Удмурт ӵошатскисьёс

Тазэ материалмес ми вотэс-вожвылъяськонъёслы сӥзьыны малпам. Сыӵеосызлы, кудъёсаз удмуртъёс пырисько. Лыдӟемды бере ӵошатскисьёс понна ми кадь "висьыны" мед кутскоды. 

Удмурт сюан

Ивортӥм ни вал, Юля но Виталий Шахтинъёс (маке та егит кузпалъёс сярысь берло ӵем гожъяськом кадь, бен-а?) «Моя большая национальная свадьба» ӵошатсконэ пырисько шуыса. Толон та ӵошатсконлы йылпумъянъёс лэсьтэмын вал. Жаляса верано, Юля но Виталий вормисьёс пӧлы ӧз сюре. Но пӧртэм калыкъёс табере тодо, кыӵегес туссыя туала удмурт сюан шудӥсьёс. 

Нош вормисе та вожвылъяськонын чукот сюанысь туспуктэм быръемын вал. 


Литературалэн арез

Якшур-Бӧдьяысь нылъёс понна «Мисс Литература-2015» вотэс-вожвылъяськон ортче. Та вожвылъяськонэ сюрон понна, мылкыд карисьёс яратоно книгаысьтызы геройёс кадь туспуксизы. Табере туспуктэмъёс 26-тӥ толсурозь вотэсын лайкъёс бичалозы. Вормись «Мисс Литература-2015» луоз, соин ӵош эшшо 11-ез вормись ныл 2015-тӥ арлэн дырпусаз поттэмын луоз. 

Шумпотӥськом Удмурт кылосбуръя факультетысь нылъёс понна (Юмшан57, тӥни кытын ФУдФ-лэн ас кылзэ гажамез, марысь мар), угось соос удмурт произведениосысь геройёслэсь тусъёссэс ас вылазы мерталлям. Кылсярысь, Настя Загребина Михаил Петровлэн «Италмас» поэмаысьтыз Италмас кадь туспуксем, нош Оля Вахрушева Кедра Митрейлэсь «Катязэ» быръем. 

Ольга Вахрушева Кедра Митрейлэн «Катя» повестьысьтыз Катяез возьматэ: 

"Катя, Койыкен улыны кутскем бераз, зэмзэ но азьло кадь ик чеберскиз. Чебер ымныраз солэн табере капчи мылкыд шудэ... Кеносысен валес вылын Койыклэн пеляз кариськыса вераз Катя секытэн лэумез сярысь".

Настя Загребина Михаил Петровлэн «Италмас» поэмаысьтыз Италмасэз шудэ: 

"Ву дуре васькыкуз, тӧдьы юсь кожалод.
Со сярысь малпаса, егитъёс лулскыло...". 

 

Калык куара

Нош Мускоын улӥсь Наталья Дзыга (тросэзлы со тодмо «Shoodja Choodja» нимо этно-проектэныз) «Народная премия на Радио «Голоса планеты» вожвылъяськонэ пыриське. Мылкыд карисьёс таяз вожвылъяськонэ 30-тӥ толсурозь пыриськыны быгато ай. Нош вормисьёслэн нимъёссы 6-тӥ толшоре тодмо луозы.

Ӵошатсконын вормисез «Твой час» нимо программае ӧтёзы, мукетъёссэ вормисьёсты радиоконцертэ чортозы. 

Наталья Дзыгалэн та вожвылъяськонэ пыриськемез сярысь татын гожтэмын. 

 

#Удмурт_блогиня_2014 

«Юмшан57» промо-огин кыкетӥ арзэ ни «Удмурт блогиня» ӵошатскон ортчытэ. Кылем арын вормисен Марина udmurto4ka Сергеева ялэмын вал. Туэ вормисез арт-критик Настя Шумилова быръе. Аслэсьтыз бырйиськонзэ Настя дневник амалэн гожтыса кельтэ. Дневникысьтыз нырысетӥ люкетсэ татысь лыдӟыны луэ. Кыкетӥ люкетэз но вормисьлэн нимыз 23-тӥ толсуре ялэмын луоз. 

Нош ми малпаськом вал, удмурт блогиняез кӧня ке мурт быръе... Озьы вылымтэ. 
Со сяна, ми туж куректӥськом, ваньзылэсь азьпал удмурт кылын блог нуыны кутскем Маша Марайко Векшинаналэн та удысысь ышемез понна. Нош тӥ ӧд малпалэ-а, «Юмшан57», удмурт блогиняез быръемды блогеръёсты гожъяськыны бурдъям интые лапкомытэ шуыса?! 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын