Вакчияк: 26-тӥ шуркынмон

Кыкетӥ нуналзэ ни иворъёсын узыр нуналлы паймиськом но шумпотӥськом. Тӥ но пыре, лыдӟе, тодматске!

#zemos_udmurt_veme Эстониын!

27-тӥ шуркынмонэ Таллинын #zemos_udmurt_veme акция улсын благотворительной концерт ортчоз. Концертэ Николай Анисимов но Мария Корепанова пыриськозы. Люкам коньдон нырысетӥ удмурт мультсериал лэсьтонлы мыноз. 

 

Николай Гоголь но Ашальчи Оки

27-тӥ шуркынмонэ Филармониын Н.В.Гогольлэн «Ночь перед Рождеством» кузьмадёсэзъя опера-колядка возьматэмын луоз. Удмурт учкисьёслы Выль ар шӧм Казан кун академиысь кырӟасьёс пыӵатозы. 
Кызьы ивортэ Павел Александров (Shoner Paul), со сцена вылэ Кеч кариськыса потоз. Нош Вакула Ашальчи Окилэн кылбуръёсызъя ария быдэстоз. 

 

Удмурт гожъяськисьёслэн огазеяськонзы улӟе кадь

27-тӥ шуркынмонэ 15:00 часын Эшъяськон юртын удмурт литературалы сӥзем «Удмуртская литература: грани актуальности» котырес ӝӧк ортчоз. Пумиськонэз Удмуртиысь гожъяськисьёслэн огазеяськонзы ортчытэ. Вераськозы Пётр Захаров но Алексей Арзамазов. 

 

Удмурт кылын споръяськон

Туннэ (26-тӥ шуркынмонэ) 19:00 часын Эшъяськон юртын удмурт кылын дебатъёс ортчозы. Споръяськон ужрадэз удмурт егитъёслэн «Шунды» огазеяськонзы радъя. 
Ӝыт куспын таӵе темаосъя соглаш яке пумит луэм малпанъёс чузъяськозы: 
1.Улонын ас кужымедлы гинэ осконо.
2. Россиын ЕГЭ экзаменлэсь куштӥськоно.
3. Спортэн вырон адямиез сӧсыртэ.
4. Пи но ныл куспын эшъяськон луыны быгатэ .
5. Гуртын улон город улонлэсь умойгес.
6. Трос нылпиё семья одӥг нылпиё семьялэсь шудогес.
7. Блог нуон-дыр быдтон.
8. Армие ветлон - дыр быдтон.
9. История милемыз номырлы но уг дышеты.
10. Удмурт кылосбуръя факультет улыны кулэ.
11. Удмурт дискотекаос юон инты гинэ.
12. Удмурт эстрадалэн азинсконэз ӧвӧл.
13. «Зэмос удмурт веме» - пайдаё акция.
14. «Буран песянайёс» удмуртлыклы номыр ӧз сётэ. 
15. «Шунды» огазеяськон интыяз сылэ. 
16. Мерлыко вотэсъёсын мылкыддэ веран – кужымдэ возьматон. 
17. Егитъёс пӧлын удмурт элита вань. 
18. Ӟучо-удмурто вераськон – удмурт кылэз пожан. 

Вормон понна вожвылъяськоз 4 команда. Котькудаз быдэн кык адями. Соос пӧлын удмурт азьветлӥсьёс Марина Сергеева но Аня Образцова, удмурт филологъёс Оля Князева но Олеся Фёдорова, озьы ик кык воргорон команда — Никита Стрелков но Никита Тронин, Яков Игнатьев но Андрей Петров. 

 

«Шунды»: выль бичет

Удмурт егитъёслэн «Шунды» огазеяськонзы «Шунды бичет» нимын методика поттӥз. Бичетэ «Шунды»-ен радъям проектъёсъя но ужрадъёсъя дасям материал (приложениос, проектъёслэн текстъёссы) пыртэмын. Методикалэн авторез Ольга Тронина. 

 

«Брангурт песянайёс» но #zemos_udmurt_veme

22-тӥ шуркынмонэ «Брангурт песянайёс»-ын пумиськон ужрад ортчиз. Ивортӥм ни вал, пумиськонын люкам коньдон удмурт мультсериал лэсьтонлы но Брангуртысь черклэсь пушсэ тупатонлы мыноз шуыса. Туннэ тодмо луиз, #zemos_udmurt_veme акция улсын люкам коньдон 5 сюрс манетлы тросгес луиз. «Брангурт песянайёс»-лы дан но гажан!

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын