Вакчияк: 25-тӥ шуркынмон

Туннэ иворъёсмы туж узыресь кадь. Уд оскиське ке, асьтэос адӟе. 

 

«Удмуртлык»: вотэсысь улонэ

Туннэ (25-тӥ шуркынмонэ) 15:30 часын Удмурт кун университетлэн лыдӟонюртэз но Финн-угор лулчеберетлэн «Чибори» клубез ӧтё вань мылкыд карисьёсты «Виртуальное сообщество как новый тип общественной организации» котырес ӝӧке. Пумиськонын таӵе юанъёс ӝутэмын луозы: 
— Кыӵе ужпумъёсты ӝутэ но мар бордын ужа «Удмуртлык» туркым? 
— Кыӵе югдур вал удмурт вотэс дуннеын «Удмуртлык» туркымлэн кылдэмез азьло?
— Мар бордын «Удмуртлык» азьланяз ужаны малпа?
Ӧтем куноос — «Удмуртлык» туркымлэн азьветлӥсьёсыз — Рома Романов, Павел Поздеев, Алексей Шкляев. 

 

Александр Григорьевич Шкляевен пумиськон ӝыт

25-тü шуркынмонэ 19:00 часын "Сахар" арт-интылыкын тодмо удмурт критикен, литературатодосчиен, журналистэн Александр Григорьевич Шкляевен пумиськон ӝыт ортчоз. 
Пумиськон А.Г. Шкляевлэн алигес потэм «Арысь аре: удмурт литература даурлэн кожъёсаз» книгаезлы сӥземын. Ӝыт куспын ӝутэмын но пертчемын луозы таӵе юанъёс: 

— Кыӵе инты басьтэ критика литературалэн азинсконаз? 
— Удмурт литература: малы со номырин воштонтэм? 
— Удмурт литература: пичи-а со, бадӟым-а? 
— Кыӵе со — удмурт литературалэн лыдӟисез? 
— Удмурт литература — политикалэн палэназ? 
Лыктэмъёс озьы ик быгатозы юанъёссэс сётъяны но выль книгаез учкыны, бугыръяны но басьтыны. 

 

Евгений Серебренниковез буре вайыса 

Туннэ (25-тӥ шуркынмонэ) 19:00 часын Филармониын Росси Федерациысь дано артистэз, Удмурт Элькунысь калык артистэз Евгений Серебренниковез буре ваён ӝыт ортчоз. Люкам коньдон Евгений Серебренниковлэн кылбуръёсыныз бичет поттонлы но синпелет пуктонлы мыноз. 
Кин ке Е.Серебренников сярысь Удмурт википедие гожтэ вал-а мар-а...  

 

 «Удмурт Блогиня — 2014»

«Юмшан57» промо-огин ялэ «Удмурт Блогиня — 2014» вожвылъяськонлэн кутскемез сярысь. Вормись 3 000 манет утоз. Вожвылъяськонлэн куронъёсыныз пыр-почгес татын тодматскыны быгатӥськоды.  
Тодады вайытӥськом, кылем арын та вожвылъяськонын вормисе Марина Сергеева потӥз. 
Ӵошатскон сярысь выль иворъёсты #Удмурт_Блогиня_2014 хештэгъя утчалэ. 

 

Гриша Григорьев: #выль виджет 

Гриша Григорьев выль удмурт виджет кылдытэм. Матысь дыре Android-ёслэн кузёоссы куанозы ук! Та дыре егит программистэз одӥг юан сюлэмшугъяськытэ: кызьы ниманы та виджетэз — лыдпус виджет яке дырпус виджет?

 

«Огни Большого ВУЗа»: ФУдФ 

Толон Удмурт кун университетын «Огни большого ВУЗа» вожвылъяськонын асьсэ спектакльзэс Удмурт кылосбуръя факультетысь студентъёс возьматӥзы. 
Шумпотымон, кылем арын кадь нокин спектакль шорын султыса ӧз кошкы, ӧз сяласькы, ӧз курла. Но тазэ спектаклез адӟем бере сыӵеос но малпазы, дыр, кыӵе зол вал кылем арын спектакль... 
Туэ еж нырысетӥ курсысь дышетскисьёсты сцена вылэ поттэмен-а, сцена вылэ потӥсьёслэн ӧжыт дасяськеменызы-а, ваньмыз трослы лябгес вал. Но со еж артистъёс пӧлын но али ик ӝужаны быгатӥсьёсыз адӟиськизы. 
Тросгес туспуктэмъёс татын.  

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын