Удмурт мультсериаллэн нырысетӥ сериез

#zemos_udmurt_veme акция улсын лэсьтэм удмурт мультсериаллэн нырысетӥ сериез дась! Туннэ сое Мария Галеевалэн творческой ӝытаз возьматӥзы. 

Мультфильмлэн нимыз «Лудкеч но эбек». Суредаз но кылдытӥз сое Александра Гладыш. Сценарий вылын ужаз Павел Поздеев, куараен выриз Леонид Гусев, нош выжыкылэз лыдӟиз Алевтина Степанова. 

#zemos_udmurt_veme акция улсын бичам коньдонысь та мультфильмлы 15 сюрс манет кошкиз. 

Тодады вайытом, мультфильм 1 минут гинэ кыстӥське. Асьтэос тани учке. 
 


Милям тодмоосмы, нималом соосты Суредаськись, Кылбурчи но Тэшкыли, та мультфильмез учкизы но таӵе малпанъёссэс веразы: 

Суредаськись: Соку ик верало маиз мыным ӧз кельшы. Нырысь ик со лудкечлэн дырекъямез — суред сокем выре, лудкечлэн ымныраз ваньмыз сураське но ӝуклы пӧрме кадь. Но со мульфильмлэн кутсконаз гинэ озьы. Собере туж урод суредамын лудкечлэн синкылиосыз. Со синкылиос но ӧвӧл кадь, маке мукет сокем ӝог кисьтӥське но кисьтӥське. Мультфильм одӥг амалъя суредамын, синкылиос — воксё мукет амалъя. Нош пумаз кузьыли олома, дыр, каре. Оло эктэ, оло солань-талань ветлэ, оломар. Оглом мультфильм кельшиз. Малпасько, сое комикслы но пӧрмытыны луэ, выжыкылъёсын книгае но татысь суредъёсты пыртыны луэ, кыӵе ке кузьымъёс вылэ но та муспотон лудкечез печатланы тунсыко луысал. Мультфильмлы коньдон калыкен бичаське бере, та продуктэз пӧртэм ласянь кутоно, со ачиз но мультсериаллэн вуоно сериосызлы табыш мед поттоз вылэм. 

Кылбурчи: Туж кема но туж трос пол Павел Поздеев ваньзэсты кышкатыса кадь шуылӥз: мультфильм одӥг минут гинэ кыстӥське. Зэмзэ верано ке, номыр кышкытэз татын вылымтэ. Ачиз выжыкыл но пичи ук. Пичи но мыньпоттӥсь. Мыным мультфильм туж кельшиз. Ӧз кельшы выжыкылэз лыдӟисьлэн куараез гинэ. Кыӵе ке со Совето вакытысь кадь. Вашкала. Соин валче ӧжытак кӧшкемыт. Бырйыны луысал ке, мон сыӵе куараен выжыкылэз пиналылы ӧй возьматысал, дыр. Туалагес-а, егитгес-а выжыкылэз лыдӟись кулэ вылэм. Капчигес-а, шуод. Нош али син азям со кышномуртэз пуктӥсько ке, ну укыр тыршыса со сое лыдӟе кадь. Валасько, таяз но вуоноосаз мультикъёсы дась гожтэм выжыкылъёсты кутылозы, озьы соосты лэсьтыны коньдон но ичигес кошкоз, дыр... Но малы выжыкылэз лыдӟыны со ик «Камали» студиысь кырӟасьёсты пуктонтэм меда? Со ик Полина Келареваез! Ассэ Эркишевез но. Быгатысалзы ук! 

Тэшкыли: Мыным ваньмыз кельшиз. Эшшо потэ на... Пумаз малы ӵыжин инме лобӟе но вуэ берен уг усьы? Мон малпай, пилемъёс пумаз со понна возьматэмын. Ӵыжин соос пыр лобӟоз но сэре вуэ тачак! усёз. Бух! 
 

Мультсериаллэсь кыкетӥ серизэ лэсьтоз суредаськись-аниматор Андрей Першин (кин тодмо солэн ужъёсыныз, со куанэмын). Таиз мультфильмын «Курка, ӵӧж но мукетъёс» выжыкыл возьматэмын луоз. Выль мультфильмлэн потон нуналыз — 10-тӥ тулыспал. 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын