Вакчияк: 18-тӥ толсур

Азьланьтӥськом выль иворъёсын тодматонмес.

 2015-тӥ ар — журналистикалэн арез 

16-тӥ толсуре ортчем Пичи Кенешын «Удмурт Кенешлэн» тӧроез Игорь Николаевич Семёнов 2015-тӥ арез удмурт журналистикалы сӥзьыны дэмлаз. Таӵе малпанзэ Игорь Николаевич «Удмурт дунне» газетлэн 100 ар тырмонэныз герӟаз. 

 

#оломарно

«Юмшан57» #ОЛОМАРНО нимын блогчиосын дырпус дасяз. Дырпус удмурт блоглыкысь тужгес азинлыко блогчиослэн туспуктэмъёсынызы чебертэмын. Соос пӧлын Марина Udmurto4ka Сергеева, Мария Марайко Векшина, Алина Эгра вера Крестьянинова. Дырпуслэн дуныз — 350 манет. Басьтэмды потэ ке, татчы гожтэ. 

 

 Ури-бери паймыто 

Валады ни, дыр, ми туж яратӥськом «Ури-бери» сярысь гожъяны. Быгато ик соос милемыз паймытыны. Толон та компания таӵе ялон лэсьтӥз: 

«Ми вераськиськом удмурт кылын! Котькуд удмурт кылын лэсьтэм заказлы — 10% скидка!» 

Мукетъёсыз табыш поттон понна тыршысалзы ни, удмурт кыл шоры ӧз но учкысалзы. Соин ик дан но гажан тӥледлы, ури-бериос! Тӥледыз ӧтён понна гинэ кыӵе ке ужрад-а мар-а ортчытоно ни... 

 

 Кебит Возьмась Awards — 2014

«Юмшан57» ялӥз «Кебит Возьмась Awards-2014» акцилэн кутскемез сярысь. Акция куинь этапен ортчоз: 
— 9-тӥ толшорозь мылкыд карисьёс 2014-тӥ ар понна удмурт дуннеысь тужгес возьдаськымон ужрадъёс, адямиос, арбериос сярысь татчы (лушкем) но татчы (шара) гожтыны быгато (куинь пӧртэм номинациосы — «Э-ке-кек...», «Куашетон» но «Возьытлык»); 
— 15-тӥ толшорозь http://kuara.ru/ вотэсбамын куара сётоно мыноз; 
— «вормисьёсты» данъян ужрад ортчоз. 

Ну мар, тодады вае али, кинъёс но маос понна тӥледлы туэ возьыт вал? «Бурановские бабушки»-лэн выль песянайёсыз понна? Кремльын Удмуртилэсь арзэ усьтӥсь концерт понна?.. 

 

MinFin: финн-угор минута


MinFin огин Выль арен ӟечкылан видеоослы ӵошатскон ялэ. Ӵошатскисьёс финн-угор кылъёсын одӥг минутъем ӟечкыланзэс видеое гожтыны но огинэ пуктыны кулэ. 

Вожвылъяськонэ нырысетӥосыз пыриськисьёс — удмурт нылъёс. Мусоесь, бен! 
Огинысь та видео дас муртлэн бамаз яке огиназ выжтэмын луиз ке, нылъёсты кузьым вите. 

Та огин сярысь нимаз гожтоно ай. Тросэз уг но тодо, дыр, малы та огин сӥземын... 

Тунсыко статьяос

Берпуметӥ комментариос:

система комментирования CACKLE

Ваньмон Дыр Инстаграмын