Вакчияк: 9-тӥ толсур

Туннэ иворъёсмы кыӵе ке туж бадӟымесь, туж кулэ луисесь кадь. Ай, мар ватонэз, туннэ иворъёсамы сомында ӟечез, ми ӵукнаысен ик куаныса улӥськом ни! 
 

Удмурт Элькунлэн Кункатэзлы — 20 ар 

Туннэ (9-тӥ толсуре) 19:30 часын «Сахар» арт-интыын «Удмурт Элькунлэн Кункатэзлы — 20 ар. Толон, туннэ но ӵуказе» дискуссия ортчоз. Ужрадын таӵе темаос ӝутэмын луозы: 
1. Удмурт Элькунлэн Кункатаз кыллэн интыез;
2. Росси Федерацие пырись кунлэн интыез Удмурт Элькунлэн Кункатэз ласянь; 
3. Адямилэн но гражданинлэн эрикрад статусэз Удмурт Элькунлэн Кункатэз ласянь. 

Куноын Леонид Гонин но Сергей Бехтерев. 
Ужрадэз «Удмуртлык» туркым радъя. 

 

Газетлэн вылбамаз — Олеся Дыдыкай 
яке удмурт шӧмо меда «Универ.ru»?

 

Удмурт кун университетын «Универ.ru» газетлэн выль номерез потӥз. Вылбамаз тодмо удмурт кырӟась Олеся Дыдыкай Полатова. 
Та номерез Журналистика факультетысь 2-тӥ курсын дышетскисьёс лэсьтӥзы. Малпамзыя, газет Удмуртилы, удмурт лулчеберетлы, удмурт кыллы но удмурт сиён-юонлы сӥземын луыны кулэ вал. Зэмзэ ке, номерын сокем ик трос удмуртэз ӧвӧл. 
Ми висъямы Олеся Полатоваен вылбамез но интервьюез, удмурт кинематографлы сӥзем статьяез, Петр Палганэн интервьюез но университетын удмурт кылэз дышетонлэн пайдаезлы сӥзем юан-веранэз. Мукет материалъёс сыӵе усто пӧрмоно газетлэсь номерзэ берлань кыско, огшоры номеръёсыз пала берыкто кадь. Жаль... 
Нош вылбамзэ вандыса борддоре лякем потэ. Дырпус но ӧвӧл ке но. 

 

2014-тӥ арлэн кырӟанэз 

Киясаысь «Ерпечкаос» ансамбльлэн «Льӧль сяська» кырӟанэз 2014-тӥ арлэн кырӟанэз луиз. Та кырӟан понна «Мынам Удмуртие» радиоез кылзӥсьёс тужгес трос пелепон гожтэтъёс ыстӥллям. 
Ми но «Ерпечкаос» понна шумпотӥськом! Та ансамбльысь кырӟасьёс шоры учкысалмы но учкысалмы, задор кырӟанъёссэс кылзысалмы но кылзысалмы кадь. 

 

Удмурт театрлэн валтӥсь режиссёрез — Алексей Ложкин

Удмуртиысь дано артист Алексей Ложкин Удмурт йӧскалык театрлэн валтӥсь режиссёрез луиз. Та дырлы со кык пӧртэм жанръем спектакльёс пуктӥз ни. Огез — «Улон-шудон» драма, мукетыз — «Эрико яратон» мур пуштросъем комедия. 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын