Маша Федотовалэн ог дыре ик туж усто но туж огшоры суредам комиксэз. 
Кылбурчи: Серем. Школаын дышетскисьёслы туж усто маке. Аслам пиналъёсы луизы ке, одно ик тае возьматъяло. Школаын умой дышетсконо но тросгес тодыны тыршоно шуыса, йыразы таӵе комикс пыр валан мед кылёз. Умой, та комикс бичетэз йылпумъя шуыса. Со огез кужмоосыз пӧлысь. 

 

Тау карон

Суредаськись: «Шунды»-лы нырысетӥ бичет бере кыкетӥзэ но, дасэтӥзэ но поттыны кужым но мылкыд сӥзем потэ. Нош пиналъёсты суредась гинэ медаз дышеты, писательёсын но соослэн одӥг-ог пумиськонзы мед луоз вылэм.
Кылбурчи: Сыӵе мусо бичетэз лыдӟем бере, эшшо но эшшо потэ на. Таин гинэ «Шунды»-ен мытэм уж медам дугды вылэм. Пиналъёслы Marvel-озь будоно ай ке но, кытысен ке но удмурт комикслы ӝужано ук! «Шунды»-лы но Оля Трониналы эшшо огпол нимысьтыз бадӟым тау! Нош пиналъёслы-суредаськисьёслы таӵе сӥзёнэ: пӧртэм критика пӧлысь тужгес но кулэзэ гинэ быръе, созэ, кудӥз быгатондэс волятоз, мукетсэ пель сьӧртӥды но лэзиды ке, номыр кышкытэз уз луы. 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын