Вакчияк: 21-тӥ шуркынмон

Кӧснуналэ но арнянуналэ ми но таре шутэтском. Соин ик туннэ иворъёсамы шутэтскон нуналъёслы удмурт афишаосын тодматом. Мукет иворъёсты но вератэк ум кельтэ. 

 

ПИЧИ BUBYLI: выль

Нырысетӥ удмурт «Пичи BUBYLI» коррекци арт-студия 22-тӥ (ӵуказе) но 29-тӥ шуркынмонэ «Сахар» арт-интылыкын пумиськонъёс ортчытэ. Студия туж вите гуртысь удмурт пиналъёсты, кудъёсыз урод кыло яке урод верасько, соосын ужан понна. 
Пыронэз дунтэк. 
Студия сярысь тросгес татысь тодыны быгатоды. 

 

БРАНГУРТ ПЕСЯНАЙЁС: пумиськон 

22-тӥ шуркынмонэ (ӵуказе) 13:00 часын Брангуртысь лулчеберетъя юртын «Брангурт песянайёс»-ын пумиськон ортчоз. Люкам коньдонысь ӝыныез #zemos_udmurt_veme акция улсын мультик лэсьтонлы кошкоз, нош ӝыныез — гуртысь черклэсь пушсэ тупатонлы. 

 

POLINA KUBISTA: лэсьты ачид

22-тӥ шуркынмонэ (ӵуказе) 11:00 часын Polina Kubista вань мылкыд карисьёсты ас киынызы ыжпи вурыны ӧте. Мастер-класслэн дуныз — 350 манет. Вуриськыны мылкыд карисьёслы азьло ик гожтӥськоно. Интыос трос ик ӧвӧл. 

 

ВЫЛЬ КЛИП 

Мурӝол Underground-лэн кема возьмам «Super Удмурты» клипез вотэсын потӥз. Толло нунал куспын выль клип оломамында урод веранъёсты люказ. 
Со критика шуон борды «Ваньмон дыр»-ысь огез ужасьмы но итӥське: Удмурт патиын пуктэм берпуметӥ кадръёс тужгес но устоесь пӧрмиллям. Быдэс клипын со ӝытын кырӟамзэс гинэ возьматысал ке, соку оло умойгес но луысал. Нош татын укыр чаляк ваньмыз ортче, синмез вошъяса но вуыны уг луы. Ньыль но ӝыны минут ӵоже Богдан Анфиногеновлэсь быдэс творческой улонзэ возьматэм кадь луэм. Эх, шу... Куинь-ньыль клиплы тырмымон малпанъёсты огазеяллям но одӥг клип пӧрмытӥллям кадь. 

 

КУЗОНысь удмуртъёс 

22-тӥ шуркынмонэ (ӵуказе) 17:00 часын Кузонысь Эшъяськон юртын «Удмурт пумиськон» ортчоз. Пумиськонын планъёс сярысь, вуоно ужрадъёс сярысь вераськонъёс ӝутэмын луозы. 
Тросгес татын ивортэмын. 
 

ПУЗКАР ӟуч кылын 

Татчыозь Удмуртиын нокин ӧз но поттылы кадь, кыкетӥ удмурт кинолы ӟуч субтитръёс вань ни шуыса. Нош Екатеринбургын тӥни «Пузкар»-ез ӟуч субтитръёсын учкозы ни! 
Озьыен, Екатеринбургысь удмуртъёс, 27-тӥ шуркынмонэ Урал кун педагоги университетын «Пузкар»-ез учкыны луонлыкты вань. Асьтэос но лыктэ, эшъёстэс но чортэ. Ӟуч кылэз ваньзы валало ук. 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын