Вакчияк: 4-тӥ толсур

Туннэ иворъёсамы: кин пуктӥз но дунъяз ни "Дырпус виӝетэз"? Кыӵе мылкыдын учко удмурт мультфильмез нылпиос? Кыӵе ужрадъёс витё милемыз туннэ? 
 

Нош ик виӝет сярысь 

Толон верам ни вал, удмурт программист Гриша Григорьев Андроидъёслы выль виӝет лэсьтӥз шуыса.  «Дырпус виӝет» телефонлэн экраназ дырез удмурт кылын возьматэ. Туннэ выль телефон ватсэт сярысь таӵе малпанъёсты шедьтыны луэ ни.  

Асьтэос адӟиськоды, «Дырпус виӝетэз» тодмо удмурт кырӟась Иван Белослудцев но, удмурт азьветлӥсь Алексей Шкляев но, «Чипчирганысь» Елена Базилевских но, удмурт филолог Юля Спешилова но дунъязы ни. Озьыен, кин татчыозь виӝетэз ӧз на пукты, трос эн малпаське, пуктэ! 
 

Нош ик мультик сярысь

Кызьы гожъям ни вал, валлян #zemos_udmurt_veme акция улсын лэсьтыны кутскем удмурт мультсериаллэн нырысетӥ сериез потӥз. Кык нунал куспын мультикез озь но тазь курласа быдтӥзы ни. Кинлы ке мультик аниме кадь пӧрмеменыз уг кельшы, кинлы ке выжыкылэз лыдӟисьлэн куараез уг яра, нош кин ке мультикысь «астэ быдтон» темаез удмуртъёсын герӟаса кыӵе ке укыр кӧшкемыт малпанъёсы вуэ... Малы ке но бадӟымъёслэсь малпанъёссэс, курланъёссэс, визь-кенешъёссэс лыдэ басьтонъямы, ми вунэтӥськом пичиос сярысь, кудъёсыз понна та мультсериал лэсьтӥське. Нош соослы ваньмыз кельше ук! 

Тани мар верало егит анайёс: 

Наташа Образцова: «Нылмы шуиз — эшшо! эшшо! эшшо!» 

Наташа Михайлова: «Эриклы кельшиз! Эшшо но эшшо учкемез потэ! Ымнырысьтыз пальпотонэз уг ышы! Шуд!»  

Мария Галеева: «Нылылэн синъёсызъя валай, кыӵе солы кельшиз. Синъёсыз чиляло вал!» 

Алёна Китова: «Кык аресъем нылылы кельшиз, эшшо куре на вал. Суредъёс чебересь, яркытэсь, пӧйшуръёс мусоесь. Но нылы пуштроссэ уг на вала. Бадӟымезлы пиелы (солы 4 арес) таӵе пуштросо мультфильм возьматыны вазь на ай...»  

 

Тодады вайытӥськом: #туннэ 


Туннэ (4-тӥ толсуре) 15:00 часын Удмурт кун университетлэн лыдӟон юртаз Юрий Александровлэн "Обычное право удмуртов" книгаеныз тодматскон ортчоз. 
 

4-тӥ но 5-тӥ толсуре (туннэ но ӵуказе) Удмурт театрын тодмо удмурт драматурглэн Дарио Фолэн "Эрико яратон" пьесаезъя спектакль возьматозы. Спектаклез пуктӥз Алексей Ложкин. Тросгес татын
 

4-10-тӥ толсуре (туннэысен) "Дружба" киновозьматонниын француз кинофестиваль ортчоз. Киноосты француз кылын но ӟуч субтитръёсын возьматозы. Киноосын тодматскыны татын быгатоды. 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын